Skip to Content

Thursday, March 28th, 2024
سێ‌ نڤیسین ب قه‌له‌مێ‌ حبری

سێ‌ نڤیسین ب قه‌له‌مێ‌ حبری

Closed

 (1)
من دگه‌ل قه‌له‌مێ‌ خوه‌ بریار دا، ئێدی ئه‌م بو هه‌وه‌ نه‌ نڤیسین! ئه‌م ب ئێش و ئازارێن خه‌لكی ڤه‌، ب كێشه‌یێن جڤاكی و ب كێشمه‌كێشێن سیاسی ڤه‌ گه‌له‌ك وه‌ستیاین. دڤێت سه‌حكه‌ینه‌ دنیایه‌ك دی، نڤیسینێن مه‌ ده‌ربرینێ‌ ژ جیهانا مه‌ بتنێ‌ بكه‌ن. ئه‌م ژ ده‌نگێ‌ شرشرا ئاڤێ‌ و چپكێن بارانێ‌، خه‌ریب بوینه‌! من جیهانه‌كا دی دڤێت تێدا گه‌نجاتیا خوه‌ بزڤرینم، ده‌می گه‌له‌ك تشت ژ مه‌ دزینه‌ و ئه‌م ره‌پ و رویت دناڤ جاده‌یێن دوو سایدی و سیهـ میتری دا هێلاینه‌، چاڤه‌رێی ده‌مژمێرێن كاره‌بێی نه‌ و سرایێ‌ لبه‌ر فرنێن سه‌مونان دگرین، ده‌ستێ‌ مه‌ یێ‌ ب به‌ریكا مه‌ ڤه‌ و دوو روژا، ئێك كیلویا فێقی دخوین و هه‌ر سه‌ری، ژ ئێك لب زێده‌تر نه‌گه‌هیتێ‌.
 من تا خوه‌ دگه‌هانده‌ وێ‌ كولیلكا دناڤ وی كه‌ڤرێ‌ هشكاره‌ را، شوین بوی، ده‌ستێن من هه‌می دسه‌لخین و تا ئه‌رزنكێ‌ خوینه‌لو دبون. براستی جوانی و بێهنا وێ‌ كولیلكێ‌ بو من رامانه‌ك مه‌زن بو، هێشتا بیرێ‌ لوێ‌ كولیلكێ‌ دكه‌م. ئه‌ز داخبارێ‌ موزیكه‌ و سترانێن كه‌ڤنم، براستی هێژ ئه‌ز داخبارێ‌ وێ‌ موزیكا كلاسیكی مه‌ كو جارنا دگه‌ل ده‌نگێ‌ چیاییێ‌ محه‌مه‌د عارفێ‌ جزیری، ده‌ردكه‌ت و من هزردكر، ئه‌و بتنێ‌ سترانبێژێ‌ ترومبێلا یه‌، ژبه‌ر هندێ‌ ژی تا نوكه‌ چه‌ند ئه‌ز ل ترومبێله‌كێ‌ سیار دبم، ئه‌ز خه‌ریبیێن وی ده‌نگی دكه‌م. گه‌له‌ك تابلویێن ژڤی ره‌نگی دگه‌ل من ماینه‌ و هه‌می یێن گه‌نجاتیا منن، هه‌كو من چاڤێ‌ خوه‌ ل كچكان دگێرا و ژ قوتابخانا وێ‌ تا به‌ر ده‌روكێ‌ مالا وان، من پێنگاڤێن وێ‌ دهژمارتن، گه‌له‌ك جاران ژ شه‌رما دهلنگڤی و خو ژ هه‌ڤالان ڤه‌ده‌ر دكر، چه‌ند خو گیرو كربا، من خوه‌ ژێ‌ دویر تر دكر و من وێره‌كیا به‌رسینگا وێ‌ نه‌ بو. بێی هزرێ‌ ل ئێك په‌یڤا عاشقانه‌ بكه‌م و دلێ‌ وێ‌ بخو راكێشم. نزانم بێ‌ ئومێدیه‌ ئه‌ز و قه‌له‌مێ‌ خوه‌ ل سه‌ر رێكه‌فتین یان ژی  ره‌ڤینه‌ ژ دورهێلی یان ژی چ ژڤان هه‌میان نینه‌ و پێدڤی یه‌ قه‌له‌مێ‌ من دوباره‌ ژ حبری بهێته‌ داگرتن.
(2)
بو جارا دوێ‌ ئه‌ز هه‌ست دكه‌م، قه‌له‌مێ‌ من نه‌شێت دگه‌ل من به‌رده‌وامیێ‌ بده‌ت و یێ‌ خوه‌ ژ نڤیسینێن من، ڤه‌دهێلیت. براستی ئه‌ڤی شیشێ‌ حبری، ئه‌ز گه‌له‌ك وه‌ستاندم، نزانم حبر یێ‌ ئێكسپایره‌ یان سه‌ركێ‌ قه‌له‌می سه‌لخیه‌ و ل نڤیسینێ‌ دهه‌زقیت. هه‌می دبێژنه‌ من تو مروڤه‌كێ‌ كلاسیكی، ژبه‌ركو تو هێژ ب قه‌له‌مێ‌ حبری دنڤیسی! براستی ژی من دڤێت بڤی قه‌له‌می هه‌می تشتێن خوه‌ یێن كلاسیك زیندی بكه‌م. دبیت كو هێژ ئه‌ز خوه‌ ب كه‌سه‌كێ‌ كلاسیك دزانم، هه‌كو ئه‌ز یێ‌ گه‌نج حه‌ژێكرن هه‌ما هه‌ر یا هوسا بو، چه‌ند جاره‌كێ‌ بیرێن زاروكاتیا خوه‌ دكه‌م، بیرێن سه‌یدایێ‌ عه‌دنان دكه‌م، براستی بو من گه‌له‌ك نه‌خوش بو، هه‌كو دهاته‌ گوهێن من، كو سه‌یدایێ‌ عه‌دنان یێ‌ بویه‌ رێڤه‌به‌ر، چنكو ده‌ست دگه‌ل (منه‌زمێ‌) هه‌بو! براستی سه‌یدایێ‌ عه‌دنان گوتنه‌ك كریه‌ دگوهێ‌ من دا و هندی بیریا وێ‌ بكه‌م، دچاڤێن من دا پتر مه‌زن دبیت، سه‌یدایێ‌ عه‌دنان دگوت: (لده‌ف موسلمانان هه‌كو زاروك هێژ ل سه‌ر پێچولكێ‌، دگوهێن وی دا بانگ دده‌ن. دڤێت ئه‌م كورد دگوهێن زاروكێن خوه‌ دا بانگ بده‌ین و بێژینێ‌، كوردستان یا پارچه‌كریه‌ و دڤێت ئه‌م بو خه‌باتێ‌ بكه‌ین)، چه‌ندا جانه‌ ماموستا ئه‌ڤ گوتنه‌، براستی ئه‌ز قه‌ردارێ‌ گوتنا ته‌مه‌ و ئه‌گه‌ر تو ژ ده‌رڤه‌ی كوردستانێ‌ زڤری و ئه‌ز بوێ‌ زڤرینێ‌ ئاگه‌هـ بوم، ئه‌ز دێ‌ هێم سوپاسیا ته‌كه‌م و بێژمه‌ ته‌، ماموستا ته‌ هه‌ستا كوردینیێ‌ یا نیشا من دای، ئه‌گه‌ر تو هاتبی و من چاڤ بتنه‌ نه‌ كه‌تبن ژی، ئه‌ز تا هه‌بونا خوه‌، دێ‌ قه‌ردارێ‌ گوتنا ته‌ بم. 

