Skip to Content

Friday, March 29th, 2024
بنیاتنانی دەوڵەت  و ناسیۆنالیزمە نەوتییەکەی پارتیی …1

بنیاتنانی دەوڵەت و ناسیۆنالیزمە نەوتییەکەی پارتیی …1

Closed
by December 27, 2013 گشتی

 

 

بەشی یەکەم: 

ناسیۆنالیزمی نەوتیی   Oil Nationalism   یان ناسیۆنالیزمی پێترۆڵیی( Petroleum Nationalism )، سەرهەڵدانەکەی دەگەڕێتەوە بۆ سەردەمی بەڵشەفیکەکان دژی ساریزمەکان(tsarism- القيصرية) ، هەروەها لەساڵانی ١٩٣٦ و ١٩٣٧ دا لە وڵاتانی بۆلیڤیا و مەکسیکۆ، ئەم ناسیۆنالیزمی نەوتە، برەوی پەیدا کردووە.  دواتر ئێرانی گرتەوەو  محەمەد موسەدەق رابەرایەتیی دەکرد و هەر زووش، بە کوودەتایەک، لەلایەن کۆمپانیاکانی  ئەنگلۆسکانییەوە لەکار خرا. بۆ کەیسی عێراق، ئەمجۆرە ناسیۆنالیزمە پەڕپوتە قەومییە لەسەردەمی بەعسییەکاندا بەناوی خۆماڵییکردنی  nationalising   نەوتەوە ،عێراقی بەرەو شەڕو کارەسات و قاتوقڕیی بردووە، ئاشبەتاڵەکەی ئەیلولیش، کاردانەوەی سەرەڕۆییی ناسیۆنالیزمە عروبییەکەی بەعس و دابەشکردنەوەی دەستکەوتەکان ، لەنێوان پانعەرەبیزم و پانئێرانییەکەی شاهەنشا ئاریامێردا، بوو. 

هەنووکە، پارتیی دیموکراتی کوردستان، لەهەرێمی کوردستانی عێراقدا، خۆی کێشاوەتەوە، ناسیۆنالیزمی نەوتیی و  ناسیۆنالیزمی سامانیی، یان ناسیۆنالیزمی سەرچاوە سروشتییەکانی resource nationalism  تێکەڵکردووە و هزر و عەقڵ و بیرکردنەوەی هەندێ حیزب و ئەکادیمیست و رۆشنبیر و سیاسیی و نوخبەی گیرفانی، بە پارە و بەرتیل و ئیغرائاتی ماددیی، لەدەوری  خۆی کۆکردووەتەوەو سەرمایەگوزاریی سیمبۆڵیی و سیاسیی و ئابووریی لەسەر دەکات. ناسیۆنالیزمی سامانی سروشتیی، لە ئەمێریکای لاتینەوە سەری هەڵدا و بەناوی خۆماڵییکردن و بەکاربردنی نەوت و مەعدەنەکانی ژێرخاک، بۆ بەگەڕخستن، لەپێناوی بزوتنەوەی نەتەوایەتیی ئەو وڵاتانە، دژ بە کۆڵۆنیالیزمی ئەو سەردەمە، برەوی پەیدا کرد.  پڕیشکەکەی گەیشتە وڵاتانی کەنداوی فارس، بەتایبەتییش ئێران و عێراق و کوەیتی گرتەوە. لەسەرەتای ساڵانی دوو هەزاریشەوە، ئەمجۆرە ناسیۆنالیزمە کازاخستانیشی گرتەوە. 

 

چەند ساڵێکە، پارتیی دیموکراتی کوردستانیشی گرتووەتەوە و دەوڵەتی کوردیی! دروست دەکات.  لە چەند ساڵی رابردوودا، پارتیی، توانایەکی ماددیی و مەعنەویی زۆری، لە کەمپەینی نەوت ناردنە دەرەوەی هەرێمی کوردستاندا بۆ تورکیە خەرجکردووە و دەوڵەتی تورکیەش زۆر بەپەرۆشە ، بۆئەوەی ئەم بازرگانییە، لای کەم لە کورتمەودادا(  Short term) سەربگرێت. ئەمجۆرە ناسیۆنالیزمەی پارتیی، دەکرێ بە ناسیۆنالیزمی فەرمان زل writ-large بچوێندرێ، فەرمان و گوتاری زل، بۆ شەقام  دەدات، بەڵام لەبەرامبەر تورکیە و ئێران و ئەمێریکادا، جوقەی لێوە نایات و فەرمانەکانی ئەوان وەک خۆی جێبەجێ دەکات.

