Skip to Content

Thursday, March 28th, 2024
عێراق … ته‌ها ئه‌حمه‌د ڕه‌سوڵ

عێراق … ته‌ها ئه‌حمه‌د ڕه‌سوڵ

Closed
by June 2, 2012 هۆنراوە

 

    

   عێراق
    ئه‌ی وڵاتی سۆمه‌رییه‌كان
    ئه‌ی داستانی گه‌لگامشی نێو زه‌لكاو و ده‌شتی سووتاو
    قیساره‌ی شاخداری مه‌رگ،
    ئاوازژه‌نی مه‌رگه‌سات و تاریكستان

    عێراق
    وڵاتی دوو ڕووباران خوێن
    خاكی تینووی بێ‌ باران و بێ‌ ئامان و
    بێ‌ داڵده‌ و بێ‌ پشت و په‌نا
    میزۆپۆتامیای خێرنه‌دیو
    كۆنترین گوناهی زه‌مین
    ئه‌ی پێده‌شتی سه‌رابستان
    دۆڵی به‌رینی بێهوده‌ له‌ هیچستان

    عێراق
    ئه‌ی پڵنگی داڕماوی له‌كش و ئه‌كه‌د
    شێری پیاوخۆری بابل و
    مرۆ كوژه‌ر له‌ژێر سایه‌ی هه‌ڵواسینی باخچه‌كاندا
    ئه‌ی په‌رستگای نامۆ به‌ شه‌وق و ڕووناكی
    ده‌نگ و سه‌دای زبر و ڕه‌ق و
    پانتایی پڕ له‌ ژاوه‌ژاو
   
    عێراق
    ئاشووری ڕم و قه‌ڵغان و ڕیش شمشێران
    ئه‌ی په‌یكه‌ری لوت شكاوی
    جێماو له‌ دیرۆكی دۆڕان
    گڕهاوێژی كوژاوه‌ بۆ نیشانی ون
    شارستانی یه‌كه‌مین له‌ كوفر و ئاشووب
   
    عێراق
    ڕۆخی به‌رێكی دۆزه‌خ و
    ئه‌شكه‌وتی نوته‌كی به‌ڵا
    جه‌رگه‌ی تاوان و كوشتار و
    كۆچ و ڕه‌و و ماڵوێرانی
    نزرگه‌ی چقڵ و په‌ڵاش و
    سه‌ره‌نوێلكی پڕ دووكه‌ڵ و خۆڵ و خاشاك
    ته‌لبه‌ندی زیندانی ئه‌قڵ و
    داهاتووی ڕه‌شی قه‌ترانی

    عێراق
    ئه‌ی ئاسمانی بێ‌ ئۆكسجین
    ئه‌ی بیابانی دروستبوو له‌ ئێسك و پروسك
    مردووشۆری گوڵی ناكامی باخچه‌كان
    ئه‌ی بكوژی خه‌ون و ئومێد
    پوچكه‌ره‌وه‌ی ئه‌ندێشه‌ ته‌واونه‌بووه‌كان

    عێراق ئاخ عێراق
    بنیاتنه‌ری ته‌خت و تاراجی تارمایی
    سك ئاوس به‌ سه‌ركرده‌ی زۆڵ
    سه‌رزه‌مینی فرتوفێڵی جه‌للاده‌كان
    تاقیگه‌ی نوێترین چه‌ك و
    به‌رهه‌مهێنی تۆقاندن و دا    چڵه‌كین و نۆبه‌تی دڵ
    ته‌رمی ون و برینداری بۆ ناكۆتا به‌ شان و كۆڵ

    عێراق
    فره‌زمانی له‌یه‌ك نه‌گه‌یشتووی
    نه‌ته‌وه‌ی تینوو به‌ نه‌مانی یه‌ك
    دیالۆگی سه‌رزاره‌كی و، مشتومڕی توندی كینه‌
    ئه‌ی نیشته‌جێی ململانێ‌ و لانكی كێشه‌
    جوگرافیای سه‌راپا ته‌نگژه‌ی
    نێوان دراوسێی دڵڕه‌ق و چاوچنۆك و ته‌فره‌ده‌ران
    نه‌خشه‌ تێكشكاوی، دیرۆك هه‌پرون و
    جێی ڕمبازێنی گشت داگیركه‌ران

    عێراق داخ عێراق
    چ زۆنگاوێكی ڕووبه‌ر بۆنكردویت
    چ گۆڕستانێك بۆ زیندووه‌كانت!!
    چه‌ند بێسنووره‌ ئومێدبڕانت
    چه‌ند بێشوماره‌ حه‌سره‌ت به‌خشینت!!

