Skip to Content

Thursday, March 28th, 2024
وەڵامێك بۆ مەریوان نەقشبەندی…..

وەڵامێك بۆ مەریوان نەقشبەندی…..

Closed
by August 3, 2008 گشتی

 جارێ خۆتان لە مافەكانی منداڵان و شێوازی پەروەردەی سەردەم تێبگەن، ئەمجا قسە لەسەر تێگەیاندی خەڵك بكەن!
 وەڵامێك بۆ مەریوان نەقشبەندی بەڕێوەبەری ڕاگەیاندنی وەزارەتی ئەوقافی حكومەتی هەرێمی كوردستان.
 
 شێرزاد فاتح
 Sherzad_f@yahoo.com
 
 لە ژمارە 437 ی ڕۆژنامەی هاوڵاتیدا، وە دواتریش لەچەند سایتی ئەنتەرنێتیدا، لەبەرامبەر كردنەوەی خولی ئەزبەر كردنی قورئان بۆ منداڵان لە لایەن وەزارەتی ئەوقافی حكومەتی هەرێمی كوردستانەوە بابەتێكم بڵاوكردەوە لە ژێر ناونیشانی "خولەكانی ئەوقاف و كاریگەری لەسەر پەروەردەی منداڵان..!!" بەدوای ئەودا و سەبارەت بە هەمان مەسەلە لە ژمارەی 6 ئۆكتۆبەردا چاوپێكەوتنێكم لەگەڵدا سازدرا. دوابەدوای بڵاو بوونەوەی ئەو بابەت و چاوپێكەوتنەی من هەروەها بڵاو بوونەوەی چەند بابەتێكی تر لەم بارەوە لە لایەن نووسەرانەوە، بە ئیمزای بەڕێوەبەری وەزارەتی ئەوقافی حكومەتی هەرێمی كوردستان مەریوان نەقشبەندی لە ڕۆژی 15-7-2008 لە سایتی ئاوێنەدا بەناوونیشانی "ئیسلامی و عەلمانی داخ بە ئەوقاف دەڕێژن" و دواتریش هەمان نووسین لە سایتی تر بەڵام ئەمجارەیان بەناوونیشانێكی تر "ئه‌وقاف له‌نێوان چه‌كوشی عه‌لمانیه‌كان و سندانی ئیسلامیه‌كاندا" بڵاوكرایەوە كە نیگەرانی و وەڵامی وەزارەتی ئەوقافە بەو بابەتانەی لەسەر ئەو مەسەلەیە بڵاو كرانەوە، تا ئەو جێگەیەی بە من دەگەڕێتەوە وەك یەكێك لەو كەسە عەلمانیانەی كە زۆرجار لەسەر ئەم مەسەلەیەم نووسیوە،  وەڵامدانەوەكەی ئەوقاف جێگەی سەرنجی منەو بە پێویستم زانی وەڵامی پێدەمەوە.
 سەرەتا بەپێویستی دەزانم لەوێوە دەست پێبكەم كە سەرباری پرۆسەی بەردەوامی كردنەوەی ئەم خولانە بۆ قۆرغ كردنی بیروهۆشی مندڵان و گۆشەگیركردنیان لە حوجرەكان و مزگەوتەكاندا، مەریوان نەقشبەندی دەیەوێت بۆ ئێمە تەوزیح بدات كە ئەو منداڵانە ئازادانە بەشداری ئەو خوڵانە دەكەن وبە ئاگاداری و بڕیاری بەخێوكەرانیان هاتوون.  ئەو دەیەوێت بێئاگایی خۆی لەوەنیشان بدات كە ئەو منداڵانە بەتەمەن زۆر بچوكن و ئەسڵەن لە تەمەنێكدا نین كە بتوانن بڕیاری خۆیان بدەن لەسەر بەشداریكردن یان نەكردنیان لەم جۆرە خولانەدا، وە لەهەمان كاتدا ئەم منداڵانە ناتوانن سود و زیانەكانی خولی قورئان ئەزبەركردنەكەی وەزارەتی ئەوقاف بزانن. ئەمە ئیتر ناتوانیت ناوی لێبنێیت "بڕیاری ئازادانە"، هەروەها ئاگاداری خانەوادەكانیان ناكاتە حەزوئارەزووی منداڵەكان، لە لایەك ئێوە خەریكن ئەم كارە دەكەن بە عورف و باو ساڵانە دەستی بۆ دەبەن، لە لایەكی تریشەوە بەشێك لەو خانەوادانە بە هۆی شارەزا نەبوون و كەمی ڕادەی ووشیارییانەوە پێیان وایە كارێكی باش دەكەن و ئەشێ بەزۆریش بیان نێرن بۆ خولەكان، چونكە لەكۆمەڵگای كوردستاندا زۆر كردن و سەپاندن بەسەر منداڵاندا سەرەتاییترین شتێكە ڕۆژانە دەستی بۆ دەبرێت لە لایەن گەورەكانەوە بێ گوێدانە حەزوئارەزووەكانی منداڵان و مافەكانیان.
