Skip to Content

Thursday, March 28th, 2024
یاخی بوونی خەونی پیاو لە (ماڵ) ولە (جەستەی) ژن…

یاخی بوونی خەونی پیاو لە (ماڵ) ولە (جەستەی) ژن…

Closed
by July 6, 2012 ئەدەب

 

 

ماڵ بە تەنیا پەناگەیەکی خۆخڕ کردنەوە و ئامادە بوونێک نیە لە بزرنەبوون و مەنزلێکی تێر بوون وحەوانەوەی جەستە، لەگەل ئەوەی لانەی حەوانەوەو راژەنینی رۆحە، هەندێکجاریش دەبێتە پەنایەک بۆ ئازاد بوونی شتە تایبەتیەکان، لەو کۆمەڵگا داخراوانەی هەموو دەروازەو پەنجەرەیەک بە سەر ئازادی تاک دادەخرێت، تاکیش ناتوانێت بە ئازادی گوزارشت لە شتە تایبەتیەکانی خۆی بکات، تەنانەت ناتوانێت خەونیش بە ئاسانی ببینێت، ناچار دەبێت بکەوێتە دوای دۆزینەوەی مەکۆیەک تا بتوانێت هەنگاوێک لە کۆشکی خەونەکانی خۆی بچێتە ژوورەوە، دیارە ئەو مەکۆیەش ماڵە…

لە دووتووێی شیعرە ناسکەکەی (هەندرێن حەمەدەمین)شدا ماڵ رەگەزێکی زیندووە وەکو ماڵێکی ئاسایی نیە، هەرچەندە ئەو خۆی وەکو رەگەزێک لە ماڵێکدا هاوشانی رەگەزەکەی دیکە لە سێبەری ماڵێکدا پانتاییەکیان لە ناو کۆمەڵگا پڕ کردۆتەوە، بەڵام لە واقیعدا ماڵ ماڵێک نیە ماڵی ئەو بێت و خەونەکانی دابین بکات، ناچار دەبێت لە ماڵەکەی خۆی بیر لە ماڵێکی دیکە بکاتەوە تا ماڵێکی پڕ لە خەون وخەیاڵ بدۆزێتەوە، بەڵام ئەگەر ماڵیش حالەتێک بێت بۆ برەودانی خەون، ئەوا گەلێجار دەبێتە حالەتێکیش بۆ لەبار بردنی خەون، بەڵام چ ماڵێک دێت و خەونەکانی بەسەر دەکاتەوە، یاخود ئەو سەر بە چ ماڵێک بکات تا خەونەکانی بەسەر کاتەوە…

پەیوەندی نێوان رەگەزی (ژن) و (ماڵ) لە نێوەندی خەوندا..

ماڵ دەبێت خەونی هەموو کەسێک نەبێت، دەشێت ماڵێک هەبێت خەون تێیدا تام بکرێت و بۆن بکرێت، بەڵام خەون خۆی ئەو رەگەزە نەمرەیە ناتوانێت دەستەمۆ بکرێت، کردنەوەی دەرگا داخراوەکانی کۆمەڵگا کارێکی ئاسان نیە لە ماڵێکدا، گال دانەوەی لە ماڵێکی دیکە، ناچارت دەکات تا یاخی ببیت ئەو ناچاریەش دەبێتە مەغزاو پەیامێکی یاخیبوون بۆ کرانەوەی کۆمەڵگا، لە کۆمەڵگا داخراوەکانی ئێمەدا، ماڵ تاکە مەنزلێکە کە هەموو شتێکی داخراو ورازێکی نهێنی سەربەست دەبێت و دەروویەک دەکرێتەوە تا دەروازەکان واڵا ببنەوە، بەڵام ئەگەر نێرێکی پیاوسالار لەو ماڵە نێرینەیەی خۆیدا پەنجەرەو پەردەو دەرگاکانی بەسەردا دابخرێن، دەبێت ئەوکات روو لە کوێ بکات روو لە چ بیابانێک بکات تا هەولێکی کرانەوەی خۆی ببینێت، یاخود دەبێت ئەویش وەکو (ئەمریکی واقیع)رازی بێت بەو چارەرنووسە، دیارە ئەدەب دۆستێک وەکو کەسێکی ئاسایی ناو کۆمەڵ ناڕوانیت هەرزوو بیر لە ژیانێکی دیکە بکاتەوە، بەلکو لە دەرئەنجامی سەرکێشیەکدا رووبەرووی هەستێکی وڕوژاوی خۆی بەو شێوەیە دەبێتەوە کە لە دووتوێی نوسینێکی ئەدەبیدا کلوکۆی خۆی دادەمرکێنێت…

