Skip to Content

Thursday, March 28th, 2024
هه‌شت شیعری كورت……محه‌مه‌د كوردۆ

هه‌شت شیعری كورت……محه‌مه‌د كوردۆ

Closed
by April 10, 2009 ئەدەب

هه‌شت شیعری كورت
محه‌مه‌د كوردۆ
(1) ناو
به‌ڵێ‌ ئه‌وه‌ به‌ڵێنم دا
هه‌م به‌خۆم و
هه‌م به‌خوداو
هه‌م به‌دڵی‌ ترساوی‌ تۆ
لای‌ كه‌س ناوت نادركێنم
به‌ڵام به‌خوا
به‌چاوی‌ تۆ
ئه‌گه‌ر به‌حه‌زی‌ خۆم بوایه‌
هێند به‌كوڵ‌ بانگم ده‌كردی‌
دارو به‌ردو
خاك و ئاوی‌ ئه‌م وڵاته‌م
شه‌ڵاڵ‌ ده‌كرد به‌ناوی‌ تۆ!!
***
(2) دیكتاتۆر
من هه‌رگیز نازانم تۆچیت
زوو زوو خۆتم لێده‌گۆڕی‌
جارێ‌ مانگی‌ به‌تریفه‌ و
جارێ‌ ئه‌ستێره‌ی‌ پڕ ورشه‌ و
جارێ‌ خۆری‌
جار هه‌یه‌ جوانێكی‌ توڕه‌ و
ترسناكی‌،
جاریش هه‌یه‌
نازدارترین دیكتاتۆری‌!
***
(3) به‌راوورد
له‌و ئێواره‌ پرچ و په‌رچه‌م په‌شێوه‌دا
كه‌ڕه‌شه‌با شه‌ڕیده‌كرد
له‌گه‌ڵ‌ سه‌رما و كڕێوه‌دا..
من په‌نجه‌ره‌ی‌ دڵم بۆ تۆ خسته‌ سه‌رپشت
كه‌چی‌ گیانه‌ تۆ نه‌ك دڵت،
ده‌رگای‌ حه‌وشه‌كه‌ت پێوه‌دا..!
***
(4) كارگه‌ی‌ دڵ‌
-ته‌وقه‌مان كرد ده‌ستت گوشیم،
په‌نجه‌م زیڕه‌ی‌ لێوه‌ هه‌ستا!
-تۆ چی‌ ده‌ڵێی‌ ماڵئاوه‌دان،
من خه‌ریكبوو
كارگه‌ی‌ دڵم راده‌وه‌ستا!
***
(5) سه‌یره‌
تۆ ئافره‌تێكی‌ پێم سه‌یره‌
له‌به‌ر سه‌رما.. و
له‌به‌ر گه‌رما..و
له‌به‌ر زۆر ده‌ردی‌ گه‌وره‌دا
خۆت راده‌گری‌..
كه‌چی‌ كه ‌من،
سه‌یری‌ چاوه‌كانت ده‌كه‌م
تۆ ده‌ستبه‌جێ‌ سه‌ر داده‌گری‌..!!
***
(6) حه‌په‌سان
هات و سڵاوێكی‌ كرد..و
دیوانه‌ شیعرێكی‌برد..و
پاش ماوه‌یه‌ك هێنایه‌وه‌
وتی‌: سوپاس
وتم: ئه‌ی‌ دڵمت چی‌ لێكرد؟!
سه‌رنجێكی‌ حه‌په‌ساوی‌ تێگرتم..و
لێیداو رۆیی‌..و
نه‌وه‌ڵام..و
نه‌ئاوڕ..و
نه‌سه‌ریشی‌ نه‌دایه‌وه‌!
***
(7) رێگاكان
ئای‌ چه‌ن خۆش بوو گشت رێگاكان
له‌جێی‌ (بانه‌)
بچوونایه‌ بۆ ناودڵی‌ ئه‌و چاو جوانه‌
كه‌ ڕوومه‌تی‌ له‌كێك ده‌چێ‌..
-ئه‌رێ‌ نازانم رێگاكان
هه‌ر ناگه‌نه‌ نێو دڵی‌ ئه‌و
یان من گێلم لێم تێك ده‌چێ‌؟!
***
(8) دیاری‌
-ئه‌ی‌ تۆ بۆ دڵی‌ په‌شێوت
چیت پێخۆشه‌ پێشكه‌شتی‌ كه‌م؟
-ته‌نها لێوت..!

*ئه‌م شیعرانه‌ له‌ دیوانی (ژنێك ده‌مرێ‌ و پیاوێك به‌چراوه‌ نایه‌) بلاوكراونه‌ته‌وه‌ كه‌ ساڵی 2005 له‌ سلێمانی چاپكراوه‌.

 

Previous
Next
This site is registered on wpml.org as a development site.