بە ڕێگاوە … نەوزاد بەندى
– زۆر جار سەرشەقامەکان ، وەکو بن دارتووەکان ، پڕن لە شیعرى هەڵوەریو ..-
-1-
عەرەبانچییەک ،
بەو جۆرە بانگى هاوڕێکەى ئەکرد :
-بەکرە بۆرژوا ..
بەکرە سێ خانوو ..
بەکرە گالاکسى چوار .. !
-2-
– یەعنى سەرفە نەزەرى لێبکەم ؟
– بە من ئەڵێى ؟
ئەرێوەڵڵا ..هەر ئێستە سەرفە نەزەرى لێبکە ..
حەواڵەى بکە بە خوا ،
ئەو حەقى بزنى شاخدار
بەسەر بزنى بێ شاخەوە ناهێڵێ ..
( جا دەستى برد بۆ سەرى ..
جێى شاخێکى ،
خوراند ! )
-3-
هەر بە کەڵەگایى چومە ژوورەوە ..
چەند پۆلیسەکە هاوارى کرد ..
چەند کابراى ئیستیعلامات نەڕاندى ..
خۆم لێکردن بە کەڕەى شەربەت .. !
-4-
ئەگەر لافاو نیوەى کۆمەڵگا ببات ،
نیوەکەى تر ئەبن بە ماسیگر ..
بە زاراوەى عەشایەرى :
ئەبن بە قیرش ..!
-5-
ئەوانەى لە جەنگا دەوڵەمەند ئەبن ،
لە ئاشتیدا ئەدرێنە دادگا ..
( ئەگەر یاسا
لەسەروو پۆستاڵەکانەوە بێ )
-6-
شیعر جۆرێکە لە بێ ئەدەبى ،
لە حزوورى دیوەخانى ئاغادا ..
-7-
بەنداوێکى تر دروست نەکەن ،
ئەم ڕەمەزانە ئەخنکێین ..
-8-
لە جیاتى بایعیەکە ،
بەنزینى بێجى دابەشکەن ، خاسترە ..
( میللەت هەمووى بوون بە سایق ..
لەلایەکى تریشەوە ،
بەنزین وەکو برنجى درێژ و
زەیتى گوڵە بەڕۆژە نییە ،
ئێکسپایەر نابێ )
-9-
من ئەڵێم :
وەلى دێوانە بە عەشقى شەم نەمردووە ،
بە مەلاریاى
مێشولەى
ئەنۆفیلسى
گۆماوەکانى
سەید سادق ..مردووە ..
-10-
ئەمڕۆیش ،
برنج و فاسۆڵیاکەمان تێکرد ،
خوا کەریمە بۆ سبەینێ …