Skip to Content

Friday, March 29th, 2024
گله‌یی له‌ خوا ده‌كه‌ین…..عیسا خدر

گله‌یی له‌ خوا ده‌كه‌ین…..عیسا خدر

Closed
by May 28, 2009 ئەدەب

گڵه‌یی له‌ خوا ده‌كه‌ین
بۆچی به‌ یه‌كترمان ناگه‌ینێ‌
گڵه‌یی له‌ شه‌و ده‌كه‌ین
بۆچی ئه‌ستێره‌كان ناجریوێنن؟
كه‌چی خۆمان رانه‌هاتووین
سپێده‌..
به‌ ده‌نگی كه‌نارییه‌ك
به‌ئاگا بێین و
شه‌ونمی شه‌و
له‌ سه‌ر گوڵێك لاده‌ین
كه‌ی بۆ باڵنده‌یه‌ك نوشتاینه‌وه‌
كاتێ‌ حه‌زینترین گۆرانی ده‌چڕێ‌؟!
نیگای دوڵبه‌ر ده‌بێ‌ ئاو بێ‌
تێنوێتی دڵی مه‌عشوق بشكێنێ‌
ڕه‌نگه‌كان كاڵبونه‌وه‌
ده‌بێ‌ ده‌سته‌كانمان بشۆین
ئه‌ستێره‌كان..
به‌ شه‌و بده‌ینه‌وه‌.
خه‌وه‌كان..
به‌ چاوی منداڵیمان بسپێرینه‌وه‌.
گومڕابووین..
سێبه‌ر به‌ جه‌سته‌مان ڕانایێ‌.
له‌ ئاسمان ده‌ڕوانین و
دڵمان به‌ ڕوناكی خۆشه‌
كه‌چی ده‌زانین شه‌و دێت و
ئه‌ستێره‌یه‌ك شك نابا
ئه‌گه‌ر نیگامان ئه‌ستێره‌ بێ‌
ڕه‌نگه‌ خودا بمانبوورێ‌!.
با میلی كاتژمێره‌كان بوه‌ستێنین
كاتی مه‌رگمان دیار نه‌بێت
رابردوو..
له‌ پاییزه‌ ئێواره‌یه‌ك
له‌ خاچ بده‌ین.
له‌م ده‌ڤه‌ره‌..!
مشتێ‌ میهر نییه‌
ڕه‌نگێ‌ به‌ ئه‌به‌دیه‌ت بده‌.

 

Previous
Next
This site is registered on wpml.org as a development site.