بە داخەوە … نەوزاد بەندى

 

 

 

-1-

ساندرێلا ،

لاى ئێمە ،

مێروولە تێى دا ..

خۆشەویستى 

وەک محەلەبى کرایە قاپى فەخفوری ،

مێزى بێ سەرەتا و

بێ کۆتایى ،

جەردەکانى پێ ڕازێنرایەوە ..

( ژو تێمى لارا فابیان ،

لاى ئێمە کەڕوو تێى دا ..

فارئە وەى  -دینسرۆس ،

توشى ئەکزیما بوو ،

درا بە لیژنەى سوتاندن و

لە جیاتى ئەو ،

داوەتنامەى فەرمى هەیفا وەهبى کرا ..

ئومکەلسوم و هایدە ،

توشى تالاسیمیا بوون و

لەبەردەم بانکى خوێنى سیاسەتا،

سواڵى پاینتێک خوێنیان کرد ..

حەسەن زیرەک و ماملێ لە بنکەیەکى دابەشکردنى موچەى خانەنشینیدا ،

هێندە هەتاو داى لە تەپڵى سەریان ،

بورانەوە و ..کەسیش نەیبردن بۆ ئیسعاف فەورى ..

لە جیاتى ئەوان ، نیو کیلۆ زێڕ درایە عادل ئیمام ،

لە جیاتى ئەوان ،

نانسى عەجرەم ،

لەسەر شانۆیەکى هەولێر ،

پەلامار درا … )

شیعرەکانى ئەلیزا و ئەراگۆن 

لاى ئێمە

دەسکارى کران ،

بۆ ئەوەى لەگەڵ داشبوڵى

ناوزەردى 

رانجرۆڤەرا بگونجێن .. 

 

-2-

شەقامەکانى ئەدەب ،

پێویستیان بە دامەزراندنى کۆمەڵێ پۆلیسى مرورە ..

 (هەزارەها شیعر پێویستیان بە وەسڵى سزادانە ..

هەزارەها چیرۆک پیویستە حیجز بکرێن ..

سەدان شاعیر ،

پێویستە مۆڵەتى شۆفێرییان لێ بسێنرێتەوە ..)

پێویستە خولى شۆفێرى

پیت و

وشە و

ڕستەیان بۆ بکرێتەوە ..

تیایاندا هەیە حەق وایە زیندان بکرێن ..

لێبوردنى گشتیش نەیانگرێتەوە ..

 

-3-

لە ئیسپانیا

لە مەیدانى زۆرانبازى گا ،

زۆرانبازێک بە ناوى ئەلڤارۆ مۆنێرا ، هەرچەند تیرى کرد بە پشتى گاکەدا ،

 تووڕە نەبوو ..

نەوروژا ..

بەڵکو بە هێمنى و بە چاوى بەزەییەوە ،

بۆ ئەلڤارۆى ئەڕوانى ..

(ئەلڤارۆ مۆنێرا خۆى پێ ڕانەگیرا ..

لەبەردەم گاکەدا چۆکى دادا و

لە پڕمەى گریانى دا )

من ئەڵێم ئەو گایە شاعیر بووە ..

ئەى ئێوە ئەڵێن چى ؟؟

 

-4-

خودا ،

بۆ وشکە ساڵى ناخى پیاو ،

ئافرەتى نارد ،

وەک ڕووبار ..

وەک گەواڵە هەور

وەک دەریا …

( من سەرم ڕووبارێ بردى ..

دڵم هەورە بروسکەى گەواڵە هەورێ سوتاندى ..

داهاتویشم ،

لە دەریایەکدا نقوم بوو .. )

 

-5-

لە سێبەرى گوێسەوانەى ماڵێکى ڕووە و کەرکوک ،

دادەنیشتین ..

یاریەکانى مناڵیمان بڵاو ئەکردەوە ،

هەموویان دەسکرد بوون ..

خۆمان دروستمان ئەکردن ..هەر لە گلۆر ..

هەر لە عەرەبانەى تەل ..

هەر لە هەلوکێن ..

( ئێمە مناڵیى خۆمان دروست کرد ،

بۆیە لە یادمان ناچێتەوە ..

لاویمان چەتیوێ فڕاندى ..)

ئەسەفم تەنها بۆ مناڵییە ..

ئەو دوڕە گرانبەهایەى کە ڕۆژگار لێى دزیم ..

 

-6-

چەند کاربەدەستێ ،

لە کەلاوەیەکدا ،

دەرپێى شیعرێکیان داکەندبوو ..

خ ە ر ی ک ى   بون ..

 

-7-

خودا غەفور و رەحیمە 

هەروەها شەدیدولعیقابە ..