لەلایەکی دیکە ئەوە یاخی بوونی پیاوێکی سەرکێش وسەرچڵ دەچێت کە ناتوانێت لە بەرامبەر نازو ئارەزوو ودەسەڵاتەکانی ژن، لە قۆناخێکی تازەدا رازی بێت ویاخی نەبێت، ئەوەش خۆی لەخۆی رەت کردنەوەی چەمک و زاراوە سواو و تازەکانی ناو کۆمەلگایەکی داخراوە کە لە سەر زمانی هاوارێکی شیعری بۆ ئازاد بوونی خۆی وئازاد بوونی کەسی هاوژیانیش پەنای بۆ دەباتەبەر، هاوکات ئەو هاوارە لە هاوارێکی کلاسیکیەوە دەچێتە قالبی سەنگەرێکی بەرگری تازەی رەگەزی نێر لە پیاوەتی خۆی وشتە تایبەتیەکانی خۆی…

 ئەوەەش شتێکی تازەمان پێ دەلێت کە پیاویش هەندێکجار دەبێتە قوربانی رەگەزی مێ ئەوەش بۆ خۆی کرانەوەی هەندێک دەرگا و لاچوونی دیوارەکانە، ئەو یاخی بوونانەش لەو کاتانەدا سەرهەڵدەدەن کە ژن و پیاو هاوشانی سێکس و منداڵ  و ماڵ دوو مەبەست و دوو حەزی رۆحانی بە پردێکی پێکەوەبەستوو هاوبەند و وابەستەیان ناکات، بەڵام لێرەدا لەو شیعرەدا هاواری ئەو زاتە لە پێناو وەرگرتنەوەی دەسەڵاتی قۆرغ کراو نیە، بەڵکو لە پێناو گێڕانەوەی ئازادیە تایبەتیەکان وخۆماڵی کردنی خودە بەر لەوەی یەک ئەوی دیکە لە خزمەت بەرژەوەندیەکانی خۆی بەکار بهێنێت، هەروەها دەرچوونە لە پاشکۆیەتی وقاڵبە قەتیسەکان، دیارە کەسێک کە لە سوڕانەوەی ناو بازنەو کایەکانی هەست ونەست و بە دونیایەکی رۆمانسی وئەدەبی وهزری خەریک بێت، جیاوازە لەگەل کەسێکی دیکە کە لەناو دونیایەکی ماددی وشتە بەرجەستەکان وەکو ماددەیەکی سادە دەجوڵێتەوە..

ماڵ وەکو پێگەو جێگەیەکی کۆمەڵایەتی، هەمیشە هەروەکو مەکۆیەکی حەوانەوەو دامرکانەوە بۆ پێداویستیە غەریزیەکان سەقامگیر نابێت، بەڵکو گەلێکجار دەبێتە پانتاییەک بۆ ساغ کردنەوەی ململانێی نێوان رکابەرەکان، لێرەدا لەو بابەتە ئەدەبیەدا ماڵ وەکو خەڵوەتگەیەکی رۆحی ومەست بوون بە رۆحانیەت دەردەکەوێت، هەمیشە ماڵ ئەو بەهەشتە ئازادە نیە کە تاکەکان بەر لە چوونە ناو ئەو ماڵە خەباتی بۆ دەکەن وهەولی بۆ دەدەن، بە تایبەتی لە کۆمەڵگا رۆژهەڵاتیەکان هەردوو رەگەز بە روانین ومەزەندەیەکی نامۆو سەیر لەو کایە کۆمەڵایەتیە سەرنج وڕوانینی خۆیان هەیە، لە روانگەی رەگەزی (مێ)دا هاوشانی ئەوەی بە دەوڵەتێکی کۆمەڵایەتی سەربەخۆی خۆی دەزانێت، هاوکات ماڵ ئەرک وخواستەکانی سێکس و وەچە هێنانی لێ دابین دەکرێت، هەروەها هەموو دەسەڵاتە داگیر کراو و هەستە مەییوو و نەزۆکەکانی خۆی لەوێ بە دەست دێنێتەوە…

