میرات …کەنعان مەدحەت

به‌ گزنگی
هه‌ر وه‌رزێکه‌وه‌ پاڵده‌دم
په‌ڵه‌هه‌ورێکی چڕ و
به‌رینتر
ئاسۆی داده‌گرێ
سه‌رگه‌ردانییش
میراتی هه‌میشه‌یی و
نابڕێته‌وه‌

‌‌‌بست به‌ بستی
گڵه‌ بێبارانه‌کانی دڵم
بە هەڵاتنی شەبەق ته‌ڕ ده‌که‌م 
بێ ئه‌وه‌ی فێنکە سروەیەک
روو لەم پەنجەرە کراوەیە بکات
ده‌ڕۆم و
پەیوەستی پەیام و
گوێڕایەڵی ڕێنماییەکانی‌‌
په‌له‌ی خولە بێئۆقرەکانمم
وه‌کو تووله‌ڕێیه‌کی نهێنی
ماندو و
کۆتایی نه‌هات
تا پێکه‌وه‌ ده‌شکێینه‌ دیوی
هه‌زاربه‌هه‌زاری که‌نێکی تری سات
دەزانی چی دەڵێم و
چەندم لێ دەکڕێنی؟!

له‌نده‌ن
نۆڤه‌مبه‌ری ٢٠٠٨