Skip to Content

Thursday, March 28th, 2024
ڕژانێک ، ساکار وه‌ک کانی….     به‌رزان هه‌ستیار

ڕژانێک ، ساکار وه‌ک کانی…. به‌رزان هه‌ستیار

Closed
by October 29, 2011 ئەدەب

   

هیچ شتێکم  قبووڵ مه‌که‌ن ،….
به‌خشنده‌یی نه‌بێت ، به‌خشنده‌یی

    —-

کۆکردنه‌وه‌ی خوێنی‌ په‌ڕه‌سێلکه‌یه‌کی پێکراو…
به‌ر له‌وه‌ی به‌ربێته‌وه‌ سه‌ر زه‌وی ،
میهره‌بانییه‌، میهره‌بانیی
    —-   

 زۆر ناڵێم ،….
دڵنیام ، که‌سێک خه‌و به‌ بێده‌نگییه‌وه‌ ئه‌بینێت
   
    —-   

ژنێک ، له‌ گه‌رمه‌ی شیعرنووسیندایه‌،….
واااو.. چ سروه‌یه‌ک هه‌ڵیکرد !
    —-

بۆ ئه‌وه‌ی ئه‌ڤینم، لای ئه‌و ڕه‌نگی نه‌بزڕکێت
گه‌لۆر..گه‌لۆر ، خوێنی گوڵێکم کرده‌ کاسه‌وه‌!!

    —-
ڕه‌ق ڕه‌قم وه‌ک به‌رد ،
له‌ چاوتروکانێکیشدا ،…
له‌ پێخه‌فی ژنێکا ، ئه‌بم به‌ هه‌ڵم،..
                               منی پیاو!

    —-

که‌سه‌رگه‌رمی ڕاڤه‌‌کردنی خۆم بووم ….
ئه‌وه‌ سوور بزانه‌ مه‌به‌ستم تۆیه‌،
که‌ به‌ تاسووقه‌وه‌ قسه‌ت کرد ……
هه‌رچی بڵێیت ، دڵنیام باسی من ئه‌که‌یت

    —-
سه‌برم لێ بکه….‌
با فریاکه‌وم هه‌موو خۆم بێمه‌ لات ،
هه‌موو خۆم؛..
 به‌ده‌ر له‌ نیگه‌رانییه‌کانم
    —-

پیریی ، هه‌ڵکشانی لاولاوه‌کانی بیرچوونه‌وه‌یه‌ …
به‌ دیواری کۆڵانه‌ قه‌مووره‌کانی مردنا !!
    —-
هیچ که‌س هێنده‌ی من و خودا دڵی یه‌کیان نه‌ڕه‌نجاندووه‌
    —–

که‌ تیا ڕاکشام ،
گرنگ ئه‌وه‌یه‌ نا‌یبینم، ئه‌و داره‌مه‌یته‌ !!
    —-
که‌ مردن وه‌ک بلوور ئه‌مکێشێ به‌ شۆسته‌یه‌کی چۆڵا ،….
خۆکوشتنێک قه‌رزار ئه‌بم !
    —-

له‌ چایخانه‌یه‌کدا ،
به‌ده‌م فڕکردنی خه‌یاڵێکی خه‌سته‌وه‌‌،….
به‌ کاوه‌خۆ، ژیان ئه‌کێشم !

    —-
بیرکردنه‌وه‌..بیرکردنه‌وه‌..بیرکردنه‌وه‌،…..
ته‌خت وتاراجی به‌خته‌وه‌رییمی برد به‌ ئاسمانا
    —-

بڵاومکه‌نه‌وه‌ وه‌ک ئاردی ناو دڕک ،
ئاخر ،من چیم له‌ خڕکردنه‌وه‌ی خۆم سه‌وز کرد ؟

    —-
جێهێشتن، …
واته گورجکردنه‌وه‌ی هه‌نگاو…..
بۆ سه‌ره‌تای ماڵئاواییکردنێکی تر!!

    —-
خه‌ون ،…..
 خه‌ریکه ،‌که‌وشه‌نه‌کانی حه‌قیقه‌تم لێ ئه‌کا به‌ به‌سته‌ڵه‌ک !

    —-   
گرێکوێره‌م و
 به‌ دوو قسه‌ی خۆشیش ئه‌کرێمه‌وه‌ !
    —-
باری که‌شتییه‌که‌م……
شووشه‌ ته‌نکه‌کا‌نی خه‌یاڵه،‌…
ئه‌بێ چه‌ندیان به‌ساغیی بگه‌یه‌نمه‌ که‌نار؟!!

 

bhastiar@yahoo.de

Previous
Next
This site is registered on wpml.org as a development site.