فایله فه‌رامۆشکراوه‌کانی حکومه‌ت …. یوسف منتک
به‌چرپه له‌گه‌ل دکتۆر به‌رهه‌م دا،ئه‌گه‌ر کاتت هه‌بوو ئه‌م ره‌شنووسه‌ی ئێمه‌ش بخوێنه‌وه،منیش کورێکی ئه‌م وولاته ره‌نگ تۆزاوییه‌م که‌له‌سه‌ر ده‌ریای نه‌وت وه‌ستاوه،ئه‌و وولاته‌ی سه‌رتاپای گه‌نده‌لی ته‌نیویه‌تییه‌وه، مه‌رگی هه‌ژاریش ده‌ستی له‌بینه‌قاقای زۆرینه‌ی خه‌لکداناوه‌و به هه‌ناسه‌برکێ‌ی خستوون به‌ئاسته‌م نووزه‌یان دێی،جیاوازییه‌کی ته‌واوی چینایه‌تی به‌دی ده‌کرێ،داهات وسامانی وولات که‌مینه‌یه‌کی ده‌سه‌لاتدار سوود مه‌ندن،ڕێژه‌ی هه‌ژاریش له هه‌لکشاندایه!،نزیک بونه‌وه‌وتێکه‌لیت له‌گه‌ل خه‌لک بۆ ئاگاداری له چۆنیه‌تی ومعاناتی ژیانیان به‌سۆزی ودلسۆزی سه‌رۆکێکی راسته قینه‌ت پێ ده‌به‌خشێت مێژوویه‌کی پڕ له سه‌روه‌ری تۆمارده‌که‌یت،ئاگاداریت له یاریه‌کانی هه‌لبه‌زودابه‌زی نرخی بازار به‌به‌شیکی دانه‌براو ده‌بیت له‌ژیانی خه‌لک،ئێمه هه‌موومان بۆژیان خولقاوین،به‌لام ئێمه‌ی مرۆڤ بوین به‌تۆپی تێنسی ده‌ستی یاری که‌ره‌کانی ده‌سه‌لات،هه‌موومان چه‌ند سالێک زیاد یاکه‌م له‌یه‌کتری ده‌ژین،رۆله‌ی نیشتمانێک ونه‌ته‌وه‌یه‌کین ویه‌ک زمان وناسنامه‌مان هه‌یه،جیاوازی ره‌نگه‌کانه ژیان سه‌ختتر ده‌کات ئه‌م هه‌موو جیاوازییه بۆ؟، ئه‌گه‌ر خه‌بات به‌رخوودانه ،به‌لام نا،خۆ ئێمه‌ش خاوه‌ن مێژوویه‌کی رۆژانی سه‌ختی خه‌باتین من ئه‌م وئه‌و فلان،به‌لام رۆژگاری جیاوازه ئیمرۆ له‌گه‌ل دوێنێ، زۆرجار سه‌قاڵی وپڕکاری وا له‌مرۆڤ ده‌کات سنوری کاره‌کان تێبپه‌رێنێ‌وئه‌رکه پێسپێردراوه‌کانی فه‌رامۆش بکات ،به‌لام ئه‌وه له‌کۆمه‌لگه‌ی به‌حزبی بوونی ژیان یا که حزب سه‌رجه‌م لایه‌نی ژیانی ئینسانه‌کانی کۆنترۆلکردبێ ئاساییه،ده‌زانم ماوه‌یه‌که جموجۆلی چالاکیه‌کانت له سنورێکدا چرکردۆته‌وه،لۆمه‌ت ناکه‌م ده‌زانم وه‌زعه‌که شلۆقه،که‌چی نوسینگه‌ی سه‌رۆکی حکومه‌ت ماوه‌یه‌که له‌چاوه‌روانی ره‌حمه‌تی به‌رێزتاندایه،ئه‌وراقێکی زۆری ئیمزانه‌کراو به‌بارته‌قای قه‌تاره‌ترێیه‌کی خزمانی خۆشناوه‌تی چاوروانی ره‌حمه‌تی نوکی قه‌له‌می سه‌وزی جه‌نابتن، دلنیابه ئیمزایه‌ک تروساکایی هیوای ژیان ده‌گه‌رێنێتوه نێو خێزان ، خێزان بناغه‌ی پێکهاته‌ی کۆمه‌له، هه‌ر ئه‌و خیزانانه‌ش ده‌نگده‌ری هه‌لبژاردنه‌کانن،پێم باشه سه‌رنجتان بۆ چه‌ند فایلێک رابکێشم که‌پرسی گرنگی حکو‌مه‌ته‌ن!.
