چەند لە حزەیەک … نەوزاد بەندى
-1-
نەمتوانى لە یادت بکەم ،
بۆیە ئاگرم بەردایە خەرمانى یادگارێکانم ..
ئێستا نە ڕابودووم هەیە ..
نە مێژوو ..
نە ئەلبوم ..
وەک مناڵێکى تازە لە دایکبوو م..
-2-
خۆیشم نازانم قەفەزى سنگم ،
چەند کەسى تیا دەست بەسەرە ..
بیریش ناکەمەوە هەرگیز ،
لێبوردنێکى گشتییان بۆ دەر بکەم ..
-3-
ئەڕۆینەوە ..
بۆ کۆڵانە خۆڵاوییەکانى مناڵیى ئەڕۆینەوە ،
بەڵام
هیچ نادۆزینەوە ..
نە شوێن پێیەک..
نە چکلێتێکى ئەبو مونیر..
نە پسکیتێکى هێرۆ..
نە چلوورەیەکى ئەرخەوان .. ..
نە خەونێکى ترش و شیرین ..
نە هەڵماتێ ..
نە مزراحێ..
نە ڕەسمێکى ئالان دیلۆن ..
نە باڵۆنێ ..
نە پێنج فلسییەکى گرنج – گرنج ..
نە تاسەى شەوێکى بەرات ..
نە دایک و باوکێکى جحێڵ ..
-4-
بە ئاشکرا هەست بە دەستى ڕۆژگار ئەکەم ،
توند یەخەى گرتووم و
بە شەو و ڕۆژەکانا ، ڕامئەکێشێ ..
هێشتا چایى بەیانیم نەخواردۆتەوە ،
برنج و شلەى نیوەڕۆم بۆ تێ ئەکا ..
هێشتا لە هەلوکێن و
کۆلارە تێر نەبووم ،
چاوەکانم فێرى چاوبڕکێ ئەکا ..
هێشتا مناڵەکەم نەچۆتە باخچەى ساوایان ،
ئەبینم پێکى مردنم بۆ تێ ئەکا ..
-5-
گەر ئەمجارە زستان گەڕایەوە بۆ شار ،
لە ژێرخانەکەمان سجنى ئەکەم ..
( هاوین سوتاندمى ، ڕەفیقان ! )