( چەند غەفور و ڕەحیم بوو کە منداڵیى پێ بەخشین ..

چەند شەدیدولعیقاب بوو ،

کە منداڵیى لێ وەرگرتینەوە .. )

خوداى ڕەئوف و ڕەحیم ،

داواکارم هەتا منداڵیى لە منداڵەکانم ئەسێنیتەوە ،

ڕۆحم لێ وەرنەگریتەوە ..

خۆیشت باشتر دەزانى ..

ئینەکە ئەڕحەمو ڕاحیمین …

 

-8-

لە بازاڕ 

پارە یاریمان پێ ئەکا و

سەعاتەکانمان ئەمژێ ..

لە مەیدانى جەنگ ،

پارە شەڕمان پێ ئەکا و

خوێنمان ئەڕژێ ..

( پێشنیار ئەکەم ،

هەوڵێ بدەین بۆ نەهێشتنى پارە ..

هێزی دژە پارە و

هێزى نەهێشتنى پارە ، بخرێتە لیستى هێزەکانى ناوخۆوە ..

با وەکو خالخاڵۆکە و

پەپولە و

شینە شاهۆ بژین ..)

ئەرێ ژیانى کاممان جوانترە ،

مراویەکى کێویى 

یان مرۆڤێکى سەودا سەرى وەرەقەى دۆلار ؟

گوڵ ئەستێرەیەک ،

یان ئێشکگرێکى توڕەى فریاکەوتنى خێرا ؟ 

 

-9-

فرۆید لاى ئێمە بووایە ،

بە جۆرێکى تر  پێناسەى مرۆڤى ئەکرد ..

ئەیوت : مرۆڤ بە دوو کەرتە دابەش بوون زیاد ئەکا ،

وەک خومرە ..

وەک بەکتریا ..

ئیسحاق نیوتن خەڵکى ئەحماوا بوایە ،

سێوەکە لە جیاتى ئیلهامى تیۆرى ڕاکێشانى زەوى لا دروست بکردایە ،

تووڕە و دەهریی ئەکرد و

دار سێوەکەى ئەبڕیەوە و

ئەیوت : دەى فەرموو !  سەگبابخێو !بزانم ئێستا ئەتوانی سێومان تێبگری ؟

ئانیشتاین  خۆماڵى بووایە ،

تیۆرى نیسبى نەئەنوسى

بەڵکو ئەبوو بە ڕاوێژکارى وەزیرى دارایى ..

پۆشکین و مایکۆفسکى و ئێدگار ئاڵن پۆ ،

کوڕى سابونکەران بوونایە ،

ئەبوون بە سێ شێتى ناودارى شار ..

یەکەمیان لەبەردەرگاى مزگەوتێک ڕەق ئەبۆوە ..

دووەمیان حاجییەکى دوکاندار کیلۆیەکى ئاسنى ئەماڵى بە تەوێڵیا و خپى ئەکرد ..

سێیەمیان ئوتومبیلێک ئەیشێلا ..

هەرسێکیشیان ( بە پێى ڕاپۆرتى پزیشکى دادوەریى )دەستدرێژى سێکسییان کرابووە سەر ..

    ولیەم     شکسپیر لە سەرکارێز چاوى بەدونیاى فانى هەڵهێنایە ،

ئاڵودەى قۆچەقانى ئەبوو ،

دواجار لە شەڕى براکوژیى نەعلەتیدا ،

شەهید ئەکرا و

لە مەشهەدێکى (گەردەلولدا ) نیشان ئەدرا ..

ئەوسا ئەو هەزاران هەزار خێزانەى کە لەسەر شانۆکانى ئەو ئەژین ،

لە برسانا ئەمردن !!

ولیەم فۆکنەر لە زەرگەتە بانگ بە گوێچکەیدا بدرایە ،

چوار جار سنوورى ئەبەزاند و

هەر چوار جارەکە سنورداش ئەکرایەوە ..

سوپاس بۆ خوا ،پێنجەم جار بۆى دەرئەچوو ..!!

مۆلێر لە پیرمەسوور لەدایک بووایە ،

ئەبو بە تۆبەکارى شێخ و

لە ژێر دارتووەکەى حاجى حاندا ،

عومرى درێژى بۆ ئێوە بەجێ ئەهێشت ..

شەماڵ سائیب لە پاریس بووایە ،

بیتهۆڤنێکى تر ..

ڤاگنەر و باخێکى تر پەیدا ئەبوو .. 

قوبادى جەلیزادە لە کۆڵانێکى لەندەن ڕۆحى بکرایە بە بەرا ،

بایرۆنێکى تر ..