(3)
بو جارا چه‌ندێ‌ من كاغه‌ز كێشانه‌ به‌ر قه‌له‌مێ‌ خوه‌یێ‌ حبری و چه‌ندین رێزك بو ده‌رسوكا شێخاتیێ‌  من راده‌ستی به‌رپه‌رێن روژناما كرینه‌، ژ درێژاهیا ناڤێ‌ من كو ژ نه‌هـ پیتان پێكدهێت، جارنا ئه‌ز ب شێخ دهێمه‌ گازیكرن، ناڤێن زه‌مه‌نێ‌ مه‌ یێ‌ بچویكاتیێ‌ ژ ئه‌حمه‌د و محه‌مه‌دا ده‌ستپێدكرن و نوكه‌ هه‌می یێن بوینه‌ وارین و وارڤین و ئه‌ڤرو ئه‌م خودان هه‌رێمین و خودان فیدرالیه‌ت. خه‌لكی گوتنه‌ من شێخ و هنده‌كان بكه‌نی ڤه‌ ده‌ستێ‌ من ماچ دكرن، براستی هه‌ر كه‌سێ‌ بڤێت دی بیته‌ شێخ، نه‌ كه‌س ب ده‌ستێن مروڤی ڤه‌ ماچی دكه‌ت و نه‌ كه‌س پشتیێن دارا بو مروڤی دئینیت و كه‌س ب سه‌رێ‌ مروڤی ژی سویند ناخوت، براستی ژیان هوسایه‌ به‌ری نوكه‌ تشتێ‌ عه‌سل و نه‌عه‌سل تژی سه‌ر ره‌فاتكێ‌ دكانا بو، شێخان قه‌در و قیمه‌تێ‌ خو هه‌بو و خودان تبه‌ركێن خو بون، نوكه‌ ته‌قلیدێ‌ جهێ‌ هه‌می تشته‌كی یا گرتی، قاچكێ‌ ده‌ڤێ‌ هه‌میا نه‌، ژ كه‌ره‌ما خودێ‌ ته‌قلیدخانێ‌ هه‌می تشت یێ‌ ڤه‌گرتی، هه‌ر ژ وان ده‌ڤكێن به‌ری چه‌ند روژان من بو تراشینا رهـێن خو كرین، تا دگه‌هیه‌ ترومبێلێن شوفرلێت (ئه‌ڤیو). ژ من حێبه‌تی نه‌به‌ ئه‌گه‌ر بێژمه‌ته‌ ئه‌ڤرو مروڤ ژی ته‌قلیدن، دقوتابخانێ‌ ڤه‌ و ل نه‌خوشخانێ‌ و دته‌كسیێ‌ دا و ئه‌ڤێن ل سه‌ر كورسیێن لدوور خوه‌ دزڤرن، هه‌ما چنه‌! ڤێجا هه‌كه‌ ته‌ بڤێت ئه‌ز ب ماركێتا فروتنا قه‌له‌مێن حبری دكه‌ڤم، بتنێ‌ تشتێ‌ مای نه‌ ته‌قلید و بهایێ‌ وی وه‌ك خو قه‌له‌مێن حبری نه‌، ئه‌ڤێن دبێژنێ‌ (قه‌له‌مێن پندان). 


عبدالرحمن بامه‌رنی

Previous
Next
This site is registered on wpml.org as a development site.