یه‌که‌م/ رێگری کردنت له‌به‌قاچاخ بردنی نه‌وت بۆ‌ده‌ره‌وه‌ی هه‌رێم زۆر که‌س لێت دلگران ده‌بن چونکه پاروه چه‌وره‌که‌یان نامێنێ،ئه‌م پرسه هه‌رایه‌کی زۆری لێکه‌وته‌وه ،چه‌ند ساله پاره‌ی ئه‌و نه‌وته ناچێته خه‌زێنه‌ی حکومه‌ت،ئه‌رکی حکه‌مه‌ته ئه‌وه بۆ هاوولاتیان روونبکاته‌وه.
دووه‌م/ حکومه‌ت ده‌بێ شه‌فاف و راستگۆ بێت،حکومه‌تی هه‌موان بێت،ئه‌گه‌ر نا متمانه‌ی خۆی له‌ناو خه‌لک له‌ده‌ست ده‌دات.
سێهه‌م/ تۆپبارانکردنه‌کانی هه‌رێم له‌لایه‌ن وولاتانی ئێران وترکیا رابگیرێت،ئه‌وان به‌رژه‌وه‌ندیان له‌کوردستاندا هه‌یه سه‌دان کۆمپانیای ئه‌م وولاتانه له کوردستان وه‌به‌رهێنان ده‌که‌ن،ده‌توانن ئه‌وه وه‌ک وه‌ره‌قه‌یه‌ک به‌کار بهێنن، ته‌نها له‌هه‌ندێک پرس کوردستان خۆی وابه‌سته‌ی عێراق ده‌زانێ، ئه‌و تۆپبارانکردنانه پێشێلی سیاده‌تی عێراقه ،له‌به‌رامبه‌ردا هه‌موو دوونیا له‌م پێشیلکارییانه ئاگاداربکه‌نه‌وه، خوودی ولاتانی تاوانبار ،قه‌ره‌بوی زیان لێکه‌وتوان بکه‌نه‌وه.
چواره‌م/ سنورێک به‌رامبه‌ر پێشیلکاری رۆژنامه‌نووسان دابنرێ، ئه‌م هه‌موو ئیدیعای دیموکراسی وئازادییه ووروکاسی کردووین،کردارو شعار دوو شتی دژو نه‌گونجاون.
پێنجه‌م/ راگرتنی توندو تیژی وتیرۆری ژنان ، راپۆرتی رێکخراوه جیهانییه‌کان بۆ مافه‌کانی مرۆڤ،پریه‌تی له‌تاوانکاری به‌رامبه‌ر به‌ژنان ورۆژنامه‌نووسان وپێشل کارییه‌کانی مافه‌کانی مرۆڤ،ئه‌وه روویه‌کی ناشرینی حکومه‌ت له‌جیهانی ده‌روه نیشان ده‌دات.
شه‌شه‌م/ ڕێزگرتن له خۆپیشانده‌ران ، گوێگرتن له داخوازییه‌کانیان ،دابین کردنی خزمه‌تگوزارییه‌کان،چاو خشاندن به‌ژیانی خوێندکاران ، چاککردنی پرۆگرامی خوێندن.
حه‌وته‌م/ دابینکردنی لایه‌نی که‌می زه‌مانه‌تی کۆمه‌لایه‌تی، خستنه سه‌رکاری ده‌رچوانی زانکۆو بێکاران،که‌م کردنه‌وه‌ی دیارده‌ی بێکاری ودابینکردنی ژیانێکی پێویست بۆ هه‌ر تاکێکی کۆمه‌ل.
هه‌شته‌م/ زۆربوونی رێژه‌ی خۆکوشتن له‌کوردستان،به‌پێی راپۆرتێکی پۆلیسی ده‌ربه‌ندیخان له ماوه‌ی شه‌ش مانگی رابردوو 10 گه‌نجی خوێن گه‌رمی ئه‌م وولاته خۆیان کوشتووه،هۆکاره‌که‌شی نه‌بوونی بێکاری وبێزارییه له‌ژیان.
یوسف منتک/ئه‌لمانیا
Ragaz5@arcor.de
تێبینی/هیوادارم جه‌نابی سه‌رۆکی حکومه‌ت ئه‌م نوسینه بخوێنینته‌وه‌و سوودی هه‌بێت!.
