خەونە سۆزانیەکانی من و چەند پیتێکی بریندار
وەرە ئەی یار
با پەیمانێکی تر ببەستین
کە جودا بێت لە پەیمانەکانی ترمان
وەرە ئەی یار
من هەموو جەستەی خۆمت پێدەبەخشم
تەنانەت
گلێنەی چاوەکانیشم
من هەرچیم هەیە پێتدەبەخشم
تەنانەت
سۆزانیترین خەونەکانیشم
وەرە ئەی یار
هەرچیم هەیە بۆخۆت بەرە
شیعر و
کتێبە چاو بە فرمێسکەکانیشم
چاویلکەکەم
قەڵەمەکەم
مۆمەکانی نێو ژوورەکەم
گوڵدانی گوڵەکانم
بوخچەی خەیاڵە نەوڕەسیەکانیشم
تەنانەت دەفتەری یادەوەریەکانیشم
منیش تەنها
چەند پیتێکم لەتۆ دەوێ
چەند پیتێکی
لانەواز و چاوبەخومار و بریندار
ئەو پیتانەی
نەک بە تەنیا
بەیەکەوەش
نە ناوێک و نە ڕەنگێک و وێنەیەکیان
لە هیچ ئەلبوومێک و
لە هیچ کیشوەرێک و
لە هیچ دونیایەکدا نیە ..!
– پیتەکان ( ن ن ا ت ش ی م ی )
ئەی یار
نونێکم لە نەوڕەسەکان بۆ وەربگرە
نونێکی تر لە نوور
ئایەک لە باران و
تێیەک لە ترێیە چاوڕەشەکان و
شینێک لە شەوە پڕ تریفەکان
یایەک لە یاقووت و
میمێک لە مرواریەکانی دەریا و
یایێکی تر لە خۆت ئەی یار
منیش بەم پیتانە
( نیشتیمان ) ێک دەنەخشێنم
کە پڕاوپڕ بێت
لە نەوڕەسی باڵڕەنگین و
لە نووری سپیدە
لە بارانی بەهاری و
لە ترێی چاوڕەشی قەترانی
لە شەوی پڕ تریفە و
لە یاقووتی بریسکەیی
لە مرواری دەریا و
لە یاری باڵازڕاڤ و هەوەسباز و مەمک قنج
نیشتیمانێک
پڕبێت لە سوارچاکی
نێو پێدەشتە نەخشینەکانی عەشق
پڕبێت لە شنەبای ئێواران و
لە نەغمەی گوڵەگەنم و
لە باڵندەی سەرمەست و
لە کوڵیکە سوورەکانی موحیبەت
نیشتیمانێک
وەرزەکانی بە ڕەنگی ترەوە دەرکەون
سەمفۆنیایەکی تر
لە ماڵەکان و لە جێژوانەکان ببیسترێ
پەپوولەکان
بە ستایلێکی تر سەما بکەن
ژیانیش
بە جۆرێکی تر خۆی ڕووت بکاتەوە
نیشتیمانێک
دۆزەخێکی ئارام و
پەرستگەیەکی ڕووناک و
بەهەشتێک بێت بۆ هەموومان
بەهەشتێکی
بێ سەردار و بێ سوڵتان و بێ خودا ..!
کۆتایی مایسی ٢٠١٢
ناڵە حەسەن