    عێراق
    ناو هه‌ناو پڕ له‌ نه‌وت و په‌تڕۆڵی نه‌گریس
    بێ‌ به‌رهه‌می بۆش و خاڵیی
    چاوه‌زه‌قه‌ی بوونه‌وه‌ری دوو پێ‌ و دوو گوێی
    ڕیسوا و ڕه‌زیل و گه‌دایان
    ئه‌ی ژینی به‌د و ناچاریی
    ئه‌ی به‌ئه‌زموون له‌ خنكاندنی ئازادی

    عێراق
    ( ناو ) ڕه‌ق و ته‌قی شه‌ڕانگێز
    به‌رپاكه‌ری جه‌نگه‌ هیچ و ناكۆتاكان
    ئه‌ی عاشقی عه‌رش و ته‌خت و
    ده‌می گه‌وره‌ی گیرفانه‌كان
    كوده‌تاچی بێ‌ سه‌روبه‌ر و بنه‌ما
    شۆڕشگێڕی بێ‌ ئامانج و
    دیكتاتۆری لات و نابوت
    بۆ كوشتنی زه‌وی و ئاسمان، ئینسانه‌كان

    عێراق وای عێراق
    هه‌وری ڕه‌شی باڵدارانی
    كرمه‌ڕێزی دره‌ختانی
    ئۆردوگای ژانی نه‌بڕاوه‌ی
    كڵاوڕۆژنه‌ی خه‌م و ئازار،
    وێرانه‌ خاك و كه‌لاوه‌ی
    بێ‌ دوێنێ‌ و ئه‌مڕۆی به‌هار و
    به‌بێ‌ سبه‌ینێ‌ و شكۆفه‌ی

    عێراق
    هه‌ژده‌ گۆڕستانی ته‌ریك
    هه‌ژده‌ كێلی به‌ناو شار و
    هه‌زاران میل كفنی كشاو
    سه‌دان دارخورمای نه‌زۆك و
    پیره‌ به‌ڕووی له‌ بێخه‌وه‌ هه‌ڵكێشراو

    عێراق
    ئاشی نه‌زان و حوكمی قه‌ره‌قوش
    ئه‌ی بێ‌ یاسا و بێ‌ ده‌ستوور و
    ئاڵا شڕێك كه‌ هه‌ر ڕۆژه‌ی به‌ جۆرێكه‌
    بێ‌ سه‌روه‌ریی و بێ‌ مروه‌تی
    تۆپباران و گڕبارانی وڵاتانیت
    كه‌ وه‌رزاو وه‌رز له‌ په‌ڕێكه‌

    عێراق
    مۆڵگه‌ی به‌دبه‌ختی و نه‌گبه‌تی
    مۆته‌كه‌ی هه‌موو زه‌مانێ‌
    تراژیدیای بێ‌ قۆناغ و په‌نگخواردوو له‌ ساته‌كاندا
    گۆمی لیخنی هه‌ناسه‌ و
    ده‌ستڕه‌نگین له‌ قڕكردن و ئه‌نفال و كیمیاباراندا

    عێراق هێی عێراق
    وڵاتی چه‌پڵه‌ڕێزان بۆ فه‌رمانڕه‌وای نه‌زان و گێل
    زاره‌تره‌ك له‌ سوپای دۆڕاو
    له‌ سیخوڕ و پیاوانی گچكه‌ی ده‌مامكدار
    خه‌نجه‌رلێده‌ر.. بێگومان هه‌ر له‌پشته‌وه‌،
    له‌ فیگه‌ری برا و كه‌س و خزم و ناسیاو

    عێراق
    فاڵچی له‌ پێشهاتی مه‌رگ و ڕۆژانی ڕه‌ش
    لێزان له‌ چنینی داو و هه‌ڵكه‌ندنی گۆڕی خودیی
    ڕاوچی هزر و هه‌ستی پاكیزه‌ و بێگوناه
    نیشانپێكی ده‌نگی زیندووی
    په‌یڤ و وانه‌ی قه‌ڵه‌می گه‌ش
   
    عێراق.. عێراق
    ئێستا كه‌سێك خۆشی ناوێیت
    هاوڵاتییه‌ك چاره‌ی ناویت
    سیاسییه‌ك بۆت ناسووتێ‌ و
    سه‌ركرده‌یه‌ك ڕێزت ناگرێ‌
    باڵنده‌كان هه‌موو ڕۆیشتن
    مرۆڤه‌كان جێیانهێشتیت
    كانیاوه‌كان وشكیان كرد و
    ئه‌ستێره‌كان ڕه‌وینه‌وه‌
    ئای چه‌نده‌ تۆ به‌نه‌فره‌تیت
    شێته‌كانیش پێت قایل نین!!

