لێکدانەوە … نەوزاد بەندى
-1-
مناڵ بووم ..
وامئەزانى ئەگەر پارەم هەبێ و
ئۆکۆردیۆنێ بکڕٍم ،
ئەتوانم وەکو مامۆستا ولیەم ، بیژەنم ..
-2-
سنەوبەرەکانى کارێزى وەستا شەریف ،
جێى سەعیکردنى کوڕە هەژارەکان بوو..
( وامئەزانى لە برساندا ، سەعى ئەکەن )
-3-
گۆرانیبێژێ هەبوو ،
ناوى عەلى عەزیز بوو ،
بە چاکەتێکى سەراوینەوە ،
ئەم گۆرانیەى ئەوت :
ئەى شەوەکەى بێ تروسکەى دڵ تەنگیى ..
( ئەموت کە گەورە بووم ،
چاکەتێکى سەراوین ئەکڕم ..
هەر چوار قۆپچەکەى ئاڵتونى بێ ..
قژیشم وەکو ئەو درێژ ئەکەمەوە و
ناهێڵم باوکم بە زۆر ،
لاى وەستا کەریم بۆم بتاشێ )
-4-
بە منداڵى هیوایەتێکم هەبوو ،
کۆکردنەوەى قۆپچە ..
جارێکیان بە دایکم وت :
کراسەکانمان ئەخەینە ژێر پانتۆڵەکانمان ،
بەو جۆرە ، هەست ئەکەم دوو قۆپچەیان زیادەیە ،
بۆچى لێیان نەکەمەوە ؟!!
دایکم ڕاوى نام و هاوارى کرد :
نەوە قۆپچە ! هەر کراسەکان مابون ،
سەقەتیان کەى ؟؟
( هەستم ئەکرد قۆپچە لە هەندێ هەڵوێستا ،
حوکمى فیشەک و دۆلارى هەیە ..
یەک قۆپچە دوو مەمک ئەشارێتەوە ..
یەک قۆپچە دەرگاى خێمەیەک دائەخا ..)
-5-
ماڵى عەلى بەگ تەلەفزیۆنیان هەبوو ..
ماڵى عەلى بەگ تەباخى تێکنۆگازیان هەبوو ..
ماڵى عەلى بەگ بە شەواندا کێکیان دروست ئەکرد ..
( یەکەم سەرنجى تەلەفزیۆن و یەکەم قەپاڵى کێک لە ژیانما ،
لە ماڵى عەلى بەگ بوو ..
ئاخر من هاوڕێى کوڕە بچوکەکەى بووم ..
هەردووکمان لە پۆلى یەکى سەرەتایى بووین ..
بە پشوى هاوینا ،
ماڵى عەلى بەگ ئەچوون بۆ بەغدا ،
ئێمەیش وەکو کوللە زەردە بەر ئەبووینە کارێزەکەى وەستا شەریف و
درەختەکانى مامە یارە … )
ئەو سەردەمە بەغدا لاى من کۆمەڵێ کۆشکى سپى بوون ..
لەگەڵ کۆمەڵێ فرۆشگاى پاک و خاوێن ..
کە ئەوان ئەچوون بۆ بەغدا ،
هەستم ئەکرد من بێ کەسم
هەستم ئەکرد من خوێڕیم ..
-6-
جانتایەکى قاوەیى کاڵم هەبوو ..
مارکەى جلود ..
چوار ساڵى زانکۆ و سێ ساڵى سەربازى ،
هاوڕێیەکى خەمگینى سەفەرەکانم بوو ..
بە بێ دەنگیى ،
کتێب و
دەفتەر و
کراس و
کولیچە و
هەموو شتێکى بۆ هەڵئەگرتم ..
( بە داخەوە !
کە بە کورسى فەرمانگەوە لەحیم کرام و
سەفەرم لە خۆم یاساغ کرد ،
ئەو جانتایەشم دیار نەما )
هەندێکجار ئەپرسم :
تۆ بڵێى نەچوبێ بۆ هەندەران ؟
یان دووربا خۆى سوتاندبێ ؟
یان ماکیاجێکى کردبێ و
حیزبێکى دامەزراندبێ ؟!!
-7-
یەکەم ڕۆمان ،
(تەنەکە ) بوو ،
بە نیوەڕۆیەکى گەرمى تەموز ،
لە ژێر دارهەنجیرێکى ماڵى باوکم ،
خوێندمەوە ..
(لەوە ڕۆژەوە یەشار کەمال ،
بووە بە باوکى ئەدەبیم ..
لەبەردەم ڕۆمانەکانیا هەڵئەلەرزم
وەک شۆڕبیم )