یاداشته‌كانی په‌یكه‌رێك …. ئه‌مین محه‌مه‌د
١- ئه‌م په‌یكه‌ره وه‌ك خۆی ده‌ڵێ دژه‌بــاوه
شـاعیرێكه چـاوی له ئاسۆ بڕیوه‌و
له‌پێناوی ئامانجێكا سه‌ری له‌سه‌ر خاك داناوه.
٢- له‌وه ده‌چێ (نالی)یش بڵێ:
ئه‌م په‌یكه‌ره دژه‌بــاوه
نه‌وه‌كو خۆی نه‌وه‌ك (كوردی)
نه‌وه‌كو (ســالم) وه‌ستاوه.
٣- تێڕامانی ئه‌م په‌یكه‌ره
گوزارشتێكه لــه مێژوو
په‌یكه‌رێكه ناونیشانی شـار ده‌گۆڕێ
ده‌یكـات به شــاری ئاوه‌ژوو .
٤- ئه‌م په‌یكه‌ره له‌سه‌ر لابێ یا سه‌ره‌وخوار
ڕێك به‌پێوه ڕاوه‌ستابێ یا ڕاكشاو
له‌م شــاره‌دا بۆ نابینا بوه به چـاو .
٥- په‌یكه‌رتاشی ئه‌م په‌یكه‌ره
به‌نهێنی له‌لایه‌وه ڕاوه‌ستاوه
ئێمه بۆیه ئه‌و نابینین
دیاره له‌بن شه‌بقه‌كه‌یدا خۆی ماتداوه
٦- یاخی بوونی ئه‌م په‌یكه‌ره
هه‌موو خه‌ڵكی له‌خاڵێكدا كۆكرده‌وه
ناوی (نا) یه
ڕێگایه‌كی بۆ كێشاون پرشنگداره
تاهه‌تایه .
٧- گه‌ر به‌وردی سه‌رنج بده‌ی
جارجار پێڵوی ده‌جوڵێنێ
ده‌ماری ملی لێده‌دا،
به نیگا ده‌مان دوێنێ
لاشه‌ی زیندووی ئه‌م په‌یكه‌ره
٨- نهێنیی ناو ئه‌م په‌یكه‌ره پێمان ده‌ڵێ:
شاعیره‌كان یا درۆزن،
یا زۆر بڵێ و چه‌نه‌بازن
ده‌گمه‌ن تاك تاكیان ڕاستگۆیه
ئه‌ویش قفڵێ له‌لا شه‌ویلگه‌ی دراوه .
٩- ئه‌م په‌یكه‌ره لنگه‌وقوچه
ئاماژه‌یه‌كه بۆ ئه‌وه‌ی له‌م شاره‌دا
هه‌موو شتێ ئاوه‌ژوه
بۆیه ئه‌م وا، سوژده بۆ زه‌وی ده‌بات و
قاچیشی بۆ حه‌وا چوه .
١٠- ئه‌م په‌یكه‌ره له دووره‌وه
لاشه‌ی بۆشی شاعیرێكه وه‌ك حه‌قیقه‌ت
وه‌ك ئه‌م زه‌مانه لنگه‌وقوچ .
١١- وردبوونه‌وه له‌م په‌یكه‌ره،
گومانم لا دروست ئه‌كات
هه‌موو شار هه‌ڵاوگێڕاوه
یان ته‌نها خۆی .
١٢- له هه‌ر هه‌موومان تووڕه‌یه
ئه‌م په‌یكه‌ره،
نه‌وه‌ك ئه‌و بیر ده‌كه‌ینه‌وه و
نه‌وه‌ك ئه‌ویش ڕاده‌وه‌ستین .
١٣- ئه‌م په‌یكه‌ره
نامه‌یه‌كه بۆ ئه‌وانه‌ی كۆشكه‌كانیان
به‌رز به‌رزن
كه‌چی سه‌ریان زۆر له ئاستی پێڵاوی
ئه‌م نزمتره .
١٤- ئه‌گه‌ر ڕۆژێ بوومه‌له‌رزه
یان ڕووداوێ،
ئه‌م په‌یكه‌ره سه‌ره‌و ژێركاو
ڕێك به‌پێوه ڕابوه‌ستێ
بێگومانم،
نه ئه‌و به‌وه قایل ده‌بێ و
نه من له‌م شیعره‌م ژێوانم!
