بە دانە و بە کۆمەڵ … نەوزاد بەندى

 

 

 

 

 

-1-

سیان شەربەتخانەیەکیان کردەوە

ناویان لێنا :

شەربەتخانەى قەیناکا..

 

-2-

دووان یەکتریان خۆشویست ،

چوون بۆ بازاڕى چەک و جبەخانە ،

بۆ کڕینى کەرەستەى پێویست ،

بۆ خۆشەویستى ..

 

-3-

حەوت سەد و چل و نۆ  کەس کۆبوونەوە ،

بۆ ئەوەى شەقامێک بگرن ..

سێ پۆلیس

بە دوو دارەوە ،

هەموویانیان ڕاونا

 

-4-

حەوت پزیشک ،

بازگەیەکیان دانا ..

شا لەو بازگەیەى بدایە ،

ئەبوو بە سەپان ..

مەلاى دوانزە عیلم ،

ئەبوو بە کافرى سەر کێو ..

ئیتر نازانم لەو بازگەیە ،

چى ئەگوزەرا ..

چ قورەتیش بوو ڕەقابەى مالى و

پۆلیسى ئاداب توخنیان بکەوێ ..

 

-5-

شارێک هەبوو ،

سیخناخ لە کلینیک و

نەخۆشخانەى حوکومى و ئەهلى ..

هەروەها سیخناخ لە نەخۆش ..

ئیتر نازانم ئەو هەموو دەزگایە ،

سەرقاڵًى چى بوون ؟

چاککردنەوەى نەخۆش ،

یان برەودان بە نەخۆشى و

داهێنانى نەخۆشى نوێ ؟؟

 

-6-

پێشنیار ئەکەم ،

ڕۆژنامەیەک بکەوێتە بازاڕەوە ،

بە ناوى :

دەردى نوێ …

 

-7-

چوار خەم هاتن بۆم ،

خۆم نەدا بە دەستەوە ،

لە بالکۆنەکەوە خۆم فڕێدایە خوارەوە ،

وەک کچە ئینگلیزەکەى

کە لە ئوتێلێکى هیندستان ،

ویستیان ڕامى بکەن ..ڕازى نەبوو ..

خۆى فڕێدایە خوارەوە ..

( ئەوە یەکەم تۆڵە بوو ،

لە دواى گاندى ،

هیندییەک ،

لە ئینگلیزى کردبێتەوە )

 

-7-

شانزە هەزار خاوەن بڕوانامەى تازە هاتنە بازاڕەوە ..

بەڵام  فەلافل ،

مقاوەمەى کرد ..

نرخەکەى هەر پێنجسەد دینارە ..

 

-8-

ڕۆژ بە ڕۆژ 

سکرینى گەورەتر دێتە بازاڕەوە ،

بەڵام هەتا بێ ،

هەقیقەت بچوکتر ئەبێتەوە ..

ئێستا ئەمەوێ لە خاڵخاڵۆکەیەک بپرسم ،

سەبارەت بە تەوقیتى

چارەسەربوونى 

کێشەکانى

شەفافیەت و

پرسى نەوت و

ئەگەرەکانى

پیاهەڵقژانى هێزە نەیارەکان ..

ئەوانەى هەتا دوێنێ ،

لە مەنتیقەتولخەزرا،

کاپاچینۆیان پێکەوە هەڵئەدا ..

 

-8-

شەست و حەوت ساڵى تر ،

پیرەمێردێکى حەفتا و سێ ساڵان ،

لەو بەرى شەقامەکەوە ،

بە کاوەخۆ ،

ئەیەوێ بچێتە دەرمانخانەیەکەوە ،

( ئەوە کوڕە حەوت ساڵانەکەمە )

بەڵام بە ڕاستى ،

نازانم خۆم لە کوێم …