Skip to Content

Friday, March 29th, 2024
ئه‌رێ بێژن .. ماری باڵدار بۆکوێ فڕی

ئه‌رێ بێژن .. ماری باڵدار بۆکوێ فڕی

Closed
by January 8, 2009 ئەدەب

 
 ئه‌رێ بێژن .. ماری باڵدار بۆکوێ فڕی
 ئیسماعیل خورماڵی

 
 
 

 

خودایه‌ چلۆن شار‌ نابێ به‌ ژێر دۆوکه‌ی حووزنه‌وه
 که باڵ به‌ ماری چاڵه‌ ڕه‌ش به‌ن ، که‌ فڕین به‌ جرجی ناجنس به‌ن
 
 
 ئه‌رێ بێژن
 ئاخه‌ر ئه‌و بکووژی هه‌زاران بکووژه‌ ، وه‌ک پارووی تێگووشه‌ی مامراو
 قاپی سیحریی چ شایه‌ک خوساندی و دۆڵه‌ گه‌ده‌ی چ پادشایه‌ک قووتی دا
 ئه‌رێ بێژن
 ئه‌و دوپشکی ده‌وڵه‌ت ژاری بیابانه‌ ، وه‌ک که‌ستانه‌ی هه‌ڵبرژاوی سه‌ر ساج
 موغاری ده‌می چ ئاسمانێ لووشی دا و  له‌ مردن ژیانی پێ دا
 ئه‌رێ بێژن ، ئێوه‌ وخودا و مه‌لوتکه‌که‌ی باوه‌شی عوومه‌ری خاوه‌ر
 ئێوه‌ وخودا و  پایز و هه‌ڵه‌بجه‌ بێژن
 ئاخه‌ر  ئاخه‌ر  ، ئه‌و بکووژی هه‌زاران بکووژه‌ ، له‌و شاره‌دا
 له‌و قووله‌ی قافی شۆڕش و گییانبازییه‌دا
 ئه‌و به‌رماڵی چ سندیبادێ فڕاندی و
 ئه‌و له‌و ویسگه‌ی چاڵه‌ ڕه‌شه‌دا
 چ میترۆیه‌کی باڵدار هات و فڕاندی
 ئاخه‌ر  ، ئه‌و له‌ و ئاوه‌ چکۆڵه‌ی سه‌رچناره‌دا
 له‌و قه‌یاغی ته‌باره‌کی بابانه‌دا
 کام قه‌رسه‌نه‌ی ئاو فڕاندی
 ئاخه‌ر ئه‌و  چه‌قه‌ڵ ئۆمه‌ته‌
 له‌ ته‌ڵه‌ی ڕه‌هۆڵی ئه‌و پیره‌ به‌روووه‌دا
 کێ بوو به‌ خدری زینده‌ و
 کێ  ، له‌ سه‌ر پشتی ئه‌سپی با و بۆران فڕاندی و
 بۆ ڕای خوا ،  بۆ ڕای ئاشتبوونه‌وه‌ی گوورگ و قه‌ومی ته‌یران
 خۆش نییه‌تی نوان
 ئه‌رێ بێژن ، ئاخه‌ر ئه‌و خرسی ناجنسه‌
 نووته‌کی بووخورداوی ژێرچارۆگه‌ی کام جادوو باز
 وه‌ک شه‌وه‌ له‌ فه‌قیانه‌ی ڕۆژدا وونی کرد
 ئێوه‌ بن و خودا بێژن ، کوێوه‌ ڕۆی
 نه‌ قووبه‌ی گومه‌زی مزگه‌وت بوو  خودا خۆی  ، له‌ نوور و له‌ هه‌ڵمی فه‌جرێکدا
 له‌سه‌یری پڕته‌ماعی کوفار وه‌یشارێ
 نه‌ ڕیشۆڵه‌ی ئێواره‌ به‌ورێکی شار بوو
 به‌ڵه‌د و به‌ڵه‌د و به‌ڵه‌د بفڕێ و بڕوا
 نه‌ڕه‌نگی کاڵه‌ ڕه‌نگی په‌نجه‌ره‌یه‌کی شاره‌زوور بوو
 له‌باران و له‌ هه‌تاویکی سووردا کاڵ هه‌ڵێ و بڕوا
 نه‌ تفه‌نگی شانی شێخی شه‌هیدان‌ بوو
 شه‌وێ له‌ ماڵی سپڵه‌ پییاوان باو بڕوا
 قه‌زا و به‌ڵا
 نه‌ ئه‌ستێره‌ی داخزاوی ناو ستیانی چه‌م و ئاو بوو
 له ‌ده‌س په‌نجه‌ی به‌رد هه‌ڵبێ و بکشێته‌وه‌ ژوور
 ئه‌ر بێژن
 ئه‌و ماری هه‌زار ماری قه‌ومی حه‌جاجه‌ ، بۆ کوێ ڕۆیی
 ئه‌و تیمساحی زۆنگاوی خه‌رده‌لستانه‌  ، بۆکوێ ڕۆیی
 ئه‌رێ بێژن
 له‌ ژێر لێفه‌ی کامه‌ باخدا ،
 په‌پکه‌ ماریان به‌ گوڵ کرد و بردییان
 ئه‌رێ بێژن
 له‌سه‌ر سووچی کامه‌ په‌ڵه‌ په‌مووی پاساوه‌وه‌
 جرجی دۆوکه‌ستانیان به‌ عه‌ینه‌ مه‌ل کرد و بردییان
 ئه‌رێ بێژن
 به‌ناوی کام مه‌حسوومترین مه‌خلووقه‌وه‌
 حه‌ربایه‌ی سه‌ر قێزه‌ونترین داریان ، به‌ زێباترین په‌روانه‌ کرد و بردیان
 بێ ئه‌وه‌ی شیعرێ له‌ جاڕی شاره‌ حووزن بخوێننه‌وه‌
 بێ ئه‌وه‌ی چاوێ به‌ چاوی هه‌ڵه‌بجه‌دا هه‌ڵبێننه‌وه‌
 جه‌خار و جه‌خار و جه‌خار ، هه‌ڵه‌بجه‌که‌م
 بێ پایان به‌ پا برد و بێ باڵیان به‌ باڵ فڕان
 جه‌خار و جه‌خار و جه‌خار ، هه‌ڵه‌بجه‌که‌م
 له‌شه‌نس و تالیعی تۆدا ماریش ده‌فڕێ
 
 2009 / ئه‌ڵمانیا
 
 
 
 
 
 
 
 
 
 
 
 
 
 
 
 
 
 
 
 
 
 
 

Previous
Next
This site is registered on wpml.org as a development site.