 بەڕێوەبەری ڕاگەیاندنی وەزارەتی ئەوقاف لە مانشێتی نووسینەكەیەوە دەڵێ "ئیسلامی و عەلمانی داخ بە ئەوقاف دەڕێژن"، دیارە تا ئەو جێگایەی بە ئیسلامییەكان ئەگەڕێتەوە لەم سەری میانڕەویانەوە تا ئەو پەری توندڕەوو تیرۆریستیان، ئاشكرایە كە دەیانەوێت كۆمەڵگای كوردستان بكەن بە نموونەی ووڵاتی ئەفغانستان و سعودیە و جمهوری ئیسلامی ئێران، ئیتر خوێنەر باش دەزانێ كردنی كۆمەڵگای كوردستان بە ئەفغانستان و جمهوری ئیسلامی ئێران یانی چ مەئسات و جەهەنەمێك بۆ منداڵان و ژنان بەتایبەتی، وە بۆ كۆمەڵگا بەگشتی! لێرەوەیە ئەگەر ئەوان لەسەر ئەم مەسەلەیە بە جواب هاتبن ئەوا ئەوان شینی بەدەستەوەگرتنی هەموو ئامرازەكانی جێبەجێكردنی داب و نەرێتی ئاینی و پەروەردەی ئاینی وە بەگشتی هەوڵی بەئیسلامیكردنی كۆمەڵگا ومل كەچ كردنیان دەدەن بە یاساكانی سەردەمی نەزانی و تاریكی، یانی بەكورتی شینی ئەوان بۆ هەریسەكەیە نەك بۆ خەمخۆریان بۆ منداڵان وەك ئینسان و خەمی پەرەوەردە كردنیان بەشێوەیەكی زانستی و پێشكەوتووی سەردەم.   
 بەڵام تا ئەو جێگایەی بە عەلمانییەت دەگەڕێتەوە، دیارە ئاشكرایە كە ئەو برادەرەی ئەوقاف مەبەستی لە عەلمانییەت شەخێی من (من و ئەو كەسە عەلمانیانەیە كە لەسەر خولەكانی ئەزبەركردنی قورئان لەلایەن ئەوقافەوە بۆ منداڵانیان نووسی) ئامانجی من شتێكی ترەو پەیوەندی بە داخ ڕشتنەوە نییە بە وەزارەتی ئەوقاف، بەڕاستی من هیچ داخێكی شەخێی ئەوانم لەدڵ نییە تا بمەوێت پێیان بڕێژم، بەڵكو ئامانجی من مەسەلەیەكی مرۆیییە، وە خەم و ئەركێكی پەروەردەییە بۆ منداڵانی كوردستان بە پێی فەلسەفەیەك كە تەواو ئاشناو نزیكە لە دنیای منداڵان و گەشەكردنی باری فیكری و جەستەیییان، نووسینەكانی من ڕەخنەیە لەحكومەتی هەرێمی كوردستان و بە تایبەتیش لە وەزارەتی پەروەردەو ڕۆشنبیری، كە ئەركی ئەوانە كاتی دەست بە تاڵی و پشوی قوتابخانەكان بە خولی بەسود پڕ بكەنەوە بۆ منداڵان لە بری خولی ئەزبەر كردنی قورئان. قسەو باس و ڕەخنەكانی من لە سەر پەروەردەو فێركردنی منداڵان ئەنجامی خوێندنەوەكی قووڵە سەبارەت بە گەشەو پەروەردەی منداڵان، وە ئەنجامی خوێندنی باڵاو كاركردنمە وەك مامۆستا و پەروەردكار، وە هەروەها كاركردی نزیكەی 10 ساڵم لەگەڵ منداڵان و سەنتەری بەرگری لە مافەكانی منداڵاندا چ لە كوردستان و عێراق، وە چ لە