دۆزه‌خ …. به‌ندی عه‌لی

له‌ته‌نووره‌کانی دۆزرخا
شنه‌بای میهر هه‌ڵناکا
چ گێلیه‌که‌ ئه‌ی دڵ ، له‌وێ
له‌گه‌ڵ قامچی به‌ده‌سته‌کانی شه‌یتانا
به‌نیازی پیاسه‌یه‌کی ئێواران بی
گوڵه‌کانی دۆزه‌خیش
هه‌موویان هه‌ر یه‌ک ڕه‌نگیان هه‌یه
له‌ڕه‌نگی گڕ
چ گێلیه‌که‌ ئه‌ی دڵ ، له‌وێ
گوڵ بده‌ی له‌یه‌خه‌ی
پاسه‌وانه‌ دڵسۆزه‌کانی شه‌یتان
کانیاوه‌کانی دۆزه‌خیش
هه‌ر چۆڕاوی ده‌باخانه‌کانی جورمیان
لێ هه‌ڵئه‌قوڵێ
چ گێلیه‌که ئه‌ی دڵ ، له‌وێ
داوه‌تی شه‌یتان بکه‌ی
بۆ نۆشینی دوو پێک له‌ئاوی
روحی خۆت
ده‌روازه‌کانی دۆزه‌خیش
ته‌نیا به‌ڕووی
چوونه‌ ژووره‌وه‌یا ئه‌کرێنه‌وه
چ گێلیه‌که‌ ئه‌ی دڵ ، له‌وێ
پرسیاری ڕوخسه‌تی ده‌رچوون
له‌ده‌رگاوانه‌کانی شه‌یتان بکه‌ی
یاساو ڕێساکانی دۆزه‌خ
له‌حیبری گڕاویی تۆڵه‌و
به‌په‌ڕه‌مووچی ژه‌هراویی
سزاو ئه‌شکه‌نجه‌ نووسراون
چ گێلیه‌که‌ ئه‌ی دڵ ، له‌وێ
تکای مافی خۆپیشاندان
بۆ روحه‌ تواوه‌کان بکه‌ی

به‌ندی عه‌لی .. به‌هاری 2011