 بەڵام رەگەزی (نێر) ماڵ بەو مەملەکەتەی خۆی دەزانێت کە تێیدا هەموو دەسەڵاتە باوکسالاریەکانی کە لە رابردوودا بە میرات بۆ ماوەتەوە خۆماڵی وتاپۆیان دەکات، هەروەها هەول دەدات لەوێش پیادەیان بکات ، هەمیشە نێر لە ماڵی خۆیدا لەزەت لە بریارو وفەرمانرەوایەتەکانی خۆی باشتر دەبینێتەوە زیاتر لە تامەکانی جەستەو سێکس، هەر کۆمەڵگایەکیش پێناسەیەکی تایبەتی خۆی هەیە بۆ ماڵ، پێناسەکانیس بە گوێرەی رەوتی پێشکەوتنت کۆمەلەکان دەگۆڕێن، بەڵام ماڵ جگە لەوەی گەیشتن ونزیک بوونەوەی دوو رەگەزە لەیەکتر، تەبا بوون و لەیەکتر گەیشتن وگونجانێکی رۆحی وجەستەییە تا ماڵێکی بەختەوەر دەستەبەر ببێت، بە هاتنی ماڵ کۆتایی بە تەنیایی ورەبەنی و خۆخواردنەوە نایێت، پرسیارەکە لێردەدا ئەوەیە ئەی ئەگەر لە مالێکی ئاوەدان مرۆ هەست بە تەنیایی وبێکەسی و خۆخواردنەوە بکات دەبێت ئەو کەسە چ بڕیارێک لە ژیانی خۆی بدات تا لە دوورەپەرێزی وتەنیایی رزگاری بێت..

ماڵ بە بێ ژن گۆڕستان وسەحرایەکی پڕ لە سەراب وکێلە، وڵاتێکی تاریکە، لەگەل هاتنی ژن هەموو ئەو شتانە دێن کە ماڵ خۆش دەکەن، چ لە بۆنی خۆش و رەنگی جوان و دەنگی تەڕو زادەی رۆح و لەزەت و خوانی بەتامیش، بەڵام ژنێک کە هەموو ئەو شتانەت پێ دەبەخشێت وهەول دەدات هۆشت داگیر بکات و هەست وئازادیت لێ زەوت بکات، هەموو شتیکت دەداتێ، خەونت لێ دەبات ودەستکاری خەونەکانت دەکات، ئەوە کارەساتە…

ژن دەتوانێت ماڵ ئاوەدان بکاتەوە و خەونیش دابێنێت بەڵام هەموو ژنێک ناتوانێت تاسەر ماڵێک بە خەون ئاوەدان بکاتەوە ئەو بۆ ئاوەدان کردنەوە کەرەستەی تایبەتی خۆی هەیە، لەو ماڵانەی خەون و بارانی خەیاڵ قودسیەت و بۆن و رەنگی تایبەتی خۆیان هەیە، ناکرێت ماڵ لە خەون خاڵی کەیت و بێ بەری کەیتەوە، چرایەک کە بە هاتنی موقەدەسی ژن ‌هەڵ دەبێت، ئەو سوتانە جوانە کە تاسەر ئەو قودسیەتی سوتانە لە بوژانەوەدا بێت، خەون تێیدا بۆن بکرێت، ئەو پیاوانەی هەمیشە خەو بە ژیانێکی ئارام و ماڵێکی ئاسوودەیی دەبیین، هەندێکجار رووبەرووی ماڵێک دەبنەوە کە گەلێک دوور بێت لە پێشهات و روانینەکانی رابردوویان..

