لەپشتی هەورە دوورەکانەوە ! …نەهرۆ
کە گوڵی ئاگاییم پشکووت، دەیانگوت پاڵایشگای نەوت هەیە، من نەمدەزانی کەوتوتە کوێ ماڵمانەوە، لە خەیاڵی خۆم دا دەمروانی بۆ باشور، لەوێ تەپوڵکەکان لەگەڵ هەوری ڕەش تێکەڵ دەبوون وەک شەپۆلێکی خوڵەمێشی وتەمتومانێکی تاریک خۆیان دەنواند، وامدەزانی پاڵایشگای نەوت لەوێ یە، چەند خۆشە یادەوەری مناڵی کە هەموو دیاردەکان لە پشتی هەورەکانەوە دەبینێ، بەشێوەیەکی وەهم ئامێزو ئالودە و لێڵ بیردەکاتەوە، بەمناڵی ییش باوکم پێ دەگوتم ئەم کوڕەم دەبێتە حەشاش ! لەوانەیە قەواڵەی ئێستای منی خۆیندبێتەوە کە ئیشم ئەوە دەبێ لەسەر فانتازیا کار بکەم! لەرووی رۆژهەڵاتەوە بەئاراستەی دیوی ئێران دا باسی گوندی ( سەی بەرزوو ) یان دەکرد کە کەوتبوە سەر سنور، روانینم بۆ ئەم گوندەش لەپشتی هەورەکانەوە بوو دەیانگوت خەڵکەکەی ئیشی قاچاغ دەکەن، سنوقی چای ئەبەن بۆ ئێران لە وێیەوە پارچە قوماش و کەوشی میللی دەهێنن، لە رێگای تەلەفزیونەوە پروپاگەندەکانی ئێرانمان دەبینی بۆ رەواج دان بەکاڵاکانی، من نەمدەزانی قاچاغچیتی کارێکی قەدەغەیە، تا رۆژێکیان پیکابێکی شینم بینی پڕ بوو لە قوماش، پیکابیکی تری سەوزم بینی هی پۆلیس بوو چەکی (برێنی ) لەسەر بوو، برێن جۆرە چەكێکی قورس بوو بۆ راوی قاچاغچی کەران پۆلیس بەکاری دەهێنا ! بە دوایەوە بوو، کاتێ پیکابە شینەکە پێچی کردەوە، عەدەد برینەکە تەقەی لێکرد، گولەکان بە رێکەوت بەر بۆڕی نەوت کەوتن ! لە ماوەیەکی کەم دا خەرمانێک نەوتی ڕەش کۆبوەوە، خەڵکیش بە هەڵیان زانی، تەنەکەو بەرمیلی بچوکیان هینا، نەوتەکەیان ئەبرد بۆ ماڵەوە تاوەکو لە کاتێ نان کردن دا تەنوری پێ گەرم بکەن، نەوتەکە چەند مەترێک لە ماڵمانەوە دوور بوو بۆیە دایکمان توانی لە خەڵکەکەی دی زیاتر نەوت پاشەکەوت بکا، دواتر کە خەڵکەکە نەوتیان لێ برا ئەهاتن لە دایکم نەوتیان دەکڕی، تەنەکەیەک بە پەنجا فلسی ئەو کاتە، کاتێ کرێکارانی پاڵایشگا ئاگادار دەبوونەوە کە بۆڕیە نەوت شکاوە، نەوتەکەیان دەگرتەوەو چوار پێنج کرێکاریان بە ماشینەوە ئەنارد، سەرەتا لە ژێر کونی بۆڕیەکە چاڵێکیان هەڵکەند، دواتر لاستیقیان بە دەوری بۆڕیەکەوە ئەپێچاو دوو پارچە قەفیسی ئاسنین یان لەسەر دائەنا بە بورغی ئەیانبەست !
لەهەندێ شوێن دا بۆڕیەکان بە بنی ئەرز دا تێپەڕ ئەبوون، بۆیە زوو، زوو ژەنگی هەڵدەهێناو کون ئەبوو، ئیدی خەرمانەی نەوتی ڕەش وەک ماستی مەییو کۆ دەبوەوە، خەڵکەکەش هەمان کایەیان دووبارە دەکردەوە !
کونی بۆڕیەکان ئەوەندە نزیک ماڵی ئێمە بوون تاکو هەندێ جار کرێکارەکان ئەهاتن لە ماڵی ئێمە چایی یان دەخواردەوە، کرێکارەکان بەدلەی شینیان لەبەر بوو، مانگانە مووچەیان وەردەگرت، مناڵی کرێکارانی پاڵایشگای نەوت لەگەڵ مناڵانی تر جیاوازییان هەبوو، جۆرێک لە دڵنیایی یان لا بوو!