نیرۆدایەکى تر ، لە پایتەختى تەم و مژ پەیدا ئەبوو ..

چاڕلس دیکنز لە شەهیدانى ئازادى لە دایکبووایە ،

بەڕووى ئەفرۆشت و

ڕۆژێکیان کوڵەوەیبابێکى دار بەڕووەکان پێوەى ئەدا و

مەلا بە یاسیندا نەئەگەیشت ..

فرانز کافکا لە ئیسکان  بهاتایەتە دنیاوە ،

هەلى خوێندنى بۆ نەئەڕەخسا و

ڕۆژێکیان لەگەڵ پۆلیسى بەردەرگاى نەخۆشخانەى سنگ ،

ئەیکرد بە شەڕ و

ئەیانکرد بە قوربانى دوو فیشەکى ڕوسى ..

بڕوانن بۆ دارا حەمە سەعى ،

وازى لە پەیکەر تاشیى هێناو 

بە شەڕواڵێکى تاکەوە ،

بە نێوەندى سەوزە فرۆشەکانى مزگەوتى گەورەدا ،

زۆر جار ئەیبینم ..

ئەو لە ڕۆما ناوکییان ببڕیایە ،

مایکل ئەنجیلۆیەکى تر لە دایک ئەبوو ..

( وەکى دەرێن )خودا بە خۆیشى دەیزانێ … 

 

-10-

لە پۆلى دووى ناوەندى ،

لە موعەدەلى پێش نیوەى ساڵ ،

سێ سفرم تیا بوو .. ؟

(ئەى ئێوە  چەند سفرتان تیا بوو ؟؟)

عومەر شاڵى بەڕێوەبەرمان بوو ،

وتى : باوکت بانگ نەکەى ، ناهێڵم دەوام بکەى ..

(ئەى ئێوە ؟؟ )

بە بلوسێکى توکنەوە ،

لە نێوان باوکم و عومەر شاڵیدا ڕاوەستا بووم .. 

( ئەى ئێوە ؟؟ )

عومەر شاڵى ئەیوت : داناڕزێى ؟ باوکت ئەو هەمو خزمەتەت ئەکا ..

نانت ئەداتێ

جلت بۆ ئەکڕێ ..

(ئەى ئێوە ؟؟ )

ویستم بڵێم : کە مریشک ئەکوڵێنن ،

پشتە ڕەق و تەقەکەى ئەدەن بە من ..

بڕوانە جلەکانیشم ، لە پەڕۆى کاشى سڕین ئەچن ..

(ئەى ئێوە ؟؟ )

بەڵام نەموێرا قسە بکەم ..

( ئەى ئێوە ؟؟ وێراتان ؟؟ )

باوکیشم ئەیوت : مامۆستا گیان !

داواکارم هەتا ئەتوانن فەلاقەى بکەن ..

منیش لە ماڵەوە قسوورى لێناکەم ،

بەڵکو ببێ بە بەشەر ..

(ئەى ئێوە ؟؟ )

لە موعەدەلى نیوەى ساڵدا ،

سێ سفرەکەم کرد بە پێنج ..

ئیتر بەڕێوەبەر بە هێواشى پێى وتم :تەواو !

ئارەزووى خۆتە .. !!

( ئەى ئێوە ؟؟ )

لە موعەدەلى سەعى سەنەوى هەموو سفرەکانم پڕ کردەوە ..

سەرى ساڵ دەرچووم ..

باوکم نەیوت : ئافەرین ..

( ئەى ئێوە ؟؟ پێى وتن ؟؟ یان نا ؟؟ ) 

 

-11-

یەکەم کچ خۆشم ویست ،

نەخۆش بوو ..

دووەم کچ ، مەدفەعێکى ئێران لێیدا ،

(کاتێ برادەران پاسداریان گەیاندبووە جێیەک ،

بتوانێ سلێمانى لە نیعمەتى 

مەدفەع بێبەش نەکا  )

سێیەم کچ ،

هەرچەندم کرد بۆم نەخرایە ناو چوارچێوەیەکى شیعرەوە ،

ئیتر شوى کرد بە بازرگانێ ..

دواجار بۆم دەرکەوت ،

خۆشەویستى تەنها لە کتێبەکاندا خۆشە ،

نە ناز هەڵگرتنى ئەوێ ..

نە دەست ماچکردن ..

نە ئاڵتون هەڵگرتن ..

نە خانوو ..

نە قەنەفە و بەفرگرە و کەوچک ..

نە مناڵى تێ دەکەوێ ..

نە شەڕ ..

نە تەڵاق ..

نە پیربوون و چرچ و لۆچ بوون ..

وەکو ئاناکارنینا و

دێزدەمونا و

جەمیلە ..