– ئا .. ئا – …. نەوزاد شێردڵ
ئەووم .. بەخووا ئەووم ،
.. ئەو شەش حەرفە لەعنەتییە ، ناوی چییی بوو ؟ !
.. – ئینتیما – گەوهەری ، نێو سەدەفێ ..
.. ئەو گەوهەرە نەفیسەی ، دەنکەکانیان بۆ پاوانەی ..
پێی نۆبەرەی شابانوویەك ، هۆنییەوە و ،
.. سەدەفیشیان ، بۆ پاسەوانی قاپیەکەی ،
کردە تەپڵەکی .. جگەرە ،
……………..
.. ئێوە بیڵێن ، ناوی چییی بوو ؟ !
.. – یاغنیش – ە کەی ، نێو سەنگەران .. ئەو سەنگەرە لاستیکیانەی ، درووشمیان کردە دراو و ..
.. ئیرادەش بۆ ، پێو قەدەمی .. بە لما چزاوی پاییزە برا
.. برای هەر وەرزێ ڕنینی .. جووت جووت مەمکی ، ڕیزە گووندێ ، لە قووممەی دانووستانێکا ..
.. ناو نرا پرۆتۆکۆلی .. قۆنەرە ،
……………..
.. دەی ، کامەتان بە خەبەرە .. ناوی چییی بوو ؟ !
– نەوڕەس – ە ، ئاشتیی گێڕەکە .. نەوڕەسێ بووم .. کەنفت و شەکەت .. وەڕز لە قیژەی سەد بارەم ،
.. – سەربووردە – یەك فیغان و ، دیسان ڕیز بەستن ..
.. بۆ ڕەشبەڵەکی ئۆخەی نا .. حەیفتان نەکرد !!
.. منی ئیدمانی ، چادری سنوور .. پڕ شەق و ، تف .. لا کەوتەی گوێ .. ڕادیۆی – عەفوات – .. عەیشم لە پاڵ – ڕۆبن هود – ی ، هیلال سوورا .. مسۆگەرە ،
……………..
.. – زاکیرەی وێران .. ناوی چییی بوو ؟ !
.. – ئاهوورامەزدا – ، نا .. کاتی قاقا و قۆشمە نی یە .. ، عەیامێ ناوی .. حەرەکییم بوو ..
.. هێشتا حەکیم ، لە دوای شەڕی .. ئاشی – با – کان ..
.. نەنێژرابوو ، باڵا ڕەفیقانی سابلان .. لە پاڵ بزوورگ ئاتەشگادا ، لە سەر دەرپێ ی .. دایە – هافویا – یان نووسی ، ئێرە بۆ ئەربابی جزدان ، تاقە توونێلی مەفەڕە
…………….
.. دەی دەخیلم ، ناوی چییی بوو ؟!
– نووسەر – ێکی ، قەڵەم شەتەك .. شەووم مووشەدەمەی حەرف ، خەووم بستێ .. هەناسە دان ،
.. گەلێ درەخت ، لە ئاست نەسیمی بانکێکا ، چۆکیان دادا .. ، من دوای گێژەڵۆکەی مەنفاش ..
.. گەڕامەوە و .. هەر نەکەوتم ،
.. من .. !! .. – ئا .. ئا ، بیرم کەوتەوە – ..
.. ببوورن لە زمانی ، نیمچە گۆم .. لە سەری کاس و .. بێ خەووم .. ،
.. (( ئینتیما و یاغنیش و نەوڕەس ، .. سەربووردە و ئاهوورامەزدا و نووسەر .. )) ..
.. حەرفی یەکەمیان لێك بدەن ، ئەکەمە ئەو ..
…………….
.. !! ئەم کەلەپچە و ، سەدریە سپیە ..
ئەم ئامبووڵانس و شرینقەیە .. چین ؟ !!
.. هاوڕێ ی ئەفسەر .. ، هاوڕێ ی دوکتۆر !!..
.. ئەوە ناو و .. پاسپۆرتم .. ، ئەووم بەخووا ..
.. بەخوووا … ئەوووم ،
_______________
– نەوزاد شێردڵ –