 

 لە ئاستی کەیسی کەرکوک و نەوت و سەربەخۆیی کوردستاندا، بەدەم و بە میدیا سێبەر و ژۆرناڵیستە زار قەرەباڵغەکانی، بەو ئەکادیمیستە بێفیکرانەی بەپارە کڕیونی،  هیچی نەهێشتووەتەوە، کەچیی بەکردەوە، جگە لەنەوتەکە، کاری بەوانی تر نییە. ئەگەر بۆ تەخدیرکردن وگەلحۆکردنی شەقامی کوردیی نەبێت، هەر کاری بەسەر بە کەرکوک و ناوچە کێشەلەسەرەکانەوە نییە. لە جەوی شاعیرانەدا، بەناوچە کوردستانییەکانی دەرەوەی هەرێمی! دەچوێنێ، بەڵام بەکردەوە، کار بۆ ئەوە دەکات، بۆ ئەبەد کەرکوک لەدەرەوەی زۆنی هەرێمی کوردستان بێت. هۆکاری سەرەکیی ئەوەیە،  لەهەموو ئەگەرێکی گەڕانەوەی کەرکوکدا، پارتیی لە سویچی سەرەکییەوە دەکوژێتەوە، واتە لەهەر هەڵبژاردنێکدا ئەگەر بەڕێژەی %٧٠ یش، ساختەکاریی لە دهۆک و هەولێردا بکات، ناتوانێ باڵانسی دەنگەکانی گەرمیان و سلێمانیی و کەرکوک راست بکاتەوە.  

 

هەرچەندە  بنیاتنانی دەوڵەتی نەتەوەیی nation state  بەو کرایتێریا کلاسیکییانەی رابردوو، هەیبەتی سیاسیی و ئەکادیمیی خۆی لەدەستداوە، بەڵام وەک تێرمە ترادیسیۆنییەکە، پارتیی، تەوزیفی ئەم تیۆرییە لە کوردایەتیی و دەوڵەتی کوردیی و حکومەتی کوردیی و…تاد دەکات، بۆ گەمژاندن و گەلۆرکردن و ئەحمەقکردنی رای گشتیی کورد،  کەمپەینێکی سیمبۆڵیی گەورەی میدیایی و هاتوهاواری سیاسیی لەسەر هەناردەکردن و بەتاڵانییبردنی نەوت، دەستپێکردووە. لەڕاستییدا، دەوڵەتی کوردیی بەمانا سیاسییەکەی بۆ باکگراوند و ئێسنیکی کورد( بەتەنیا) زیان لە سومعەت و کەرامەت و هەژموونی سیاسیی و نەتەوەیی ( تەنانەت نیشتمانییش) ” کورد” دەدات. باشترە و عەقڵانییترە، کە دەوڵەتێکی نیشتمانیی بێت لەهەر پارچەیەکی کوردستاندا، چونکە هیچ دەوڵەتێک لەهیچ پارچەیەکی کوردستاندا دروست نابێت، تەنیا و تەنیا کورد وەک ئێسنیک پێکهێنەری سەرەکیی بێت. 

لە ئێستادا، هەرێمی کوردستانی عێراق و کوردستانی سوریە، لەم ئەگەرە سیاسییەوە نزیکن، بەدڵنیاییەوە، عەرەب و تورکمان و مەسیحیی و موسڵمانی شیعە و سوننە و ئایینەکانی تر و بێدینەکان و …تاد تێدەکەوێت، پێکهاتەیەکی چوونیەک(  هۆمەجینیەس- homogeneous) ی  ئێسنیکیی و نەتەوەیی و ئایینیی  نابێت بەڵکو پێکهاتەیەکی هەمەجۆر( هێترۆجینیەس heterogeneous )ی دەبێت. بەمپێیە، دەوڵەتێکی کوردستانیی بە مەغزای نیشتمانیی، نەک نەتەوەیی، گرینگتر، عەقڵانییتر، سیاسییتر و دیپلۆماسییترە، بەڵام پارتیی بە ئەنقەست، بانگەوازی دەوڵەتی کوردیی ! و “ئەی رەقیب”ی نەتەوەیی و سیمبۆڵیزمی بارزانیی  دەکات و غار بەئەسپی تەروادەی کوردایەتیی و بارزانیی ! دەدات، بۆ ئەوەی عاتیفەی سیاسیی و نەتەوەیی  چین و توێژەکانی گەلی کورد لەهەرێم و پارچەکانی تریشدا کەم تا زۆر بورووژێنێت

