دورگه‌یه‌ك له سه‌راب … ستار ئەحمەد
دارێك ده‌نووك له‌با ده‌دا
بروسكه‌یه‌ك گڵ ده‌خوێنێته‌وه
دره‌خت په‌لكی به‌گه‌ڵا ده‌چنێ
شه‌و تریفه ده‌بێته‌سێبه‌ری
سه‌وزایی چڵ هه‌ڵده‌گرێ
شه‌پۆل كانی ده‌بزوێنێ
هه‌نارێك هه‌ڵده‌په‌ڕێ
چنارێك روومه‌ت ده‌ڕنێ
تاریكی
هه‌تاو راده‌كێشێ
خه‌و ده‌كاته چرای هه‌وداوون
لوتكه برین ده‌گرینێ
چیا لانك ده‌ڕوێنێ
خه‌مۆكی هه‌ڵدێر ده‌پێوێ
قیژه‌یه‌ك ده‌مخنكێنێ
دوكه‌ڵێك رامده‌پێچێ
چركه‌یه‌ك له‌گزنگا داده‌گیرسێم
دورگه‌یه‌ك له‌سه‌راب ده‌مته‌نێ
هه‌رێمێكم له‌جوودایی
نیشتمانێكم له‌به‌نده‌یی
بزرم به‌ورژمی خنكاندن
تینوێتیم ئاو ده‌مرێنێ
برسێتیم تاریكی قووتده‌دا
دێنم سه‌ری دره‌خت ده‌تاشێ
له‌ئه‌زموونی بێزمانا
راده‌كه‌م به‌دوای گوڵه‌گه‌نمێكا
سێبه‌ر له‌دار ده‌دزێ
ده‌وه‌ن له‌پاڵ هه‌ڵوه‌سته‌یا ده‌شكێ
سێداره به‌پرچی ده‌دوورێ
ئه‌م گێژاوه ناخم ده‌ته‌نێ
ئه‌م گه‌رداوه ده‌مفڕێنێ
كۆترێكم له‌به‌فر
هێلانه‌م گه‌واڵه‌ی هه‌وره
شاباڵم بارانی چه‌تره
دارێك چڕنووك له‌با ئه‌دا
نه‌باڵه‌فڕه‌ی ئه‌ستێره ده‌گرێته‌وه
نه‌سێوێك له‌زاری حاڵیببوون ده‌گا
رایه‌خه‌كه‌م ته‌مه‌نم ده‌پێوێ
هه‌تاو له‌ناخما راده‌كشێ
ته‌نهایی له‌ناكاوا داگیرمده‌كا
ئالووده‌بوون بۆشوێنێكی دوورم ده‌با
به‌ته‌مه‌نا هه‌ڵده‌زنێم
له‌بۆته‌ی مردنا ده‌كوژرێم