باوکم ڕانندەی ماشینی خەڵک بوو، مانگێک ئیشی دەکرد، شەش مانگ بێکار بوو، بەمناڵی زۆر حەزم دەکرد باوکم وەک ئەو خەڵکە لە پاڵایشگای نەوت ئیشی بکردبایە ! لەدەمی دایکمەوە دەمبیست کە کرێکارانی پاڵایشگای نەوت خانەنشینیان هەیە، تەنانەت ئەگەر نەخۆش بکەون یان بمرن مووچە ئەدەنە مناڵەکانیان، دراوسێ یەکمان هەبوو باوکیان مرد بوو، دایکەکەیان لەگەل چەند کورێکی دا مابوونەوە، لەبەر ئەوەی لە پاڵایشگا ئیشی کردبوو، دایکەکەیان هەموو مانکێک ئەچوو بۆ شاری باقووبە لەوێ مووچەکەی وەردەگرت !
کرێکارانی پاڵایشگا سەری مانگانە دەچوون بۆ بازار، عەرەبانچی یەکی دەربەستیان ئەگرت بە فەردەو تەنکە شتیان دەکڕی هەر لە ئاردو برنج و فاصولیاو نیسک تا دەگاتە ئاوتەماتەو رۆن بە بەرچاوی دەرودراوسێ یەوە دەیانهینایەوە!
کەچی ئێمە وا نەبووین دوکانداریکی دراوسێ مان هەبوو، پیاوەکەی چاو شینێکی نیگا کز بوو بەڵام ژنەکە جوان و هەمیشە دەم بە پێکەنین بوو، دەچوین بە کیلو جاروبار بەقەرز شتمان لەوێ دەکڕی، هەندێ بەیانی لەخەو هەڵدەستاین لە پڕێکا دایکم دەیگوت چایمان نەماوە، منی ئەنارد بایەی پەنجا فلس چایمان دەکڕی !
ماوەیەک بوو باوکم بێکار بوو، رۆژێک گەرایەوە دوو کیلو تەماتەو (کابرێتەیەک) ی ماشینی پێ بوو، دڵمان خۆش بووەوە، لە دڵی خۆمان گوتمان ئیشی دۆزیوەتەوە، بە خۆشحاڵییەوە تەماتەو رۆنمان دروست کرد دوایی چایی مان خواردەوە ! کە لێ بووینەوە، باوکم لە ناو تارماکە کە نیوەڕوان رۆژ دەیگرتەوە، بورغی بە بورغی کابرێتەکەی کردەوە بە نەوت هەموو پارچەکانی شووشت و فوی لێکردن تا پاک بنەوە دیسان بەستایەوە!
کە دوایی لێبوەوە بە ئەسپایی لێم پرسی باوکە ئیشت دەست کەوتوە، لە وەڵام دا گوتی کوڕم نە، ئەمرۆ لای فیتەرێکی رەفیقم بووم، پێگوتم ئەو کابرێتەرەم بۆ بشۆ نێو دینارت ئەدەمێ، منیش ریسەکەم لێ بوو بە خوری و هاتمەوە سەر سیفر، گەرچی مناڵ بووین بەڵام درکمان بەوە کردبوو، بێ ئیشی ئەو بەواتای نەبوونی خواردن و برسیتی، کاتێ کە ئیشی دەست دەکەوت غەدری نەئەکرد دەست بڵاو بوو بەرانبەر ئێمەو تەنانەت بەرانبەر خەڵکی بێگانەش !
لەوەرزێکی هاوین دا بووین، بۆ چەند رۆژێک باوکم دیاری نەما، گوتمان لەوانەیە چووبێ بۆ بەغدا بە دوای ئیش دا بگەرێ، خاوەن هۆتێلێکی رەفیقی هەبوو بە ناوی عەلی عومەری، جاروبار دەچوو لای ئەو دەمایەوەو رۆژانەش بەدوای ئیش دا دەگەرا، لەم کەین و بەینە بووین دایکم بە من و برا گەورەکەمی گوت، ئەوە باوکت بۆ نەهاتەوە بەڵکو بچن بۆ گراجەکەی حەسەن شەل سوراغی بکەن، لەبەر ئەوەی ماشینی گوندە دوورەکان دەهاتن بۆ ئەوێ، گوتی برۆن لەو خەڵکە بپرسن بزانن باوکت نەچووە بۆ ئەو گوندانە بەمەبەستی ئیش کردن لەسەر (دەراسە) ماشنی دروێنە، چووین نزیکەی سەعات دەونێوی پێش نیوەرۆ بوو، براکەم پرسیاری ئاراستەی چەند کەسێکی کرد لە خەڵکی ئەو گوندانە بەڵام هیچ زانیاری یان لا نەبوو تا لە ناکاو زەلامێکی ریش سپی گوتی ئێوە کوڕی ئەون، گوتمان بەڵی، گوتی وا لە گوندەکەی ئێمە خەریکی درەوە(دروێنە)!