ماڵی شاعیر چیە دیارە ماڵ لە لای ئەوەوە ماڵێکی ئاسایی نیە، دونیایەکی پڕ سیحری خەیاڵ وتەونێکی چڕوپڕی خەونی رەنگاورەنگە ئەگەر خەون لەو ماڵە دەربکرێ وخەیاڵیش باڵ و دەستەمۆ بکرێ، شتێک نامێنێت ناوی ماڵی ئەفسوناوی شاعیر بێت، چونکە ئەو کەسێکە ناتوانێت لە واقیعێکی ئاسایی خۆیدا بە ئاسایی بژیت، بەلکو ئەو لە ماڵێک دەگەڕێت پڕ بێت لە وێنەی پەپوولەو پەری ناسک ورەنگین، ئەوکاتەی ئەوانەش لە لای ئەو بۆن وجمەیان نامێنێت، ماڵە رۆمانسیەکەی شاعیر دائەروخێت و هیچ نامێنێتەوە، ئەو کاتیش هیچ شتێکی جوان وبەتام نامێنێت…

ماڵ و ژن دوو رووی یەک دراون، دوو تای یەک تەرازوون، هیچ یەکێکیان بە تەنیا هیچ نیەو هەردووکییشیان بەیەکەوە یەکتر تەواو دەکەن، ئەگەر ژن بە بێ ماڵ هیچ نەبێت، دیارە ماڵیش بە بێ ژن هیچ نابێت ، وەکو ماڵێکی بێ چراو بێ سۆپای ساردو تاریک دەبێت…

هەڵبژاردنی ئەو دوو دوانەیە، هەڵبژاردنێکی جوانە لە دوو توێی شیعرێکدا، وەکو شاعیرێک لە سەر فۆرمی دەسەڵاتی خواوەند دێت ورۆح بە جەستەی ئەو دوو فۆرم وچەمکانەدا دەکات، هەوەها ئەو دەیەوێت هەردوو چەمکی جمک لەیەکتر هەڵاوێرێت، بە لای ئەو ناکرێت لە ژن و لە ماڵ خۆشتر و جوانتر هەبێت، بەڵام لەوانیش ناسکتر و خۆشتر هەیە ئەویش خەونە، بەڵام ئەگەر چەمکی خەون لە نێوان هەردوو دوو چەمکە دوانەییەکە ئامادەگی نەبێت، ئەوا شاعیر دەلێت نەبوونیان باشترە لە هەبوونیان..

کەوابوو لەگەل ماڵ وژن دەبێت چەمکی دیکە دەرکەوێت تا چەمکەکانی دیکە جوانتر ببنەوەو تای تەرازووی هەست ونەستی شاعیریش رێک ببێت، ژنی بێ خەون و ماڵی خاڵی لە خەون بۆ کەسێکی پڕاوپڕ لە خەون ورۆمانسیەت وخەیاڵی تەڕ، ئەو تام ولەزەتەی ژنی خەیاڵ و ماڵی سەرتاپا یۆتۆپیای ئەو نادات..

ئەو دەزانێت ماڵ و ژن بۆ کەسێک لە ناو غوربەت وتەنیایی بێت، چ شتێکی بەهادارە بەڵام لەوان بەهادار تریش کە بەهای ئەو پڕ بەهاتر دەکات، خەونە، ئەو ناتوانێت دەست لە خەونەکانی هەلگرێت، نە خەونەکانیشی دەکاتە قوربانی هەریەکێک لەوان، ئەو دەیەوێت ژن بە خەون ئاوس بکات نەک بە منداڵ، ماڵ بە چلەرێحانێکی خەون عەترباران بکات تا هەمیشە ئەو ماڵە بۆنی ژن وخەونی لێ هەڵچێت…

ئەو لەوانەیە بتوانێت دەست لە ژن هەڵگرێت لە ماڵ هەڵگرێت، بەڵام هەرگیز ناتوانیت دەست لە خەونەکانی هەڵگرێت، ئەو لە ژنێکی بێخەون ناگەرێت، بەلکو لە ژنێک کە کۆشی پڕ بێت لەخەون…

ئەو ناتوانێت هەر ژنێک بێت وبیکاتە شاماڵی خۆی، ئەگەر خۆ ئەوەش نەکات لە دەرەوەی ماڵی خۆی، خۆ دەتوانێت لە ماڵی شیعرێکدا ژنێک بدۆزێتەوەو بیکاتە شاجوانی مەملەکەتەکەی ئەوەتا کاکە (هەندرێن) دەلێت :

ئەو ماڵەم بۆچیە 

کە تەنها جێگەی ژنێکی تیا ئەبتەوە ،

من ئەتوانم 

لە شعرێکدا

هەرچی ژنە کۆیکەمەوە..

