Skip to Content

Friday, March 29th, 2024
نەوزاد بەندى…  سیکڵدانۆچکە

نەوزاد بەندى… سیکڵدانۆچکە

Closed

 

 

 

 

-1-

پێشنیاز ئەکەم ،

حەربایەک بکرێتە بەرپرسى یەکەمى عێراق ..

کە بڕواتە باشوور ،

دشداشە و عەگاڵەکەى وەک ئەوەى سەعدلحلى بێ ..

کە بێتە باکوور ،

مشکى و چۆغەکەى وەک ئەوەى ڕەسوڵ گەردى بێ ..

بچێتە ناوەند ،

قات و سدارەکەى وەکو ئەوەى عەلى وەردى بێ ..

بچێتە هەورامان ،

سیاچەمانەى لێ بەرز بێتەوە ..

لە شارەزوور ، قەریحەى هۆرەى بکرێتەوە..

ئێمە پێویستمان بە حەربایەکە ،

بچێتە حوسەینیەکان ،

گیرفانەکانى پڕ بن لە 

زنجیر و توربە ..

بچێتە ئەنبار ،

پەلامارى بیرى نوێ بدات ،

وەک پشیلەى گوربە ..

 

 

-2-

عەزیزم .. بەو جۆرە شیعر نانوسرێ ..

خۆت توشى داواکارى یاسایى و

زیندان و

تێهەڵدان و

گۆڕستان ، مەکە ..

یەکەمجار وشەکان هەڵچنە ،

بە دەستوورى باب و باپیران ..

بە پیتە قاپقاپ لە پێکان ،

ئاوڕپرژێنى کە ..

ئینجا بە مەرایى ، شەربەتاو ..

پاشان بە دروشم ، لەبغى کە ..

بە ڕەنگى حیزبێکیش ، بۆیاخ ..

نەکەى لەوە زیاتر مەسرەفکەى ..

نەکەى ببى بە سوورى بەر لەشکر ..

دوایى ئەگەڕێیتەوە بۆ دواوە

وەک میزى حوشتر ..

 

-3-

نوسەرمان هەیە ، سکرابچیە ..

دەڕنەفیز و پلایس و چەکوش و سکولئیسپانەى هەیە ..

بە دەڕنەفیز چاوى وشەیەکى گۆران کوێر ئەکا و

ئەیخاتە دێڕێکى خۆیەوە ،

بۆ ئەوەى ئاشکرا نەبێ ..

بە چەکوش سەرى وێنەیەکى شیعریى مەحوى ئەشکێنێ و

ئەیخاتە ناو سەفەرتازى شیعرێکى خۆیەوە و

لە موساعید مەتبەخەکە دایئەنێ..

بۆ ئەوەى ماڵى مەحوى لێ ون بێ و

ببێ بە کوڕى خۆى ..

بە پلایسێک ملى ئایدیایەکى نالى ئەجەڕێنێ و

ئەیخاتە ناو سەنتەرى کەمتواناکانى خۆیەوە ،

بۆ ئەوەى نەیناسنەوە و

بە   زگماک لە قەڵەم بدرێ ..

بە سکولئیسپانە لوتى کۆپلەیەکى جەنڕاڵى پاییز ئەگرێ و

ئەیخاتە قاوشى نەخۆشخانەکەى خۆیەوە ،

بۆ ئەوەى بیکا بە ڕەعیەتى خۆى ..

چونکە هەر ئەبێ خۆى و خۆى و خۆى و خۆى ..

تەنها خۆى لە سکرینى تى ڤى و

تایتڵى یەکەمى

سینەماکانى ئەدەب ، دەرکەوێ ..

 

-4-

سیکڵدانۆچکە ،

دوا وێستگەى هەوایە و ..

ئیدى ئەبێ گەردیلەکانى ئۆکسجین دابەزن و ..

گەردیلەکانى دووەم ئۆکسید سەرکەون ..

نەمانئەتوانى یەک هەناسە هەڵکێشین..

دەستاو دەستى گەردیلەکان نەکرایە ..

دەستا و دەستى خانەکان نەکرایە ..

بە چرکەیەک ئەمردین)

 

 

 

 

Previous
Next
This site is registered on wpml.org as a development site.