Skip to Content

Friday, March 29th, 2024
وه‌ك قه‌ره‌چێك …. نه‌به‌ز گۆران

وه‌ك قه‌ره‌چێك …. نه‌به‌ز گۆران

Closed
by December 21, 2011 ئەدەب

 

نه‌ماڵم هه‌یه‌
نه‌نیشتیمان
ماڵی من دڵی ژنێكه‌
یانی دڵی كتێبێك
چوزانم..
له‌وانه‌یه‌ هیچكامیان.

هه‌میشه‌ خۆمم
ته‌ماشاكردنی سێوێكی
ناوسه‌به‌ته‌یه‌ك
جوانتره‌ لام
له‌ته‌ماشاكردنی كچانی ئه‌م شاره‌.

ژورێكم هه‌یه‌
پڕله‌كتێب و خاڵی له‌ژیان
ژوره‌كه‌ هی خۆم نیه‌
من غه‌ریبم له‌وژوره‌دا
من غه‌ریبم له‌م نیشتیمانه‌دا

ئێواران خۆم نیم
كه‌ ئێواره‌ دادێ‌
دڵته‌نگی من هه‌ڵه‌كا
كه‌ ئێواره‌ دادێ‌
ته‌نیایم ئه‌دا له‌فڕین
هه‌میشه‌ وام
وه‌ك كۆترێك گمه‌م دێت له‌ ژیان
وه‌ك پاساریه‌ك ئه‌ده‌م له‌شه‌قه‌ی باڵ
ده‌رك به‌هه‌مووشتێك ئه‌كه‌م
ته‌نانه‌ت به‌دڵی تۆش
به‌شه‌قه‌ی باڵی چۆله‌كه‌و
به‌له‌ده‌سدانی مناڵی.

گوێم له‌ده‌نگته‌
ئه‌لێی گیتاری
ئه‌ڵێی ده‌نگی ئاوه‌
بانگكردنی تۆ
خۆشتره‌ له‌تامی گه‌نجیه‌تی
گه‌ر تۆنه‌بی
هه‌ڵه‌وه‌رم وه‌ك توو
ئه‌رزێم وه‌ك ته‌رم
بێ‌ تۆ
له‌كۆزه‌یه‌كی كۆنه‌چم.

گوێ‌ له‌ ترپه‌ی دڵم بگره‌
با عاشقبی
با دێوانه‌بی.

دێوانه‌یی
یانی سه‌یركردنی شته‌كان به‌جوانی
یانی هه‌ڵكردنی ره‌شه‌بایه‌ك له‌سینه‌دا
یانی وێڵبوون به‌دوای خۆتا.

له‌هه‌رشوێنێ‌ بم
دێوانه‌م
من شوێنم نیه‌
وه‌ك قه‌ره‌چێك كۆڵ به‌كۆڵ ئه‌ڕۆم
له‌م سه‌ری ته‌نیایه‌وه‌ بۆئه‌وسه‌ری پیری
له‌كوچه‌ی خه‌مه‌وه‌ بۆ لێواری مردن.
ئه‌وه‌ی هه‌مه‌ دڵێك و مشتێ‌ گه‌نجیه‌تیه‌
هائه‌وه‌ش بۆتۆ.

به‌ده‌سته‌كانمان دیاره‌
كوڕی باخه‌وانم
به‌دڵیشما دیاره‌
هی تۆم.

                                                                                                                   سلێمانی
                                                                                                      پایزی ………..2011

Previous
Next
This site is registered on wpml.org as a development site.