لاپەڕە یەک لە کتێبی ژن … هاوڕێ ڕەش

 

-١-

هەموو بەیانیەک

لێوی گوڵ

خوناوی ژنێ ماچ

ئەکا

-٢-

لەنگەری شیعر

ژنێکە

ئەوکاتەی دەستی

لە ملی دەریایە

-٣-

بۆ ژنێ

پایزم مارە کرد لە سنەوبەر

-٤-

من و عیسا

لە ژن ناگەین

بۆیە مریمەکان

قوتابخانەن

-٥-

خۆخێک بەخۆی

پێکەنی

ئەوکاتەی ڕوومەتی ژنێکی

بینی

-٦-

ڕەشەبا

دەلاک نیە بۆ

شانە کردنی

بسکەکانی ژنێ

-٧-

ژنێ ویستی گوڵێ

بۆنکا

گوڵەکە پڕ بوو لە

بۆن

-٨-

سیەکانی دەریا

هەوای

ژنێ هەڵئەمژن

-٩-

لەسەر دەرگای

دڵی من

نوسراوە

تەنها ژن بۆیان هەیە

بێنە ژوورەوە

-١٠-

ژنێ

ویستی گوڵەکان لە باوەش بکا

گوڵەکان

بون بە باخەوان

 

هاوڕێ ڕەش