ڕێگاى کانى … نەوزاد بەندى

 

 

 

 

 

-1-

بە قسەم بکە ،

با لە پەنایەکا ،

یەخەى ( پیریى ) بگرین و

دەم و ددانى بشکێنین ..

 

-2-

بەیانى زوو

حەفارە و شۆڤڵێکى قەزەم  ببەین و

ڕژێنەکانى فرمێسک ،

هەموو ى کوێر کەینەوە ..؟؟

 

-3-

ئێوارەیەک ،

بە سپۆنسەرى گەڵامێو ،

مەنجەڵێک پڕ کەین لە برنجى نهێنى و

شەربەیەک دۆ ،

لە دایکى گوێرەکەیەک بفڕێنین و

بچین بۆ سەیران ..

 

-4-

کەى واز لە پارە بێنین ؟    

 

-5-

مزراح و کۆلارە و هەڵمات کۆکەرەوە ،

بەڵکو مناڵیى ،

دەرگامان لێبکاتەوە ..

 نەیکردەوە ،

خۆمان ئەدەین بە لیژنەى پزیشکى ،

ئەیسەلمێنین هێشتا مناڵین ..

هێشتا شەیداى تول تولێن و

پێنج بەردى و 

هەلوکێنین ..

ئێمە زلى بێ هونەرین ..

مناڵین لە کەوڵى پیرا ..

 

-6-

شاعیر و نوسەرە گەورەکانمان ،

کاسبن ..

تاقەتیان نییە دوو دێڕ بە خۆڕایى بڵاو کەنەوە ..

وشە ئەخەنە مەزادەوە ،

کێ زیاتر با ،

    ( شافلخێر ) بۆ ئەو ئەکەن و

ئامادەن دوانزە وتار ،

لەسەر پرخە-پرخ  بنوسن و

بیشوبهێنن بە پێکەنین ..

 

-7-

بە قسەم بکە ،

با بچین بۆ لاى مێشولەیەک ،

بزانین ئەو قەد و باڵا و قامکە باریکانەى ،

لە کوێ هێناوە ؟

بەڵکو بە نرخێکى گونجاو بەرنامەکەى لێ وەرگرین ..

( مێشولە بوومایە ،

لە جیاتى گیزە گیز و خوێنمژین ،

ئەبوم بە عازیفى پیانۆ )

 

-8-

نان نییە خەمى تیا نەبێ

ئاو نییە خەمى تیا نەبێ ..

تەنانەت لە پێکەنینا ،

بگەڕێ ئەیدۆزیتەوە ..

ئۆقرەى لەبەر هەڵگیراوە و

چاوەڕوێى کارەساتێکە..

( ئیتر  شاکاریش بنوسێ ،

هەر ئەیدڕم ..

کە دەم و قەپۆزى دەرکەوت ،

بە نوکتە و

سەما و

پێکەنین ، هەڵی ئەبڕم  ..)

 

-9-

لە کوێ ئەمشاریتەوە ؟

فیرقەى مودەرەعى خەم هات ..

 

-10-

کە بە تەنیشت کارێزى وەستا شەریفا ئەڕۆم ،

ئەو پەپوسڵێمانکەیەم دێتەوە یاد ،

کە لە بەهارى 1973 نیشتەوە ،

ڕامکرد بەرەو ڕووى ..

لە نێوان سنەوبەرەکانا ون بوو ..

نازانم زەمین قوتى دا ..

یان ئاسمان هەڵیکێشا ..

( چەند پێویستم بەو پەپوسڵێمانکەیەیە ئێستا ..

تاکو وێنەى مناڵیم لە چاوەکانیا بشۆمەوە :

مناڵًێکى لاوازى ڕەنگ زەردى شەش ساڵان ،

بە شەڕواڵێکى خۆڵەمێشى و

کراسێکى شینەوە ..

بە جوتێ پێڵاوى لاستیکەوە ،

حەپەساوە و بە هانکە – هانک ،

بەرەو پەپوسڵێمانکەیەک ڕائەکا ،

ڕوخسارى تێکەڵەیەک لە خەم و خۆشى تێدایە..

تێکەڵەیەک

وەک تێکەڵەى برنج و داڕوجان ..)

 

-11-

خۆزگە بمزانیایە خوا ،

لە کوێ ڕۆژەکانمان ئەرشیف ئەکا ..

زۆر پێویستم بە دۆکیۆمێنتەکانى مناڵیە ..

 

-12-

حەزم ئەکرد ،

ڕۆژێک لە ڕۆژان ،

لە مینى بوسێکى خەتى زەرگەتە ،

سەرۆکى حوکمەت لە تەنیشتما ،

دانیشتایە ..

لە چایخانەى شەعب ،

چایەکى یەکسەرى و

لەبەر بەلەدیەکە ،

پڕ عەلاگەیەک ،

کەرەوز و  جەرجیر و پونگەى بکڕیایە ..

( کە سابیر کوردستانى ئەڵێ :

من غەریبم .. من غەریبم .. من غەریب ..

یەکسەر سەرۆکى حوکمەتم بیر ئەکەوێتەوە .. )

 

-13-

خەڵک باسى ڕیاڵ مەدرید و

بەرشەلۆنە ئەکەن ،

زیاتر لە نالى و سالم ..

 

-14-

زەوى نوقوڵێکى ترش و شیرینى پەمەیى بو ،

ئێمە وەک مێرولە ،

تێى بەر بوین ..

کردمان بە پارچەیەک خەڵوز