لە خەو ڕاچڵەکان … دلۆڤان عەلی

ئەم بەیانییە

لە خەو ڕاچڵەکام

تەنیایی

وتی:

ڕۆژ باش

مناڵیم وتی:

ئەی نایەیتەوە بۆ لای من و

دەست ناکەیتەوە بە حەکایەتەکانت و

نابیتە موسافیرێک بەرەو عەدەم و

لە وێستگەی شەمەندەفەری غەریبی

سەفەرێک ناکەیتەوە بۆ لای جوانیەکان

ئای مناڵیم

چەند بێ ئەمەک بویت

پێت ڕەوا نەبینیم

بەیانیەک وەکو مناڵانی تر دەستێک بێنیت بەسەرماو

پێم بڵێی:

ها ئەو نوقڵە بگرە

بۆ چاوەزار باشە

ها ئەوە هەزارێکی چرچ و لۆچی دڕاو و

بیدە بە میزڵدانێک

با لە ئاسمانا دور دور بفڕێت

دەست بکەوە بە حەکایەتەکانت

نا نا تەواو

مناڵیم پۆستەرێک بوو

بە دیواری کۆڵانێکی غەریب هەڵواسراو

زوو دڕێندراو و

دور دور فڕێیاندا

مناڵیم کڵۆ بەفرێک بوو

باری و تەنیایی تواندیەوە

ئای

لەم لە خەو ڕاچڵەکانە

ئای مناڵیم

تۆ لە کوێیت لە کوێیت مناڵیم

کۆتایی بەم تەنیاییە بێنیت

ئای مناڵیم

دلۆڤان قەڵادزەیی