نیشتمانى دەرەجە دوو …. نەوزاد بەندى
-1-
چەن دزێ
نقێمى موستیلەکەیان دزى ..
-2-
چەن کافرێ ،
سەرپۆشەکەیان لێ کڕى ،
بە نرخێکى خەیاڵى !
-3-
چەند چەتەیەک ،
حەوت – هەشت چەقۆیان لێدا ..
-4-
کۆمەڵێک
بازرگانى بیانى ،
گورچیلەکانیان دەرهێنا ..
هێلکەدانەکانیان دەرهێنا ..
جگەر و پەنکریاسیان فرۆشت ..
(فێرى تەقینەوەیان کرد ..
کۆمەڵێ قومبەلەیشیان ،
لە بن هەنگڵ و
ژێر چەناگەیدا ڕواند،
بۆ یادگارى ! )
-5-
مناڵێکى چەتون ،
دینارە قەدکراوەکانى ناو فەقیانەکەى فڕاند ..
بە بەرچاوى دەوریەک پۆلیسەوە ..
-6-
کۆمەڵێ ڕاوچى ،
ئاگریان بەردایە زوڵفى ..
بۆ ئەوەى کەروێشک و ژیشک و
کەوەکان ، بەرەو ڕووى تاپڕەکانیان ، دەرپەڕن..
-7-
کۆمەڵێ تەنکەر ،
مەمکەکانیان هەڵمژى ،
( قەت لێرە تەنکەر
لە شیرخواردن نابڕێتەوە ..
چونکە عەقڵمان ساوایە و گەورە نابێ )
-8-
کۆمەڵێ سەرخۆش ،
شوشەیەکى بیرەیان
بە تەوێڵیدا کێشا ..
-9-
هەزار و یەک قەسەب ،
خرایە پەرداخى نەوتەکەى .
-10-
بازاڕەکانى پڕ کران لە :
تلیاک
فیشەک
نێرگەلە
خواردنى ژەهراوى ..
دەرمانى ترسناک ..
ڕۆژنامەى ناحاڵى ..
جل و بەرگى ناشیرین ..
( ئاى ! چیت بەسەرهات ،
ن ی ش ت م ا ن !! )
-10-
من ئەزانم کەى ئاشتى بەرقەرار ئەبێ ،
ئەو کاتەى کە کۆمپانیاکانى چەکى قورس و سوک داخران ..
بەڵام هەتا پیاوى سوک لەو دنیایەدا بژین ،
نە کراسە شینەکانى یو ئێن سودێکیان هەیە ..
نە ڕیشە سپیەکەى بابا نوئێل ..
-11-
ئەمڕۆ بینیمیت ،
لەسەر عەرەبانەیەکى تۆزاوى ..
بە ناو ئاپۆڕەى کرێکارە بێ ئیشەکاندا ڕەت ئەبوى ،
بۆ ئەوەى برسێتى خۆتیان بەسەرا دابەش کەى ..
-12-
ڕۆژ و شەو
خاس و خراپ ،
ئەتکڕێننەوە..
نازانم چۆن تەواو نابى ؟