Skip to Content

Thursday, March 28th, 2024
روانگه‌ … ستار ئەحمەد

روانگه‌ … ستار ئەحمەد

Closed
by June 25, 2012 هۆنراوە

 

 

له‌ دونیای جه‌نجاڵی ره‌نگوبۆدا

رێگاكان جوودان

به‌ ره‌نجامه‌كان نامانگه‌یه‌ننه‌ یه‌ك

بۆیه‌ ماندوو

به‌سه‌ر پردی خۆزگه‌كاندا

رۆژانه‌ چه‌ندین جار سه‌نگه‌ر ده‌به‌ستین

ده‌مانه‌وێ به‌ هێشوه‌رازی مه‌رازه‌كانمان بگه‌ین

خه‌مێك شه‌وانه‌ خۆی ده‌كات به‌ رۆحمانا‌و

بارخانه‌ی لێده‌خات

شیرینه‌ وه‌ك قاقای مناڵ‌و

تاڵه‌ وه‌ك ئه‌و رۆژانه‌ی راپێچیان كردین

له‌ نێوانی تاڵی‌و شیرینیدا

بوون‌و نه‌بووندا… هه‌میشه‌ هه‌ڵدێین

ناگه‌ین به‌و نیازه‌ی 

ئارامگه‌یه‌ك بێت

بۆ دڵنه‌وایی دوا هه‌نگاومان

كه‌ تاریكی ده‌كشێ

ئیتر به‌سه‌ر عومری خۆماندا باز ئه‌ده‌ین

باڵێك نییه‌ بمانفڕێنێ

ئاسمانێك نامانگه‌یه‌نێته‌ خۆی

ته‌نها خاكی شیرین

وه‌ك دایكێكی باڵا

وه‌كو ئاڵایه‌كی نیان

ده‌بێته‌ نسێی پشوودانمان

له‌ حه‌سره‌تی ئاڵوواڵایی ژیاندا

له‌ ره‌نگه‌كان ورد ده‌بینه‌وه‌

نه‌ په‌لكه‌زێڕینه‌یه‌ك له‌ نیگامانا روانگه‌كان جوان ده‌كا

نه‌ هاوارێك نركه‌مان به‌ گوێی ئه‌واندا ده‌دات

ئه‌وانی دیوی تاریكی ئێمه‌

ئێمه‌ی پرشنگی رچه‌ڕێی شه‌وه‌كانیان

له‌ كێ بدوێن..؟

ئه‌و شه‌پۆلانه‌ی دووی كه‌وتین

جێیان هێڵان

ئه‌و كه‌نارانه‌ی كه‌سكیان پێبه‌خشین

مشتێك ژیله‌مۆ‌و

خه‌رمانێك ته‌نی داگیرساوو

خاكێكی جه‌رگ سووتاویان پێره‌وانه‌بینین

چی هه‌ڵبژێرین

له‌ نێوانی خوێن‌و ئاسۆدا

چه‌ك‌و قه‌ڵه‌مدا

شه‌و و رووناكیا

زه‌حمه‌ته‌ راپرسی ترپه‌ی دڵه‌كان بكه‌ین

له‌ خۆمان وردنه‌بینه‌وه‌

ئاخر كه‌ی…؟

پروسكی جه‌سته‌مان ئه‌دۆزینه‌وه‌

هه‌تا بتوانین گیانی به‌به‌ردا بكه‌ین

اوێك بۆ خۆمان هه‌ڵبژێرین

ئاسمانێك به‌ به‌ری دایكمان بدوورین

 

Previous
Next
This site is registered on wpml.org as a development site.