Skip to Content

Friday, March 29th, 2024
قۆچ ….بورهان ئه‌حمه‌د

قۆچ ….بورهان ئه‌حمه‌د

Closed
by August 25, 2011 ئەدەب

 



ئه‌وه‌ی ده‌ستی لێده‌درێ‌
ئه‌وه‌ی ده‌كێشرێ‌
ئه‌وه‌ی ده‌بینرێ‌
روناكیش ده‌خرێته‌ قه‌پانه‌وه‌
بۆی هه‌یه‌ سه‌نگه‌ر بگرێت,بیشكێنێ‌,یبگۆڕێ‌
له‌توانایدایه‌ كه‌ش و هه‌وای دیلێتی
به‌سه‌رفرازبوونی گوڵ ئاشتبكاته‌وه‌
هێزی راپه‌رین
ببه‌خشێته‌ ووزه‌یه‌كی سڕو چه‌سپاو
خه‌سڵه‌تی راپه‌ڕیو
بكاته‌ به‌ر سیحرێكی شاراوه‌
گرێ‌ كوێره‌ی باڵه‌كان بكاته‌وه‌
نووشته‌ی به‌ستانی فڕین بدڕێنێ‌
بۆچوون و گله‌یی و قایلبوون
هاوسه‌نگ رابگرێ‌.
ته‌رازوو به‌لای تاریكیدا لاسه‌نگه‌
كه‌واته‌ چه‌ند كیلۆی ترت رووناكی پێویسته‌
بۆ بڕینی ئه‌م رێگای مردنه‌
بۆ گه‌یشتن به‌باخچه‌
بۆ ناسینی ژیان
بۆ كێشانی ئینساف,
ته‌رازوو به‌لای لێڵیدا شۆڕه‌
كه‌واته‌ چه‌ند هكتار چوارگۆشه‌
مه‌ودای جوگرافیای دڵنیاییت ده‌وێ‌
بۆگه‌یشتن به‌هێوربوونه‌وه‌ی خوێن
بۆده‌ستلێدانی ویقاری شكۆفه‌
بۆتاقیكردنه‌وه‌ی نووسین له‌هه‌ستكردنی فه‌رامۆشیدا
به‌ژنی ته‌رازوو خه‌ڵتانی بێباكییه‌
ده‌ستی له‌بێنرخكردنی به‌های تیشكدا نییه‌
له‌مامه‌ڵه‌كردنی له‌گه‌ڵ هه‌تاودا
بۆپیشاندانی بێلایه‌نی خۆی
له‌هه‌ناویه‌وه‌ فرمێسك ده‌ڕژێ‌
بۆراگه‌یاندنی بێته‌ره‌فی خۆی
له‌چاوانیه‌وه‌ زوخاو سه‌رده‌كا
له‌به‌رخولیای تاقیكردنه‌وه‌
شته‌كان له‌قه‌باره‌یه‌كی ناجێگیردا
جێگاو رێگای جێگیریان به‌ركه‌وت
بۆشایی له‌سیمای گۆڕاندا
بارستایی نه‌گۆڕان و ناجوڵه‌ی
خسته‌ مه‌نجه‌ڵی نه‌ریته‌وه‌
گه‌یاندییه‌ گه‌رماوی پاكنه‌بوونه‌وه‌
نرخیان له‌به‌رزبوونه‌وه‌و داچوونه‌
گونجاوه‌كان ده‌بن به‌نه‌گونجاو
ناته‌باكان ده‌بن به‌ته‌با
خرۆشان له‌ته‌خته‌ ڕه‌شی بێده‌نگی ده‌نووسرێ‌
دژه‌كان له‌ناو یه‌كتردا
تێكه‌لاو ده‌بن
مانایه‌كی ترمان له‌تام ده‌داتێ‌
پێچه‌وانه‌ ده‌چێته‌ كلاسی ناپێچه‌وانه‌وه‌ی