 

ئاوس بوون وەکو پرۆسەیەکی رەگەزی نێر… 

ئەو لە ماڵێک ئەگەڕیت کە جێگەی هەموو ئەو شتانەی تێدا ببێتەوە کە بە دونیاو بینایی ئەوەوە ئاشنان نەک تەنیا ژنێک بێت وهەموو شتێکی لێ دەست بە سەر دابگرێت ونەهێڵیت لەو پەنجەرە چکۆڵانەی دڵیدا هەناسەیەکی تازە بێتە ژوورەوە..

ماڵ ئەو پانتاییەیە لە نێوان هەردوو رەگەزدا هەریەکە بە شێوەیەک هەول دەدات ئازادیەکانی ئەوی دیکە پشتگوێ بخات، هەریەکە بەر لەوەی بیر لە ئازادی ئەو دیکەی بەرامبەر بکاتەوە بیر لە ئازادیەکەی خۆی دەکاتەوە ، تا زووتر بێت دەستەبەری بکات وبیخاتە خزمەت رەوتی پیادەبوونی خۆی…

بۆیە بەدەم گلەییەوە دەلێت :

ئەو ماڵەم بۆچیە …

کە تەنیا جێگەی یەک کەس ویەک رەگەزو یەک ژن و یەک خەونی تێدا دەبێتەوە…ئەو دەتوانێت ئەگەر لە ماڵێکیش ئەو ماڵە نەدۆزێتەوە ئەوا لە شیعرێکدا دەیدۆزێتەوە، ئەوکات دەتوانێت چەندین ژنی دیکەش خڕ بکاتەوە، بەڵام لە راستیدا ئەو نە مەبەستی ئەوەیە و نە لە ئاوەزیدایە ئەوە بکات، بەڵام هەول دەدات ئازاد بێت و دەسەڵاتێکی خۆی بگەڕێنێتەوە کە خەونە..

ئەو ژنەی ماڵە لێناگەڕێت ئازادیەکانی خۆی پیادە بکات وچۆن خۆی دەیەوێت خەون ببینێت ،ئەو دەیەوێت ئەوە بێت کە ئەو بۆ خۆی بڕیاری داوە ژیانێکی جوان لەو ماڵە دروست بکات، نەک ئەو ماڵەی ئەو دەیەوێت کە کۆتایی بە خەونی جوان بێنێت، ئەوە جیاوازیە لە نێوان هەست و نەست وخولیا و حەزی جیاواز مرۆی جیاواز و دونیای جیاواز کە کەسایەتی جیاوازیش دروست دەکات، بەڵام مرۆش تا سەر ناتوانێت لە بن یەک بنمیچدا هەر بە جیاوازی بمێنێتەوە، دەبێت هەردوولا هەول بدەن ئەو پردە لێک دوورانە بدۆزنەوە تا شتەکانی یەکتر لە یەکتر نزیک بکەنەوە بەرەو رووی یەکیش هەنگاوی پەڕینەوە بدەن، ئەگەر نا گەیشتن بە ئاسوودەیی ستەم دەبێت، تا مالێکی خۆش و بۆنخۆش و جیاواز بهێننە کایەوە..

هەمیشە رەگەزی نێر هەول دەدات پەنجەرەکان لە سەر رەگەزی مێدا گاڵ بدات، تا هەناسەکەی نەگاتە ئەو دیو دونیای ئازادی ودەستەبەر کردنی کەسێتیەکی سەربەخۆ، بەلام لەو تێکستە رەگەزی مێ هەوڵ دەدات پەردە بەسەر ئەو پەنجەرەیە داداتەوە تا رووناکیەکی تر نەهێتە ژوورەوە، هەناسەی رەگەزی (نێر) لێرەوە تەسک دەکرێتەوە ئەوەتا دەلێت :

