Skip to Content

Friday, March 29th, 2024
گوپالێ‌ سحری یێ‌ مام جه‌لال!

گوپالێ‌ سحری یێ‌ مام جه‌لال!

Closed

 

 

ده‌نگ و باسێ‌ مرنا سه‌روك مام جه‌لال ل چه‌ند كه‌نالێن راگه‌هاندنێ‌ ل ده‌مێ‌ توشبونا وی و ڤه‌گوهاستنا وی بو نه‌خوشخانێ‌ ل به‌غدا، شله‌ژانه‌ك ئێخسته‌ ناڤ خه‌لكی و نه‌ بتنێ‌ دناڤ جه‌ماوه‌رێ‌ یه‌كێتی نیشتیمانی دا، به‌لكو هه‌می كوردا و خه‌لكێ‌ عیراقێ‌ هه‌می بگشتی بڤی ده‌نگ و باسی نه‌ ئارام بون. هه‌ر چه‌نده‌ ئه‌ڤ ده‌نگ و باسه‌ هه‌ر زوی ژلایێ‌ نڤیسینگه‌ها مام جه‌لال و تیما پزیشكی ڤه‌ ب دره‌و هاته‌ ده‌رئێخستن، لێ‌ ده‌نگ و باسێ‌ نه‌خوش كه‌فتنا مام جه‌لال ترسا ئالیسه‌نگ بونا هه‌ڤكێشه‌یا سیاسی ئینا قادێ‌ و بدروستاهی هه‌می لایه‌نه‌كی بیر ل گرنگیا پوستێ‌ وی دا كرن، كو كه‌ساتیا مام جه‌لال د نه‌هێلانا كێشه‌یێن عیراقێ‌ یێن نه‌ته‌وه‌یی و مه‌زهه‌بی و ژ لایه‌كێ‌ دیڤه‌ دناڤبه‌را هه‌رێمێ‌ و به‌غدا دا، روله‌كێ‌ ئێكجار به‌رچاڤ هه‌بو.

مام جه‌لال ب حوكمێ‌ سه‌ربورێن خه‌باتا خوه‌ یا سیاسی و مه‌ده‌نیانه‌ د رێڤه‌برن و سه‌ركردایه‌تیێ‌ دا، روله‌كێ‌ كاریزما و كاریگه‌ر و به‌رچاڤ د هه‌ڤسه‌نگ راگرتنا كێشه‌ییان دا هه‌بویه‌. چ ئه‌و كێشه‌، كێشه‌یێن هه‌رێما كوردستانێ‌ دگه‌ل حكومه‌تا مه‌ركه‌زی بن یان ژی هه‌ڤسه‌نگ راگرتنا كێشه‌یێن ل سه‌ر بنیاتێ‌ نه‌ته‌وه‌یی و مه‌زهه‌بی، ئه‌ڤێن به‌رده‌وام ل عیراقێ‌ سه‌رهلدده‌ن، كو پوستێ‌ مام جه‌لال وه‌ك سه‌روكێ‌ كومارا عیراقێ‌ دخازته‌ وێ‌ چه‌ندێ‌ كو بڤی رولی رابیت و ئه‌گه‌ر دڤێ‌ ئالیسه‌نگیێ‌ ژی دا كه‌سانه‌ك مینا كه‌ساتیا مام جه‌لال، كاریزما نه‌بیت و سیاسیه‌ك شاره‌زا نه‌بیت نه‌شێت ڤێ‌ هه‌ڤسه‌نگیێ‌ بینته‌ جهـ و هه‌می ئالیه‌كی ژی دبن ئێك چه‌تره‌ ڤه‌ كوم ڤه‌ بكه‌ت. تا وی رادده‌ی هنده‌ك كه‌س وی ب بابێ‌ عیراقیان بده‌نه‌ ناسكرن! كه‌ساتیه‌ك، هه‌می ئالیان برێزگرتن ڤه‌ گوهـ ل پێشنیار و تێبینی و چاره‌سه‌ریێن وی دگرتن و هزر دكرن، ئه‌و تاكه‌ كلیلا چاره‌سه‌ریێن عیراقێ‌ یه‌.

تێكچوونا بارێ‌ ته‌ندروستیا مام جه‌لال ره‌نگڤه‌دانا خوه‌ ل سه‌ر چه‌ندین ئاستان هه‌بو، زه‌ینه‌ب خه‌زره‌جی ئه‌نداما ئیتیلافا نیشتیمانی د دیداره‌كا خوه‌ دا دگه‌ل كه‌نالێ‌ (ئه‌لره‌شید) سه‌باره‌ت مام جه‌لال دبێژیت، ژبلی كو مام جه‌لال سه‌روك كومار بو، ئه‌و بو مه‌ وه‌كی بابه‌كی بو. ل سه‌ر ئاستێ‌ جیهانی ژی سه‌روك كومارێ‌ توركیا دبێژیت، ئه‌م د ئاسته‌كێ‌ گه‌له‌ك بلند دا سه‌حدكه‌ینه‌ ته‌، وه‌لاتێ‌ ئیرانێ‌ بله‌ز تیمه‌كا نوژداری فرێدكه‌ته‌ به‌غدا و دلگرانیا وه‌لاتێ‌ خوه‌ بو دیار دكه‌ت، جێگرێ‌ سه‌روكێ‌ ئه‌مریكا دبێژیت، مه‌ پێدڤیاتی بته‌ هه‌یه‌ و نیشتیمانێ‌ ته‌ پێدڤی بته‌ هه‌یه‌ و تو مروڤه‌كێ‌ ژیری.