ئەوروپا، نەك داخ ڕشتن بە ئەوقاف وەك ئەو برادەرەی بەڕێوەبەری ڕاگەیاندنیان لێی حاڵی بووە! بۆیە بە ڕاستی هەر لە مانشێتی نووسینەكەیەوە تێكەڵ كردن و ڕیزكردنی ئەم دووناوە عەلمانی و ئیسلامی لەلایەن ئەو بەڕێزەوە ئەمە ئیتر دووبارە بێئاگاییانە لەچۆنێتی و شێوازەكانی پەروەردەو فێركردنی منداڵان و ئامانجی ئێمە لەم پرۆسەیەدا. كە بەتەواوی دوو دنیای جیاوازو دووفەلسەفەی جیاواز دوو مرۆڤی تەواو جیاواز بەرهەم دەهێنێ.
 لە جێگایەكی تر بەڕێوەبەری ڕاگەیاندنی ئەوقاف دەڵێ" به‌ڵام ئه‌وانه‌ی‌ خۆیان ناوناوه‌ (عه‌لمانی‌) ئیشیان بووه‌ به‌ره‌خنه‌گرتنی‌ مه‌لای‌ مزگه‌وته‌كان‌و دروستكردنی‌ مانشێت له‌سه‌ریان‌و هه‌ندێكیشیان، هه‌ر هاتنه‌گۆ، به‌سوك‌و ئاسانی‌ ده‌ڵێن: باشه‌ ئه‌وقاف ئیشی‌ چییه‌؟ وه‌زاره‌تی‌ ئه‌وقاف وه‌زاره‌تی‌ خادیمه‌ گه‌نده‌ڵه‌كانه‌و..هتد)"هەروەها لە شوێنێكی تر دەڵێ" من دوو كابینه‌یه‌ له‌وه‌زاره‌تی‌ ئه‌وقافدا كارده‌كه‌م‌و خوازیاربووم یه‌كێك له‌و «عه‌لمانی»‌و «ئیسلامی‌»یانه‌، پرۆژه‌یه‌كی‌ هاوسه‌نگ‌و گونجاوی‌ پێبێت، كه‌ تێیدا مافی‌ هه‌موان پارێزراوبێت‌و له‌گه‌ڵ دۆخی‌ یاسایی‌‌و كۆمه‌ڵایه‌تی‌‌و سیاسی‌ ئه‌مڕۆی‌ كوردستاندا هه‌ڵبكات، به‌ڵام زۆر به‌داخه‌وه‌ ده‌ڵێم ئه‌وه‌م نه‌دیوه‌و نه‌بیستوه‌، بۆیه‌ تكایه‌ له‌بری‌ ره‌خنه‌‌و هێرشكردن، پرۆژه‌ی‌ پێكه‌وه‌ژیان‌و رێكخستنی‌ باشتری‌ ئازادی‌ ئاینی‌‌و گه‌شه‌كردنی‌ كۆمه‌ڵگاكه‌مان پێشكه‌ش بكه‌ن" دیارە من هچ كات ڕەخنەم لە مەلا نەگرتووە بەدەر لە سیستەمی ووڵات و ئەوقاف و كاروباری ئاینی و بەگشتی بەدەر لە حكومەتی هەرێمی كوردستان و شێوازی حوكمڕانی دەسەڵاتیان، چوونكە ئاشكرایە ئەم مەسەلەیە وابەستەیە بە سیستەم و یاساو ڕێسای وڵاتەوە، كە مەلاش بۆخۆی ئامرازێكی جێبەجێكردنی ئەم پەیام و یاسایەی وەزارەتی ئەوقافە، لێرەوەیە من ڕەخەم گرتووە نەك ڕەخنە گرتن لە مەلا وەك تاكە كەسێك لە كۆمەڵگادا، ئیتر نازانم كاكی بەڕێوەبەری ڕاگەیاندنی ئەوقاف پێی وایە منێكی عەلمانی دەبێ چ چاوەڕوانییەك لە مەلا بكەم (مەبەستم لە مەلا وەك مهنەو كارەكەیەتی نەك وەك مرۆڤێك)!
 كاتێكیش قسە دێتەسەر پرۆژە و داوای هاوكاری، ڕیشەی كێشەكە لەوێوەیە كە عەلمانی و ئیسلامی دووبیركردنەوەی جیاوازو دوور لەیەكیان هەیە بۆ مەسەلەی پەرەوەردەو فێركردنی منداڵان، ئەوەش كە من ئامانجمە وەك كەسێكی عەلمانی نابێ و ناكرێ منداڵ لە ئاین و كاری حیزبی و سیاسی و هەر مەسەلەیەكی تر كە لەگەڵ تەمەن و توانایی جەستەی و فیكری منداڵان، وە لەگەڵ هەرجۆرە پێشێلكارییەكی مافەسەرەتاییەكانیاندا نایەتەوە، نزیك بكرێتەوە. ئێوەش چ وەك حكومەت و چ وەك وەزارەتی ئەوقاف ئەو كارانە یان لانی كەم بە ئاشكرا بەشێك لەو كارانە بەسەر منداڵاندا دەدەن، ناكۆكی و لەبەرامبەر وەستانەوەی من بۆ ئێوەی دەسەڵاتدار لێرەوە سەرچاوە دەگرێت.