 

بزوتنەوەی سیاسیی و نەتەوەیی کورد، لە زۆر قۆناغدا، مامەڵەی حەکیمانەی لەگەڵ چەمکە سیاسیی و فیکریی و جیۆگرافییەکاندا کردووە، زۆر کەمتر، حەماسی نەتەوەیی رادیکاڵانەی بەسەردا زاڵبووە. پارتیی خۆی یەکێکە لەو حیزبانەی میتۆدی خۆگونجاندن و پێکەوەژیانی لەگەڵ گەلانی ناوچەکەو پێکهاتە جیاوازەکاندا هەڵبژاردووە، بەڵام لەهەنووکەدا، بەهۆی سەرگەرمبوونی بە دۆسیەی نەوت، ئاخنینی بانکەکانی هەندێ لە بارزانییە دەستڕۆیشتووەکانی ناو حیزبەکەی، خەریکی بوژاندنەوە و ئاودێرکردنی جۆرێک لە ناسیۆنالیزمە ( ناسیۆنالیزمی سامانی سروشتیی) کە ئەگەر بە وریایی و عەقڵانیی و ژیرانە مامەڵەی وردی لەگەڵدا نەکرێ، کارەساتی نەتەوەیی و نیشتمانیی بۆ هەرێمی کوردستان و پارچەکانی تری کوردستان و ناوچەکەش لێدەکەوێتەوە. 

ئەگەر لەڕووی فیکریی و سیاسییەوە، زۆر دوور، سەیری پرۆژەی نەوت نەکرێ، کورد بەرەو ئاشبەتاڵی تر دەباتەوە و شەڕی بەوەکالەتیش لەنێوان پارچەکانی کوردستاندا روو دەدات. پارتیی لەسەر مەلەفی نەوت و بۆ دڵدانەوەی تورکیە، ئامادەیە، گەڕێکی تر بە پەکەکە بفرۆشێ و شەڕێکی ماڵوێرانکەری تر لەناوچەکەدا دروست بکات. دروستکردنی حیزبێکی پرۆکسیی، بە کۆمەڵێ مورتەزیقەی کورد لە کوردستانی تورکیە، دژ بە پەکەکە، یەکەمین هەنگاوی شەڕانگێزانە و هەژموونییانەی پارتییە، دژ بە هەر رەقبێکێ تر( دیارە تەنیا دژ بە کورد). شەڕی پارتییش بەرامبەر پەیەدە و ساڵح موسلیم، لەچوارچێوەی ئەجێندایەکی تایەفیی و هەژموونی حیزبیی خۆیدایە، وێڕای ئەوەی موخابەراتی تورکیی راستەوخۆ سەرپەرشتیی ئەو حەماسە نانەتەوەییەی پارتیی دەکات. 

 

پارتیی، بەجۆرێک ناسیۆنالیزمی کوردیی، لەخەیاڵدان و جوعبەی سیاسیی و ئایدیۆلۆژیی خۆیدا  بچووککردووەتەوە،  کە دەکرێ بە مایکرۆناسیۆنالیزم*** ( Micronaitionalism ) بچوێندرێ و  تەنیا لە شیرینییە تاڵانییەکەی بۆڕییەکانی نەوت و گازدا دەیانبینێتەوە.  نەتەوە، گەل، تیرە و هۆزەکانی کورد، بەرەباب و تەریقەکان، یان هەرشتێکی پێ بگوترێ، پارتیی بۆ ئاستی مایکرۆناسیۆنالیزم، خواستە سیاسیی و کولتوورییەکانی کوردی  دابەزاندووە. ئەم حیزبە، هەموو پایە سەرەکییەکانی بنیاتنانی دەوڵەتی نەتەوەیی، یان دەوڵەتێکی نیشتمانیی، لە گرێبەستەکانی نێچیرڤان بارزانیی و ئاشتی هەورامیی و رێنماییەکانی مەسعود بارزانیی و پلانە جەهەنمییەکانی دەوڵەتی تورکیەو میتی تورکیەدا  دەبینێتەوە. ئەم هەڵپانەی پارتیی بۆ دەرهێنانی نەوتی هەرێمی کوردستان و هەڕاجکردنی بە کۆمپانیا نێونەتەوەیی و تورکییەکان و وەرگرتنی ئەوەی پێی دەگوترێ شیرینیی،  کە بە تەنیا بۆ دەستڕۆیشتووترین کەسانی ناو بنەماڵەی بارزانیی دەڕوات و تەنانەت پارتییش وەک حیزب، هیچ  ئاگایەکی لێی نییە. 