ژبه‌ر گه‌له‌ك ئه‌گه‌ران، ڤێ‌ نه‌خوش كه‌فتنێ‌ گرنگیا هێزا گوپالێ‌ وی یێ‌ سحری، د ئالیسه‌نگ راگرتنا هه‌ڤكێشه‌یان دا بیرا هه‌میان ل گرنگیا مانا وی لڤی پوسته‌ی ئیناڤه‌. چ ئه‌و هه‌میێن هه‌ ل سه‌ر گوره‌پانا سیاسی یا هه‌رێما كوردستانێ‌ بن یان هه‌می پارچه‌یێن كوردستانێ‌ یان ژی ل عیراقێ‌ وه‌ك سه‌روك كومار كو عیراقی هه‌می ل بن چه‌تره‌یا وی ڤه‌ خوه‌ ددیتن یان ژی وه‌ك سه‌روكه‌كێ‌ لێهاتی، كو چاڤێ‌ میدیا یا جیهانی ل سه‌ر بو. ل سه‌ر ئاستێ‌ هه‌رێما كوردستانێ‌ مام جه‌لالی روله‌كێ‌ ئه‌كتیڤ د هه‌ڤكێشه‌یێن، چ ناڤخویی چ ژی كێشه‌یێن هه‌رێمێ‌ دگه‌ل به‌غدا و چ ژی یێن دگه‌ل وه‌لاتێن ده‌رڤه‌ دا هه‌بو و ل هه‌میان ژی دزانی دێ‌ چاوان ڤێ‌ هه‌ڤكێشه‌یێ‌ راگریت و دقازناجا هه‌رێما كوردستانێ‌ دا زڤرینیت و ئالیسه‌نگ كه‌ت. ژ بو عیراقه‌كا شنوی دقوناغا ئاڤاكرنێ‌ ژی دا، وه‌ك سه‌روك كومار بو وه‌لاته‌كێ‌ جهێ‌ ژ دایكبونا كێشمه‌كێشه‌یا تایفی و نه‌ته‌وه‌یی و مه‌زهه‌بی و ژ خرابترین وه‌لاتێن دگه‌نده‌لیێ‌ دا ل سه‌رانسه‌ری جیهانێ‌ هاتیه‌ ناسكرن و رێژه‌یا بێكاریێ‌ و نه‌بونا خزمه‌تگوزاریێن پێدڤی د سه‌ر ڤان هه‌میان ژی را، شیا رولێ‌ خوه‌ یێ‌ ئه‌كتیڤ و حه‌كیمانه‌ دچاره‌سه‌ركرنا كێشه‌ییان دا راگریت، تا وی رادده‌ی به‌شێ‌ عه‌ره‌بیێ‌ ده‌نگێ‌ ئه‌لمانیا، د راپورته‌كا خو دا بناڤێ‌ (سه‌روكه‌كێ‌ بێ‌ ده‌ستهه‌لات و روله‌كێ‌ پر كاریگه‌ر)، هه‌ڤخه‌میا جاددا عیراقی بو (مام جلال) دیار دكه‌ت و سه‌روك كومارێ‌ عیراقێ‌ ب كێم وێنه‌ ب ناڤ دبه‌ت و دیار دكه‌ت كو كێم جاران وه‌كی نوكه‌ چێبویه‌، عیراقی ب هه‌می نه‌ته‌وه‌ و ئاین و مه‌زهه‌بێن خویێن جودا ڤه‌، بڤی ره‌نگی بو ته‌ندروستیا سه‌روكێ‌ خوه‌ دوو دل ببن. ئه‌ڤی كه‌نالی، ئه‌گه‌رێ‌ ڤێ‌ هه‌ڤسوزیا عیراقیان ژی، بو لێبورده‌ی و پارێزگاریكرنا وی بو مافێن مروڤی ڤه‌گه‌رانده‌ڤه‌. ئه‌ڤه‌ ژی ژبه‌ركو مام جه‌لال به‌رپرس بو ژ چاڤدێریكرنا حكومه‌تێ‌ و په‌رله‌مانی و پاراستنا ده‌ستوری و ژبه‌ر كاریگه‌رییا وی یا كه‌سایه‌تی و سیاسی بو لێكنێزیكرنا هه‌می پێكهاته‌یێن سیاسی و چاره‌كرنا ناكوكیێن وان، پوستێ‌ وی تاكه‌ پوست بو چ هه‌ڤركی ل سه‌ر نه‌ و هه‌می ئالیه‌ك درازی بون، كو مام جه‌لال ل وی پوستی بمینیت.

عبدالرحمن بامه‌رنی

Previous
Next
This site is registered on wpml.org as a development site.