هه‌نگاو … ستار ئەحمەد
رێیه‌ك چوارچێوه‌ی دڕكه‌و
وچانه‌كانی ده‌ریای مه‌نگ
یه‌كه‌م وێستگه‌ی پیاوێكی پیر
گۆچانێكی ره‌شی وه‌ك قیر
به ژنی كۆمڕی هه‌ڵگرتووه
دووه‌م وێستگه مناڵێكی كاڵا دڕاو
به‌سه‌ر جه‌سته‌ی لاشه‌یه‌كی داڕزاوا
له‌سه‌ر كانیه‌كی فرمێسك دانیشتووه
سێیه‌م وێستگه دایكێ نه‌دار
دوو ساویلكه‌ی له‌كۆڵدایه
روو ده‌كاته كه‌لی ئاسۆو
چاوه‌ڕوانی هه‌واڵنامه‌ی شنه‌ی بایه
تۆ كه ده‌ڕۆیت
شۆڕ مه‌به‌ره‌وه بۆ دۆڵی له‌نگی زامداران
به‌ڵام له كوێ
شارێك په‌شێووت به‌دیكرد
ئاسمان تووڕه ,
خۆر چه‌واشه ,
هه‌ور ده‌ستی كرده باران
ئاله‌و شوێنه
پشوویه‌ك بده‌و بپرسه
ئایا ئێستاش
شه‌وانه شه‌قامی ئه‌وێ
وه‌كوو جاران پڕ له ترسه
دڵنیا بوویت
تویشووی سه‌فه‌ر بكه‌ره‌وه
دڵه‌ی زامم له‌بارخانه‌ی كوڵتدایه
له گۆشه‌یه‌كی بڕوانه
سێ زامی تێدا ده‌بینی
یه‌كه‌م وه‌كوو نیگای سوارێك هه‌ڵوه‌دایه
دووه‌م خه‌ناوكه‌ی كیژێكه
كوردستانی له دڵدایه
سێیه‌م وه‌سێتنامه‌ی شاعیرێكه
نه‌خشه‌ی برینی ئه‌نفال‌و
سنووری رێیه‌كی نوێیه
شیعر تێیدا باڵا ده‌سته‌و
كورد یه‌كبڕواو یه‌ك ئاڵایه