لەسەرەتای چەرخی رابردوودا، وڵاتانی وەک ئێران و عێراق و سعودییە و کوەیت، کە نەوتیان تێدا دۆزرایەوە، بەهۆی نەبوونی مەعریفەی تەکنیکیی و زانستییەوە، بەهۆی هەژاریی و کەم تەوەقوعیی دەوڵەتەکانەوە، بەهەڕاج نەوتەکانیان بە کۆمپانیا زەبەلاحە جیهانییەکان دەدا و بەشێکی زۆر کەمی بۆ ئەو وڵاتانە دەبوو، کە نەوتەکەیان لێ دەردەهێنرا. پاش پتر لە سەت ساڵی رەبەق، پارتیی و بەدیاریکراویش، ماڵی بارزانیی، دەیانەوێ هەرێمی کوردستانی عێراق بەو قۆناغانەدا بەرن،کە ئەو وڵاتانە دادەچۆڕێنران.  تەنیا جیاوازییەک هەبێ، ئەوەیە، لە ئاستی شەعبییدا، بانگەوازیی خۆماڵییکردن Nationalisation  دەکات و لەئاستی سیاسیی و ئابوورییشدا، بەشێکی زۆر کەمی ئەو دەرامەتە بۆ دەسەڵاتی کوردیی و  پارتیی دیموکرات( ماڵی بارزانیی)  دەبێ و نە پارلەمان و نە تەنانەت یەکێتیی، هاوپەیمانی پارتییش نازانن، داهاتەکانی نەوت بۆ کوێ سەری لووتی خۆی رەش دەکات و سەرهەڵدەگرێ.  

 

ئەم ناسیۆنالیزمە نەوتییەی پارتیی، ئەم ناسیۆنالیزمەی لەسەر سامانی سروشتیی هەرێمی کوردستان، خەریکی کەمپەینی دەرکردن و هەناردەکردنی غاز و نەوتە، ئەگەر رێگریی لە حەماسی پارتیی و تموحی چاوچنۆکانەی بنەماڵەی بارزانیی نەکرێ، ئەم پرۆژە خێزانییەیان لەدەست دەرنەهێنرێ و لەڕێگەی پارلەمانەوە شەفاف  نەکرێ و داهاتەکانی ١٠٠% ئاشکرا  نەکرێن و بۆ رای گشتیی روون نەکرێنەوە، بەدڵنیاییەوە، تارماییەکی دێز بەسەر هەرێمی کوردستان و ئاییندە سیاسییەکەیدا دەگەڕێ. ئەم نەوتە هەر موڵکی ماڵباتی بارزانیی نییە، بە ئارەزووی خۆیان، لەگەڵ دەوڵەتی مێنتاڵ کەمالیستی تورکیەدا تاڵانی بکەن و قازانجەکەیشی تەنیا بۆ یەک دوو بنەماڵەی سیاسیی بڕوات. خەڵکی گەرمیان و هەڵەبجە و سلێمانیی و کەرکوک و رانیە و هەولێر ئاکرێ و زاخۆ و ناوچەکانی دەوربەریان، قوربانییان داوە، کورد، ژارباران کراو ئەنفالکرا، بۆ ئەوە نەبوو کە تەنیا دوو بنەماڵەی لۆردی سیاسیی، داهاتە ماددییەکەی بە پارەی کاش بۆ خۆیان بەرن. دیارە یەکێتیی بە  یەک لەسەر دەی  ئەو داهاتەی بەر پارتیی دەکەوێ، هەر کڕە دەکات. 

