Skip to Content

Thursday, March 28th, 2024
بۆ بەرژەوەندى گشتى

بۆ بەرژەوەندى گشتى

Closed
by September 24, 2008 گشتی

 بۆ بەرژەوەندى گشتى
 سمكۆ عەبدولكەریم

 هەر لە بەرپرسێكى گەورەوە بگرە تا دەگاتە بەرپرسێكى بچووك ، ئاوڕێك ناداتەوە ئەگەر بەرژەوەندى گشتى تێدا نەبىَ ، نوكى قەڵەمى لێنادات ئەگەر بۆ بەرژەوەندى هەموو لایەك نەبىَ ، هەر داشێك بجولێنىَ  ئەبىَ بۆ بەرژەوەندى گشتى بێت .
 ئەوىَ رۆژىَ برادرێكى دەرچووى ئامادەیى پیشەیى بۆ بەرژەوەندى گشتى بۆ یەكەم جار دامەزێندراو دواتر مۆلەتێكى خوێندنى وەرگرتوو  نێردرایە زانكۆ ، هەركە زانكۆى تەواوكرد یەكسەر بە قودرەتى قادر 20 ساڵ خەباتى پێشمەرگایەتى و 10 ساڵ خەباتى رۆژنامەنووسى هێنایەوە بووە خاوەنى 30 ساڵ خزمەتى بىَ غەل و غەش و بڕوانامەى بەكالۆریوس ،حكومەتی هەرێمیش بۆ بەرژەوەندى گشتى یەكسەرئەو كەسەى لە فەرمانبەرێكى ئاساییەوە كردە (معاون مدیر عام) .
 لەوە گەڕىَ بەشێك لەو  برادەرانەى لە ئەوروپا بە ناوى ئەوەى بۆ بەرژەوەندى گشتى بە یەكجارى دەگەڕێنەوە كوردستان ، كەچى دواتر دەردەكەوێت مەبەست لە گەڕانەوەكەى گەڕانەوەیە بۆسەر وەزیفە كۆنەكەى ئەگەر هەیبوبىَ بۆ ئەوەى خۆى خانەنشین بكات و بگەڕێتەوە ئەوروپا .
 حیكایەتى ئەو بەرژەوەندییە گشتییە زۆر كۆنە خەڵكانێك هەن بۆ ئەوەى چیتر شەرمەزارى دونیا و قیامەت نەبن بڕیاریان دا چیتر باسى ئەو بەرژەوەندی گشتییە نەكەن و نانى خۆیان و ماڵ و منداڵەكانیان نەبڕن ، ئیتر لە پێناو بەرژەوەندى گشتى كار بە چەمكى بەرژەوەندى تایبەتى بكەن .
 جەنابى بە هۆى گەندەلییەوە لەسەر كارەكەى لادراو بۆ بەرژەوەندى گشتى كەسێكیان لە شوێنى دانا ، كەچى هێشتا كفنى مردوەكە زەرد نەبووە بۆ بەرژەوەندى تایبەتى جەنابى لە پۆستێكى باشترو قەلەوترو  فێنكتر داندرا .
 وەك چۆن قسە قسەى رادەكێشىَ ئاواش بەرژەوەندى بەرژەوەندى بەدوادا دێت ، كابرا بەرژەوەندى لەوەدابوو لە یەك كاتدا هەم سەرنووسەرى رۆژنامەیەكى ئەهلى و سەربەخۆ و ئازاد و بێلایەن بىَ هەم ئەندامى سەركردایەتى حزبێكى سیاسى ، هەم سەرۆكى لیژنەى لێپرسینەوە لە ئەندامانى حزبەكەى بێت كە بە هۆى ئازادى بیروڕاوە حزبەكەى سەرقالى لێكۆلینەوە بوو لە گەڵیاندا ، ئێستاش ئەو برادەرە سەرنووسەرى رۆژنامەیەكى ریفۆرمخوازە .
 ئەو بەرژەوەندییە زۆر موهیممە بە تایبەتى ئەگەر بۆ بەرژەوەندى تایبەتى بێت لە چوارچێوەى بەرژەوەندى گشتیدا ، ئەگەرنا بووە تۆ ماسترت لە هێلكەى مریشك هەبێت و بەڕێوەبەرى رۆشنبیرى بیت ، ئەندازیارى كارەبایى بیت و بەڕیوەبەرى ئاو بیت .
 ئەوە رێك وەك ئەوە وایە كاتى خۆى وەزیرى پەروەردە بۆ بەرژەوەندى گشتى خوێندنى پڕۆگرامى كشتوكالى لە قوتابخانەكان لادا ، دواتر بۆ بەرژەوەندى گشتى جەنابى وەزیرى پەروەردە  گۆڕدرا بۆ وەزیرى كشتوكاڵ
 
 

Previous
Next
This site is registered on wpml.org as a development site.