ژنی ماڵ 

هەر خەریکی پەردەپۆشینی پەنجەرەکان

لێم ناگەڕێ 

لە رووناکی رووتببمەوە

ئەو دەیەوێت لە رووناکیدا رووت ببێتەوەو نەک لە تاریکیدا، ئەوەش مانای ئەوەیە مەرج نیە هەموو نێرێک بیەوێت دەست بەسەر دونیای مێدا دابگرێت لەوانەیە رەگەزی (مێ)ش وەکو ئەو لە دەرفەتێکدا بیەوێ دەست بە سەر ئەودا بگرێت، نەگونجان وناتەبا بوونەکە لێردەدایە ئاسان نیە لە یەک ماڵدا دوو تای وەکو یەک بدۆزرێتەوە، رەگەزی نێر لێرەدا دەیەوێت باوەڕ بە ئازادی خۆی و ئازادی بەرامبەریش بێنێت، لەو دونیایەی ئەو کە لەسەر باوەڕ و مەزندەیێکی میسالی بونیات نراوە هاوشانی ئەو دەست پێ دەکات، بەڵام دیسان ناتەبا بوونێک لە روانین وهەڵبژاردن وبەکارهێنانی ئازادیەکان دێتە کایەوە…

ئەو دەیەوێت لە سێبەری بەژنی ژندا، بەژنی خەونەکانی خۆی ببینێتەوە وەکو پیاوێکی خەوندار، دیارە ژنیش خەونی خۆی هەیەو ئەویش دەیەوێ خەونە لەدەستچووەکانی خۆی لەو پانتاییە بەدەست بێنیت، بەلام پێ لێنانێکی ناسک وجوانە کە دەلێت :

چی لە بەژنی تۆ بکەم ئەی ژن

کە خەونێکی تیادا نەڕوێ

خەون بە لای ئەوەوە مەبەستی سەرەکیە نەک لەزەت لە بەژن وجەستەو ماڵێکی رۆتینی ودووبارە بووەوە..

 ئەوە کارەساتە رۆح ببێتە گۆڕستانی خەون وحەزەکان، ماڵیش ببێتە سەرابێکی بەردەوام، رۆح دەبێت ئازاد بێت وهەناسەی ئازاد بێتە ژوورەوە ئەگینا جەستەیەکی دیل و زیندان وزەلیل دروست دەبێت، با جەست ئازاد بێت بەڵام رۆحی نائازاد هەمیشە کارەساتێک بۆ جەستە دروست دەکات..

بەلای ئەو مرۆیە ناسادانە جەستە هەموو شتیک نیە، بەڵکو رۆح هەموو شتێکە ئەوانەی بە رۆح خەریکن ئەوەندە بیر لە کرانەوەی جەستەدا ناکەنەوە، بەڵام ناکرێت جەستەش فەرامۆش بکرێت، کەوابوو ئەو دوو رەگەزە چۆن دەتوانن هەریەکە بەیەکەوە رۆح وجەستەی یەکتر تێکەلاوی یەکتر بکەن، ئەوا دەبێت ئامانج ومەبەستی پیرۆزیان هەبێت، ئەگینا لە بڕی لەزەت وچێژی جەستە زیندانێکی جەستە دیتە کایەوە..

تۆ زیندانی خەونەکانی

لە باوەشی بەژنی رووتت

هەرچی خەونە نەزۆک ئەبێ

بەلای ئەوەوە ئاسانە گەڕان بە دوای جەستە، بەڵام ئەو دەیەوێت بە دوای رۆحدا بگەڕێت، ئەو نایەوێت جەستەیەک بدۆزێتەوە کە رۆحی داگیر بکات ئەو بە وەرگرتنی جەستەیەک نایەوێت رۆحی لە دەست بچێت، هەمیشە جەستە ئاسان دەدۆزرێتەوە، بەڵام هەر رۆحە دۆزینەوەی سادە و ئاسان نیە..

بەلای ئەوەوە ژیان هەر خوێندنەوە و لستنەوەی جەستە نیە رۆح دەبێت تێکەڵاو بکرێت و ئەو سەرپشک بێت لە هەڵبژاردنی خواستەکانی جەستە و ژن وماڵ، ئەو دەیەوێت بە رۆح یەکتر بخوێننەوە و بەرۆحی یەکتر ئاشنا ببن کە دەلێت :

منت بۆچیە و

تۆم بۆچیە

کە هەر لە تاریکی

لێوەکانمان ببنە دزی جەستە..