یاخیبوون له‌سه‌ر كورسی متبوون
بۆچوونه‌كانی خۆیمان بۆ ته‌فسیر ده‌كا
نه‌گونجاوه‌كان كڵاوی گونجان ده‌كه‌نه‌ سه‌ریان
له‌به‌ر تینی سه‌رماوسۆڵه‌
له‌به‌ر ده‌سكورتی هه‌تاو
هاوین چه‌تر هه‌ڵده‌گرێ‌
جزمه‌یه‌ك تاسه‌رئه‌ژنۆ له‌پێ‌ ده‌كات
له‌به‌ر په‌لاماری باوبۆران
له‌به‌ر ده‌وڵه‌مه‌ندی لافاو
وه‌ك به‌شێك له‌جوانناسی
له‌به‌ر خاتری ستاتیكا
له‌شاردا فه‌ره‌نجی ده‌پۆشین
ده‌ستاڕوو جه‌نجه‌ڕوو هه‌وجاڕی
بۆ ده‌گوازینه‌وه‌
رووناكی گه‌ڵا دادگایی ده‌كا
ئاو زه‌رده‌خه‌نه‌ی له‌بیر ده‌چێته‌وه‌
واز له‌سه‌ردانی
هاوینه‌هه‌واری فێنكی ئارام ده‌هێنی
(ده‌فر ره‌نگی شله‌كه‌ی ناوخۆی وه‌رده‌گرێ‌)
ئه‌مه‌ حیكمه‌تی فیزیایه‌
ئاگری كۆن
به‌فووی تازه‌ هه‌ڵبووه‌
مرۆڤ له‌نیشتنه‌وه‌دا
گوناه…وخه‌تای زیاتر ده‌نه‌خشێنی
ته‌لاری تاوان به‌رزده‌كاته‌وه‌
له‌ڕاستكردنه‌وه‌یدا
باڵنده‌ به‌هه‌وای فڕین ده‌یسڕێته‌وه‌
خۆمان داهێنه‌ری چه‌قۆین
كه‌چی گیانله‌به‌ر باجه‌كه‌ی ده‌داته‌وه‌
بۆڕه‌ی گا ده‌بێته‌ فۆڕمی سروودێكی نوێ‌
لووره‌ی گورگ
له‌قوڕگی مه‌ڕدا
به‌هاوار مووتربه‌ ده‌بێت
باعه‌ باعی به‌رخۆڵان
بریسك وباسكی خه‌نجه‌ری به‌رهه‌تاوی نووستوو
گۆڕاوه‌ته‌ جوانترین سه‌مفۆنیای
نه‌غمه‌ی خه‌یاڵی دووای نیوه‌شه‌وی
ته‌ور به‌ده‌ستان
خه‌زێنه‌ی ده‌نگی بولبول
به‌رێبه‌رایه‌تی پشیله‌و رێوی
ده‌گوازرێنه‌وه‌ بۆشوێنیكی نادیار
كه‌ڵه‌شێر ئه‌زموونی كونه‌په‌پوو
دووباره‌ ده‌كاته‌وه‌
قه‌ڵه‌ڕه‌ش وازهێنانی خۆی راگه‌یاند
به‌زه‌یی بیابان ده‌گه‌یه‌نێته‌ ئاوه‌دانی
هه‌ور شوێن پێی باران هه‌ڵناگرێت
باران پروشه‌كانی خۆی ناناسێته‌وه‌
ساڵانه‌ به‌گوێره‌ی گوناهه‌كانی ئینسان
به‌پێی سه‌رژمێری پرۆسه‌ی راوكردن
ئێسك وپروسكی ئاژه‌ڵان
ده‌كرێنه‌ په‌یین
خوێنی میوه‌جات ده‌خرێته‌ سه‌ر سفره‌
به‌هه‌شتی پێ‌ ده‌رازێته‌وه‌

بورهان ئه‌حمه‌د

Previous
Next
This site is registered on wpml.org as a development site.