 

بنیاتنانی دەوڵەتێکی وەهمیی، بۆ هەرێمی ئێستای کوردستان، بەبێ کەرکوک، کارێکە تەنانەت تورکیە ئامادەیە پشتیوانییشی بکات، چونکە دەوڵەتێکی بەکرێگیراوی لەم چەشنە، کە سوکانەکەی بەدەستی حیزب و بنەماڵەیەکی نەوتیی و کۆمەڵی ئەمیری کوردییەوە بێت، نەوتەکەش بەدەروازەی تورکیەدا بڕوات، هەمیشە، رۆڵی پرۆکسی دەگێڕێ و هەرکاتێک تورکیە ویستی، دژ بەهەر پارچەیەکی تری کوردستان بەکاری دەهێنێ، سەری سولەیمانی موعینییەکان ولاشەی  د.شڤانەکان رادەستی ئێران و تورکیە دەکرێتەوە. هەروەک  ئەوەی ئێستا، پارتیی بەرامبەر بە کوردەکانی سوریە و پرۆژە سیاسییەکانی کوردانی ئەو پارچەیە، بە ویستی تورکیە، دەیکات. تەنانەت ئامادەیە، لەژێر زەبری کۆنتراکتە نەوتییەکاندا، هاوکاریی هێزێکی تێرۆریستی وەک “داعش”یش بکات، دژ بە کوردەکان سوریە و لەولاشەوە، قەشمەریاتی نەتەوەیی لەو چەشنە بفرۆشێتەوە، کە دژایەتی رژێمەکەی ئەسەد دەکات. 

  هەرێمی کوردستان دەتوانێ بە بڕی ١٧%ی بودجەی عێراق و کەمێک جددیبوون لەسەر پرسی کەرکوک، دابینکردنی لای کەمی عەدالەتی کۆمەڵایەتیی و ئاساییشی کۆمەڵایەتیی، دێمۆکراتیزەی دامودەسگا سیاسیی و ئیدارییەکان، بە نیشتمانییکردنی میلیشیای “پێشمەرگە”  و پێکهێنانی سوپای نیزامیی و نیشتمانیی و پارلەمانی نیشتمانیی و سەقامگیریی نیشتمانیی، پەروەردە و خوێندن و ساغکردنەوەی زمانی نیشتمانیی، بوژاندنەوەی بوارە ژیارییەکانی هەرێمی کوردستان، لەسەروو هەموویشیانەوە رێگەگرتن لە ساختەکارییەکانی پاریی لە هەڵبژاردندا،  بناغەی دامەزراندنی دەوڵەت چێبکرێ و نەوتەکەی هەرێمی کوردستانیش زۆرینەی لەژێر خاکدا بمێنێتەوە.  لە داهاتوویەکی نزیک یان دووردا بۆ نەوەکانی داهاتوو کەڵکی تەواوەتی لێوەربگیردرێ. بە زمانی خۆماڵیی و کوردیی،  لەنەوتی بەشەکانی تری عێراقدا بەشدار ببە و ، نەوتەکەی خۆیشت کەمترین بەشی لێ دەربهێنە و پایەکانی دەوڵەتێکی مۆدێرن و دێمۆکراتیی بچەقێنە. بە ناسۆرەوە، ئەم ناسیۆنالیزمە نەوتییەی پارتیی، ئەو وشکە کەڵەکەیش ( بنیاتینانی دەوڵەت) دەڕوخێنێت، کە جۆرێک لە رای گشتیی، لەسەری مۆبەڵایز بووە. 

 

لەبەشی دووەمی ئەم وتارەدا، باسی ئەوە دەکەم، کە بزوتنەوەی’گۆڕان”، خەریکە خۆی دەخاتە گەرووی ئەم زالووەوە( ناسیۆنالیزمی سامانی سروشتیی) و خزمەت بە ئەجێندا تایەفییەکانی پارتیی  دەکات. 

***

مایکرۆناسیۆنالیزم، تێرمێکی نوێیە، لە چەند دەیەی رابردوودا هاتووەتە ناو ئەدەبی سیاسیی و ئارگیومێنتە فیکرییەکانی ئایدیۆلۆژیای ناسیۆنالیزمەوە. وەک دەربڕێنێکی نوێ( نیۆلۆجیزم – neologism )، بە پێویستمزانی بۆ خوێنەرانی روون بکەمەوە. مایکرۆنەتەوەکان micronations بەوانە دەگوترێ، کە گرووپ و نەتەوە و ئێسنیکی بچووک و دابڕاو و دوورەپەرێزن لەیەکترییەوە. دیارە هەموو داواکارییەکانی ئەمجۆرە گرووپ و رێکخراوانە،  لە ئاستانەی بچووکدایە smaller scale  و زیاتر خۆیان بە ئاڵاو سروود و سامان و غرور و سیمبۆڵی( نەتەوەییەوە) خەریک دەکەن و لە ئاستی بەرین و گشتگیردا خۆیان دەدزنەوە، یان بێتاقەت خۆیان نیشان دەدەن.