    عێراق
    چه‌نده‌ ویستیان بكرێیته‌وه‌ و
    بۆنی سه‌ربه‌ستی هه‌ڵمژیت
    تۆی خه‌واڵوو تێنه‌گه‌یشتی
    ئای چه‌ند سنگیان كرده‌ قه‌ڵغانی فیشه‌ك و
    چه‌ندیش مردن له‌پێناوتا
    لێ‌ تۆ باكت به‌ هیچ نه‌بوو
    چه‌ند شیعر و تابلۆی گه‌شاوه‌
    سێداره‌ پاداشت بوو بۆیان
    داهێنان و فه‌لسه‌فه‌كان هه‌موو بوونه‌ قوربانی تۆ
    زمانی تۆش تی ئێن تی و تێزابی پرژاند
    له‌ ڕوویاندا به‌بێباكی قامچیت وه‌شاند
    خۆ چه‌ند هۆش و هه‌ست و باوه‌ڕ
    بوونه‌ زمانحاڵی بوونت
    كه‌چی ئاكام..
    تاجت نایه‌ سه‌رسه‌ریه‌كان
    ڕێگه‌ت خۆش كرد بۆ گورگ و به‌راز و ڕێوی
    بۆ كه‌ڵبه‌دار و جه‌للاد و
    بۆ دز و چه‌ته‌ و بێ‌ ویژدان
    ئای چه‌نده‌ شه‌هیدبوون بۆ تۆ
    خوانت بۆ غه‌واران ڕاخست
    مه‌دالیاكانت به‌خشییه‌ ترسنۆكان

    عێراق
    تۆ گریانی منداڵانت بیرچوونه‌وه‌
    تۆ ئه‌شكه‌نجه‌ی دیله‌كان و
    سه‌ربڕینی وشه‌كانت پێنه‌زانی
    دایكانی جه‌رگ سووتاو و
    نامورادانت نه‌نۆشی
    مخابن تۆ چاوت هیچ ئه‌وانه‌ی نه‌دی
    نه‌ هه‌ڵله‌رزیت، نه‌ دڵت تاوێك داخورپا
    تۆی دڵدار به‌ گڕ و باروت
    به‌ خه‌نجه‌ر و چه‌ك و ژه‌هر
    شه‌وت كرده‌ دیاری ڕۆژ و
    تیرۆریش بۆ تریفه‌ی مانگ

    عێراق ئای عێراق
    دایكێكی گه‌لێك دڵڕه‌قی
    به‌دكاران و زۆردارانت هه‌میشه‌ له‌لا شیرینه‌
    له‌بری ماڵ و ته‌لاره‌كان
    دڵت به‌خشیووه‌ به‌ سه‌نگه‌ر
    گڵی خه‌نه‌كی ناوخۆیی بۆت سه‌رینه‌!!

    عێراق
    نیشتمانی ئاخ و داخ و كه‌فوكووڵ و
    خه‌م و كه‌سه‌ر..
    خاكی په‌ژاره‌ و پرسه‌ و شین
    وڵاتی مه‌ینه‌تی و گریان
    دژ به‌ خه‌نده‌ و پێكه‌نین و شادی و سه‌یران
    ئه‌ی هاوپه‌یمان له‌گه‌ڵ شه‌یتان..
    له‌ سۆمه‌ره‌وه‌ تا ئاشوور
    له‌ باكووره‌وه‌ تا باشوور
    سه‌دا و ناڵه‌ی ناخ و ده‌روون
    هه‌موو ده‌ڵێن: ( به‌نه‌فره‌ت بیت.. تونی بابا و ئاوی ئامون )
    ئه‌ی بۆ خه‌ڵكی وڵاتی خۆت
    بێ‌ وه‌فا و به‌ زه‌بر و زاڵم،
    بۆ بێگانه‌ و ناكه‌س به‌چه‌ش
    بێ‌ هه‌ڵوێست و شاگردی به‌رده‌ست و ملهوڕ..
    ئه‌ی كه‌سێتیی هه‌رده‌م هه‌پروون
    زه‌لیلی بێ‌ هاوتا و زه‌بوون!!

هه‌میشه‌پایزی  2011

Previous
Next
This site is registered on wpml.org as a development site.