Skip to Content

Saturday, December 5th, 2020

‌هه‌ناسه‌دان……خولیا حسێن

Comment
by April 16, 2009 ئەدەب

‌هه‌ناسه‌دان
   خولیا حسێن
 

ته‌مه‌نێکی دوور و درێژ له‌ هه‌ڵمژینی هه‌ناسه‌ی بێ تۆیی،
فێریان کردم هه‌ست رابگرم له‌ نیعمه‌تی به‌رده‌وامبونی هه‌ناسه‌دان
بیرم کردووی ،
له‌ هه‌موو چرکه‌ و خوله‌ک و کات و شه‌و و ڕۆژه‌کانی دووریت،
خه‌مه‌کانیشت وه‌کوو بسکه‌ لووله خه‌نه‌ییه‌کانت له‌ قه‌د و باڵام ئاڵاوه.
دێمه‌وه ،‌ به‌ڵام ترسم له‌ دووباره‌بوونه‌وه‌ی ‌وێرده‌کانی ماڵئاوایی به‌قه‌د ترسی منداڵیمه‌ له‌ گۆچانه‌که‌ی ده‌ستی باوکم،
 که‌ هه‌تا ئێستاش  جار جار ده‌بێته‌ کابوسی سه‌رسینگی خه‌ونه‌ هه‌میشه‌ سه‌وزه‌کانی شه‌وانم .
من به‌ گومانم له‌ شیکردنه‌وه‌ ده‌روونیه‌کانی فرۆید ،
 له‌ بۆ چوونه‌کانی به‌رامبه‌ر خۆشه‌ویستی منداڵی مێینه‌ بۆ باوک و  هه‌ستی ناکۆکیشیان له‌گه‌ل دایکدا.
ئه‌وه‌تا من به‌ درێژایی ته‌مه‌نی منداڵیم،
 دوعای به‌یانیان و ئومێدی ئێواران و خه‌ونی هه‌موو شه‌و‌انم ئه‌وه‌ بوون که‌ شه‌یتانی شه‌ڕ نه‌یه‌ته‌ ماڵه‌که‌مان و هاواری باوکم ڕۆحی پڕ له‌ سۆزی دایکم زاره‌تره‌ک نه‌کا !
چرکه‌کان و خوله‌که‌کان و کاته‌کان و شه‌وه‌کان و ڕۆژه‌کانی دووریت ده‌ژمێرم
دێمه‌وه‌، تۆ پێڵاوه‌ پانی به‌رزه‌کانت له‌به‌رکه‌و منیش کراسه‌ وه‌نه‌وشه‌ییه‌که‌ی کچێنیم  ده‌پۆشم..
 به‌یه‌که‌وه‌ ده‌چینه‌ خوازبێنی کیژۆڵه بێخه‌وه‌ چاو به‌ فرمێسکه‌کانی  ‌چاوه‌ڕوانی ..
 تۆ به‌ سۆزی خۆشه‌ویستی خۆت و منیش به‌ گیڕانه‌وه‌ی داستانی عاشقه‌ نامراده‌کان،
 دڵی به‌ردی باوکایه‌تی نه‌رم ده‌که‌ین و 
نوشته‌ی هه‌موو جادوگاره‌کانی نێو سه‌رینی ژێر سه‌ری کوڕه‌ ئه‌وینداره‌کانیش به‌تاڵ ده‌که‌ینه‌وه‌.
 ئای چه‌ند خۆشه‌ که‌ دێمه‌وه‌
 به‌ بۆنی هه‌ناسه‌کانت 
هه‌موو ته‌مه‌نی به‌سه‌رچووم له‌ نۆژه‌ن ده‌گه‌ڕێته‌وه‌…
١٢/٤/٢٠٠٩

 

 

 

Previous
Next

Leave a Reply