ئەو نایەوێت ئەو وەکو رەگەزێکی مێی باو خۆی تەنیا تەرخان بکات بۆ ماڵ و منداڵ ونانگە، ئەو دەیەوێت ئەو ئازاد بێت وخۆیشی ئازاد بکات ، بەڵام ئەو ئەو جۆرە ئازادیەی ناوێت کە وەکو ژنێکی سادە لەگەل ئەودا لە ماڵێک بژیت، ئەوەیە ناتەباییەکان، بەڵام ژیانیش بێ ناتەبا بوون نابێت، ژیان لێرەوە ناوەستێت دەبێت هەردوولا هەوڵبدەن جیهانەکانی خۆیان لێک دوور نەکەنەوە، تەنانەت ئەو بە هەموو شتێک رازیە تا دەگاتە رادەی ئاوس بوون و منداڵ هێنانە بەرهەمیش، تەنیا نایەوێت ئەو کەسێکی ئاسایی بێت وهەمیشە چاوەڕێ بکات یەکێک ئازادی پێ بدات وبریار لە بری ئەو بدات بۆیە دواجار لە دوا دێردا دەلێت :

تکایە ئەی ژن

ئەو هاوارە لە خۆت دەرکە

کە بۆ زایین هەلتگرتووە

گەر ناتوانی 

من ئامادەم

لە شوێنی تۆ ئاوس ببم

کۆرپەکانیشم 

بۆ

تۆ

ئاوس بوون شتێکی جوانە وجوانیش رۆحی کردۆتە بەر تا مانایەکی تەواو گونجاو بداتە دەست، بەراستی لە وەختی خۆیدا وشەکانی بەکارهێناوە وەسفێکی ناسکە و مانایەکی باشیش دەپێکێت، ئەو هۆنراوەیە لە هۆنراوە زیندووەکانە کە هەرگیز ناتوانیت فەرامۆشی بکەی، چونکە گوزارشت لە نموونەی ماڵێکی کوردی وباوی زۆری ناو کۆمەڵگا فرەوانەکەمان دەکات…

ماڵ شتێکی جوانە بە یەک کەس ئەو ماڵە جوان نابێت، دەبێت هەست بەیەکتر بکەین تا ماڵەکانمان جوانتر ببن…

چەند هەڵەیەکی نەزانراو یان پێ نەزانراو…

نازانم هەڵەی نوسەرە یاخود هەڵەی چاپە لەیەک دوو شوێندا ئەو هەڵانەم هاتوونەتە بەرچاو :

ئەو ماڵەم بۆچیە 

کە تەنها جێگەی ژنێکی تیا ئەبتەوە ،

باشتر وابوو ئەوها بێت :

ئەو ماڵەم بۆچیە 

کە تەنها جێگەی ژنێکی تیا ئەبێتەوە ،

هەروەها لە شوێنێکی دیکەدا هاتووە :

ژنی ماڵ 

هەر خەریکی پەردەپۆشینی پەنجەرەکان

باشتر وابوو ئەوها بنوسرابایە :

ژنی ماڵ ، 

هەر خەریکی پەردەپۆشینی پەنجەرەکانە…

هەروەها لە شوێنێکی دیکە پێم وایە ئەگەر بێت و دەستکاریەکی ئەوها لەگەل دێرەکە بکرابایە جوانیەکی دیکەی بە دێرەکە دەبەخشی :

چی لە بەژنی تۆ بکەم ئەی ژن 

کە خەونێکی تیادا نەڕوێ

کە بە لای من بەو شێوەیە تامێکی دیکەی دەدا دەست :

چی لە بەژنی تۆ بکەم ئەی ژن ، 

کە خەونێکی تیادا ناڕوێ….

 

سەرچاوە : یاخیبوونێک لە ژن- هۆنراوەی هەندرێن حەمەدەمین –رۆشنبیری- ساڵی ٢٠٠٥

 

 

 

شوان عوسمان-هۆلەندە

دێلفت ١١/٦/٢٠١٢

 

 

Previous
Next
This site is registered on wpml.org as a development site.