 سەربارەت بە ئاین و خولی ئەزبەر كردنی قورئان بۆ منداڵان، مەسەلەكە جیاوازەو پەیوەندی بە " پرۆژه‌ی‌ پێكه‌وه‌ژیان‌و رێكخستنی‌ باشتری‌ ئازادی‌ ئاینی‌‌و گه‌شه‌كردنی‌ كۆمه‌ڵگاكه‌مان پێشكه‌ش بكه‌ن" ە وە نییە! بەڵكو مەسەلەكە لەوێوەیە كە بەرنامەو فەلەسەفەكەی تۆ منداڵان فێری گۆشەگیری و كۆنەپەرستی و توندو تیژی دەكات و دژی پرۆسەی بیركردنەوەی منداڵانە، وە ئامانجی من و بەرنامەی منیش مرۆڤی ئازاد و ئارام دوور لە توندوتیژی، وە بۆ خۆشبەختی و پێشكەوتووی دواڕۆژی كۆمەڵگا پەروەردەو بەرهەم دەهێنێت، منداڵ پەیوەندی بە ئازادی ئاینەوە نییەو ناكرێ ئەم مەسەلانە بەو شێوەیە تێكەڵ بكرێن.   
 لەكۆتاییدا من دەمەوێت بپرسم ئایا بەڕاستی ئەگەر دەسەڵاتێكی وەك حكومەتی هەرێمی كوردستان كە بەئەندازەی چەندین ووڵاتی دنیا سەروەرت و سامانی لەبەردەستدایە، وە یان وەزارەتێك وەك وەزارەتی پەرەوەردە كە بەشێك لەو دەسەڵاتە پێك دەهێنێت ئەگەر خەمی منداڵان و پەروەردەو فێركردنیەتی بەشێوازێكی زانستیانەی پێشكەوتووی سەردەم، ناكرێت قوتابخانەو دەیان خولی هاوینەی پڕ سود بۆ منداڵان بكاتەوە؟ هەر وەك چۆن لە دنیای پێشكەوتوودا باوەو هەیە دەكرێ لە كاتی هاوینانیشدا بۆ ئەو منداڵانەی كە دایك و باوكیان كار دەكەن یان هەموو ئەو منداڵانەی ئارەزوو دەكەن قوتابخانە بەردەوام كراوە بێت لەگەڵ دابینكردنی پێداویستییەكانی منداڵان لەخواردن و خواردنەوەوە بگرە تا هەموو پێداویستییەكانی سەرحاڵی و خۆشی بۆ منداڵان، كردنەوەی دەرگای قوتابخانەیەك لەچەند گەڕەكێكی نزیك لەیەك و هەر هەفتەیەو كاركردنی چەند مامۆستایەك لەگەڵیاندا بە تایبەتیش مامۆستای وەرزش و وێنەو مۆسیقا، یان مامۆستای كۆمپوتەرو زمانی ئینگلیزی …هتد، هەروەها هەرجارەو سەردانی كارگەو دامەزراوەو دەزگایەك كە منداڵان لێی فێرببن و شتێكی تازەی تیابێت بۆیان، ئەم كارە گەورەترین خزمەت بە گەشەی جەستەی و فیكری منداڵان و بردنەسەرەوەی ئاستی زانیارییان دەكات، ئەگەر بێت و بەپێی بەرنامەیەكی پێشكەوتووی پوخت و نەخشە بۆ داڕێژراو ئەنجامبدرێت، ئەمە ئیتر یەكێك لەو پرۆژانەیە كە هیچ شتێكی عەجیب و غەریب نییە و تەنها ئەوەندەی دەوێت بودجەیەكی زۆر كەم لەوەی كە ڕۆژانە لەدەمی خەڵكی دەگرنەوەو بە تاڵانی دەبەن، بەشێكی زۆر كەمی بۆ خزمەتكردن بە منداڵان و گەشەی فكری و تەندروستیان خەرج بكەن و واز لەم خولی ئەزبەر كردنانە بێنن. گلەیی ئەوەش نەكەن بڵێن كەس هاوكاریمان ناكات و پرۆژەیان نییە.  
 
 
 
 

Previous
Next
This site is registered on wpml.org as a development site.