له‌دایکبوونه‌وه ….سه‌لام محه‌مه‌د
مێشکم به‌تاڵ ئه‌که‌مه‌وه
به‌تاڵ به‌تاڵی ئه‌که‌مه‌وه
له هه‌موو ئینسانه به‌تاڵه‌کان
له هه‌موو جه‌نگ و رووداوه به‌تاڵه‌کان
له هه‌موو کتێبه به‌تاڵه‌کان
له هه‌موو فه‌لسه‌فه و شیعره به‌تاڵه‌کان
له هه‌موو ئاین و نوێژه به‌تاڵه‌کان
به‌تاڵ به‌تاڵی ئه‌که‌مه‌وه
له هه‌ڵمژینی لێوی به‌تاڵ
له میزڵدانی مه‌مکی به‌تاڵ
له ماچی به‌تاڵ
له خۆشه‌ویستی به‌تاڵ
له دۆستایه‌تی به‌تاڵ
له فرمێسك و زه‌رده‌خه‌نه‌ی به‌تاڵ
له کچه کووله‌که‌ی به‌تاڵ
له سه‌ری به‌تاڵ
له ئه‌قڵی به‌تاڵ
له تام و بۆنی به‌تاڵ
له شووشه عه‌تری به‌تاڵ
له هه‌زاره‌ها بوتڵه ویسکی به‌تاڵ
= = = = = = =
یه‌ك به یه‌ك هه‌موو سه‌رخان و ژێرخانی
یه‌ك به یه‌ك هه‌موو ئه‌ندام و ئۆندام و ئیندامی
شانه‌کانی مێشکم
هه‌ڵئه‌وه‌شێنمه‌وه
به‌تاڵ به‌تاڵیان ئه‌که‌مه‌وه له ئه‌تڵه‌سی به‌تاڵ
له دارستانی به‌تاڵ
له خانووی به‌تاڵ ، ژووری به‌تاڵ
له کورسی به‌تاڵ
له په‌ڕله‌مانی به‌تاڵ
له سیاسی و دیپلۆماسی و دیموکراسی به‌تاڵ
ئای که مێشکم ده‌مێکه دزراوه
له‌شکری بۆشایی و تارمایی
پایته‌خته‌که‌یان داگیرکردووه
پراوپڕیان کردووه له هه‌ناسه‌ی تاریکایی
به‌تاڵ و حه‌تاڵ بۆته‌وه
له ئاسووده‌یی و رۆشنایی
= = = = = =
ئه‌گه‌ر له دوای ئه‌م به‌تاڵبوونه پڕ ئه‌فسوونه نه‌مردم
له ره‌گوڕیشه‌وه
خه‌ریته‌ی مۆخ و ده‌ماغم ئه‌گۆڕم
خه‌ریته‌ی کۆڵانه‌کانی ناوه‌وه‌م ئه‌گۆڕم
خه‌ریته‌ی دڵم ئه‌گۆڕم
خه‌ریته‌ی هه‌موو په‌یوه‌ندیه‌کانم ئه‌گۆڕم
خه‌ریته‌ی هه‌موو بیرکردنه‌وه‌م ئه‌گۆڕم
خه‌ریته‌ی نووسین و خوێندنه‌وه‌م ئه‌گۆڕم
خه‌ریته‌ی سه‌رتاسه‌ری
خۆم و نیشتیمانه‌که‌م ئه‌گۆڕم
= = = = =
سوید
19 / 03 / 2011