گەراینەوە مژدەمان دایە دایکم و براو خۆشکەکانی ترم، ئەوانیش خۆشحاڵبوون، دایکم مژدەی دوورینی کراسێکی سەوزی پێدام، دایکم ماشینی دوورمانی هەبوو تەنیا بۆ خۆمان جلی ئەدووری، هەروا چنینی لەچک و دورینی عابایش دەزانی بەڵام وازی لێهینابوو بە بەخێوکردنی مناڵەوە سەر قاڵ بوو، لەوەتەی من بیرم دیت ئەو کورپەی بە سینگەوە بوو، یازدە مناڵی خستەوە هەر بە خۆرسکی و رێنمایی دەرو دراوسێ گەورەی کردن، کەچی لە وڵاتانی روژئاوا ژنێک سکی پڕ بێت دەورەیەکی چەند مانگی بۆ ئەکەنەوە تەنانەت رۆژیکیان لە دەورەیەکی دائیرەی کار دا بووم، یەکێک لە هاوڵاتیانی خۆیان توڕە بوو، گوتی ئەوە چی یە هەر ئەوە ماوە پێمان بڵێن تەماتە چۆن دەخورێ، پولەکەی بەجێهێشت و چووە دەرەوە!
نێوەرۆیەکی گەرم بوو کراسە سەوزەکەم لەبەر دابوو، لەبەر دەرگا ڕاوەستا بووم، باوکم جێبێکی ئەمریکی پێبوو، بەرمیلێکی گازی تیا بوو، خۆی و شاگردەکەی بوون، لە ماشینەکە دابەزی ماچێکی منی کرد، شاگردەکەش جێبەکەی برد، ماوەیەکی پێچوو باوکم لە ماڵ حەوایەوە، لەبەر ئەوەی لەشی کون، کون ببوو و خوێنی تیا زابوو گوتی شەوورۆژ ئیشم کردووە بۆیە گێژ بوومەو کەوتومەتە بەردەمی دەڕاسەکەوە لە کاتێ ئیش کردندا !
رۆژێکیان شاگردەکەی لە دەرگای حەوشەمانی دا چووینە دەرەوە لەگەڵ باوکم دا، شاگردەکە گوتی خاڵو، خاوەن دەڕاسەکە گوتویەتی، ئەگەر نایەت بە دوای ئیشەکەی دا ئەوە خۆت برۆ ئیشەکە بکە، ئەم قسەیە هەستی باوکمی بریندار کرد بوو کە دوایی لە دەمی خۆیەوە زانیمان، یەکسەر پێگوت فەرموو کوڕم خۆت برۆ ئیشەکە بکە !
پێمانگوت باوە بۆ نەرۆیشتی بۆ ئیش، لەوەڵام دا گوتی، ئەو شاگردەم بێ باوک و هەتیو بوو، بەزەییم پیا هاتەوە، فێری لێخورینی دەڕاسەم کرد و چونیەتی دروێنە کردن، ئێستا زۆر بێ شەرمانە لە رووم دا بەم شێوەیە قسە دەکا !
جارێکی دیکە کەوتە جیهانی بێ ئەمانی بێکارییەوە، کە دەمە قاڵیان ئەبوو لەگەڵ دایکم دا، دایکم قوتووە نەوتێکی لە تەک خۆی دائەناو دەیگوت هەر ئێستا خۆم دەسوتێنم ئێمەش لە دڵە خورپەی بەردەوام دا دەبووین، باوکیشم هەموو جارێ ئەم رستەیەی دووبارە دەکردەوە، من ئیش بکەم و نەکەم وەکو یەک وایە، ئێوە دەژێن، کە گەورە بووم نهینی و مەودای ئەم رستەیەم لە پەرتووکێکی بیرمەندی میسری، سوسیالیست خواز ( سەلامە موسی ) دۆزییەوە، کە پوختەکەی دەڵێ ( دوو کەس تێر ئەبن یەکێکیان بە پەتاتە ئەوی دیکەیان بە گۆشت ) خوزگە ئێمە پەتاتەکەشمان هەبوایە، ئەو دەمە پەتاتە لای ئێمە تامی گوشتی ئەدا !
ئاخۆ ئێستا چەند خێزان هەبێ لە ناوەوەی وڵات هەروا لە سەراپای گۆی زەوی، ئەفریقا، ئەمریکای لاتین وەکو ژیانی ئەوسای ئێمە دەژێن !
کاتێ زیاتر چاوی ئاگاییم پشکووت، شوین و جوگرافیای پاڵایشگای نەوتم بەواقعی دیت، ئیدی کەمتر دەمروانی بۆ پشتی هەورە دوورەکان!
زۆر جار من و پاڵایشگا تەنیا رووباری ئەڵوەنمان بەین بوو، لە نزیکەوە دەمروانی بۆ بڵێسەی ئاگرەکەی کە چۆن هەمیشە وەک ئەکسیری ژیان دادەگیرسێ، گلگامیش بیزانیایە ئەم بڵیسە هەیە نەچوو بۆ بنی دەریاو رووەکی نەمرێ بهێنێ بەڵکو ئەهات سەیری ئەم ئاگرە هەمیشە داگیرساوەی ئەکرد کە چۆن لە پاڵی دا چەندین خەڵکی وەکو ئێمە بەهەژاری ژیانیان دەگوزەراند !
نەهرۆ / نەرویج
١١ / ٤ / ٢٠١٣