 

زۆر لێکدانەوەی جیاواز هەیە لەسەر مایکرۆناسیۆنالیزم، لە ئاستی هەرێمی کوردستان و کوردانی تاراوگەدا، دەکرێ بەو کوردە نەتەوەیی و تاک و گرووپانە بگوترێ، کە بێکارن و لەدەست ناعەدالەتیی کۆمەڵایەتیی دەسەڵاتی کوردیی و حیزبی کوردیی، بە گاڵە هاتوون، هەست دەکەن، کادیرە حیزبییەکان، تواناکانی ئەمانە بە ئەنقەست نادیدە دەگرن، لەڕێی قاوەخانەکان و میدیای کۆمەڵایەتیی ( سۆشیاڵ میدیا) و کۆڕوکۆبوونەوەکانی خۆیاندا، خەریکی کڕوزانەوەی نەتەوەیین و ناسیۆنالیزم لە باڵای سیاسییەکان دەکەنەوە، چونکە بە ناسیۆنالیستیان نازانن و خۆیان وەک گرووپی بچووک بچووک، بەنوێنەری راستەقینەی ناسیۆنالیزم دەزانن، بەڵام هێز و تواناو مۆتیڤە سیاسیی و کولتوورییەکانیان سنووردارە. 

پێکەوەگرێدانی ئەم تێرمە( مایکرۆناسیۆنالیزم) بە پارتییەوە لەبەر ئەم هۆیانەی خوارەوەیە.

1- پارتیی هەندێ نووسەر و رۆشنبیر و ئەکادیمیستی نەتەوەیی و حیزبی پرۆکسی و ژۆرناڵیست و سیاسیی   لاکەوتەی، لەناوخۆی هەرێمی کوردستان و پارچەکانی تری کوردستان و هەندەران، تەجنید(recruiter  )کردووە،  بۆ ئەوەی جاروبار، ژیلەمۆی کەمپەینی نەتەوەییبوون و ناسیۆنالیزمەکەی پارتیی بگەشێننەوە.

 

2- لەئاستی پارچەکانی کوردستاندا، هەندێ حیزب و کەسایەتیی سیاسیی کڕیوە و کار لەسەر بەسیمبۆڵییکردنی بارزانیی و ناساندنی ئاڵای هەرێمی کوردستان وەک ئاڵای  هەموو کوردستان دەکەن و هەموویان،  جگە لەوەی بەکرێگیراون، لەهەموو رۆحێکی نەتەوەییش داشۆراون. 

3- لە هەندەرانیش، واتە لەناو کوردانی تاراوگە( دایاسپۆرا) دا، هەندێ لەو گەنجانەی کە پارتیی، خۆی  دەیانێرێتە وڵاتانی رۆژئاوا، بۆ خوێندن، لەگەڵ هەندێ لەوانەی دیراساتی مرۆیی و نێونەتەوەیی ( Humanitarian and International studies   ) دەخوێنن و بە  ماستەر و دۆکترا، خۆیان تەیار دەکەن، بەڵام چونکە تەوەزەلن و خوێندنەکانیان کرێدتی نییە و زۆربەیان بێئیشن و توانای دابینکردنی بژێویی خۆیان نییە، پارتیی زۆر بەئاسانیی، بە پارەیەکی زۆر کەم دەیانکڕێ و  لۆبییان بۆ پرۆژە نەوتییەکان و خەیاڵە نەوتیی و نەتەوەییەکانی پێدەکات و چۆنی بوێت، وایان هەڵدەسوڕێنێت.

4- لەڕێی بەرتیلدان و پارەی کاش و  دانی دیاریی بەنرخ و زێڕ و خشڵ، بەهەندێ سیاسیی تەقاعود و هەندێ ئەکادیمیستی رۆژئاوا، پارتیی توانیویەتیی کەم تا زۆر دەنگێکی نەتەوەیی بە باڵای خۆیدا ببڕێ و دەیان وتار و توێژینەوە، بەهۆی  ئیغرائاتی ماددییەوە، بۆ  هەژموونی ئەعلامیی پارتیی، بە زمانە بیانییەکان نووسراون.  

 

کامیار سابیر

Previous
Next
This site is registered on wpml.org as a development site.