Skip to Content

Friday, March 29th, 2024
سەرابتر لەژیان …!

سەرابتر لەژیان …!

Closed

                                                                                 
 *" هیچ شتآ جێگەمى تێدانابێتەوە .. هەمووى بۆمن تەنگەبەرن .. دەمەوێت ئازادبم " نیكۆس كازانزاكى
 ئەم شەو من ئاسمانى سیا ،
 بەدیار تەلى پساوى گیتارەكەمەوە
 هەناسەى قوڵى نائومێدى هەڵدەكێشین و ،
 پەنجەرەكانى ڕوانین كڵۆم دراون و ،
 هیچ ئاوازێك نایەتە بوون .
 قەدەرى ئەم نەبوونە بگۆڕىَ و ،
 ژیان هارمۆنیاى خەون بژەنىَ .
 ئاى ماتەمى دەریاى بێدەنگى !
 بەشوێن كام پێناسەى كەناردا هەنگاو بنێین ؟
 ماتماتیكى خەونمان نیشان بدات و ،
 باڵەكانى فڕینى نەوڕەسمان بداتآ ..
 تائێوارە پەمەییەكانى عەشق ببینین .
 جەخار لەسیاپۆشى ئەم زەمەنەدا ،
 یادەوەریمان لێوان .. لێوە ،
 لەحزورى تەنهایى و سەراب و ،
 شەوانە پێكى مەراق دەنۆشین و ،
 هیچ خودایەك مانگى نیشان نەداین ..
 زاهیدێك فێرى زیكرى عەشقى نەكردین ..
 تاگۆرانییە ڕەشپۆشەكانى ڕابووردوو ،
 لەئاوێنە تەڵخەكانى زەمەن دا نغرۆبن .
 ئەمێستا ژیان لەساتى محاڵ دا وەستاوە ..
 عەشق و خەون و دەریا ،
 گەیشتن بەئاستانەى حزورى مانگ و ،
 وادەى ڕاموسانى گوڵ و ئاونگى بەیان ..
 چڕینى سەمفۆنیاكانى ژیان بەسەرچوو .
 بمبەخشە ژیآ گیتارەكەم ،
 لەم مەملەكەتى ئاوابوونى وەفایەدا ..
 پەنجەكانم ناتوانن هیچ نۆتەیەك بژەنن و،
 ئاوازێك ببەخشنە مەستەكانى مەیكەدەو ،
 دڵى سخناخ بوویان بەئاوازى عەشق ..
 لەپێكى بادەدا بتوێننەوە و،
 چەند ساتێك بآ ئاگایانە ڕابووردوو لەبیربكەن .
 ئەفسوس .. ئەفسوس
 تەلسمى ژیان هەورێكى نمناكە و ،
 لەهەر ساتێكى تەنهایى دا خۆى نمایش دەكات و ،
 تاریك تر لەئەندێشەى ئێمە و ،
 خێراتر لەهەناسەكانى (( با )) و ،
 دوربین تر لەڕوانینى ئێمە ..
 دەمانباتەوە سەر ڕشتنى ئەسرینى نائومێدى .
 ئاى قەدەرى سەراب و مەئویستى !
 بمبەرەوە ساتى ئازارەكانى مەرگ و،
 لەم بوونە بێمانایەم قوتاركە ..
 بەرگەى ئەم هەموو سیا پۆشیە ناگرم ..
 ئیدى ژیان وێنایەكمان ناداتآ ،
 نەخشەى خەونەكان ڕەنگ ڕێژ بكات و ،
 هەناسەكانى ئومێد بەبەرماندا بكات .
 
 زەمەنى وون بوون
 18/7/2008
 
 
 ماناى هەندێك ووشە :
 سیا : ڕەش
 مەراق : خەفەت
 زاهید : بەكەسە دەڵێن كەدەست لەژیانى دنیایى بەردەدات
 ژیآ گیتار : تەلى گیتار
 سخناخ : لێوان لێو
 مەیكەدە : مەیخانە
 ئەسرین : فرمێسك
 ئاستانە : لێوار
 بادە : مەیى
 * ئەو دێڕەى ناو كەوانەكە : نوسینى ڕۆمان نوسى یۆنانى نیكۆس كازانزاكیە ، لەكتێبى سۆفیگەرێتى وەرگیراوە
 Sarwar_kareem@yahoo.com
 
 

Previous
Next
This site is registered on wpml.org as a development site.