Skip to Content

Friday, March 29th, 2024
یوسف عزه‌دین له‌ وه‌ڵامی ته‌وه‌ره‌ی شار

یوسف عزه‌دین له‌ وه‌ڵامی ته‌وه‌ره‌ی شار

Closed
by August 1, 2008 گشتی

 یوسف عیزەدین: دیارە قسەكردن لەسەر شار، ئەگەر مەبەست بێت سەتحییانە لەبارەیەوە نەدوێین و لەم دەرفەتە دیاریكراوەدا شتێك خۆمانى لێبدەین، ئەوە بێگومان كارێكى سەختە و بەتایبەتیش كاتێك پرسیارەكە تایبەت بێت بەپێوەندى نێوان كورد و شار.. یان تایبەت بەمێژووى شار، چونكە هەر میللەت و نەتەوەیەك كاتێك لەبارەى خۆى و شارستانییەتەكەیەوە دەدوێت، باس لەدەیان شارى مێژوویى خۆى دەكات، یان هەر هیچ نەبێت باس لەشارێكى گرنگى خۆى دەكات، فینیقییەكان لەئێستادا نەماون بەڵام ناوى شارێكى گرنگى وەك كارتاجیان لەپاش خۆیان جێهێشتووە، هەرچەند رۆمانەكان لەسەردەمى خۆیدا بەمەبەستى سڕینەوى هەموو بوونێكى، دارو پەردووى ئەو شارەیان لەبنڕا دەرهێنا، بەڵام دواجار ئەو شارە وەك مێژوویەك هەر مایەوە، دیارە بوونى كەسایەتییەكى وەك هانیبالأ-یش لەمانەوەى ناوی شارەكەدا رۆڵى هەبووە. دابڕانى كورد لەمێژووى شارە دێرینەكانى و نەمانى هەر شارستانیەتییەكى پێشووى، بەچەشنێك كەساغكردنەوەشى لەمڕۆدا ئاستەمە، بۆ خۆى كێشەیەكى گەورەیە.. تۆ بڕوانە " میهرداد.ئیزەدى" لەكتێبى "كوردەكان"دا دەڵێت:( -كۆماگەنآ-ش بچووكترین كۆمەڵگەى كوردە زیلانییەكان بووە، كەلەناوچەكانى باشوورى كوردستانى توركیادا گیرساونەتەوە، ئەو پەیكەرە گەورانەى سەر چیاى نەمرود-یش خوداوەندى زیلانییەكان بووە لەو دەمەدا. تائێستاش سەر پەیكەرەكان وەك خۆیان ماون، هەموو ئەم بەڵگانەش ئاماژەیەكى ئاشكراو دیارن، بۆ بوونى -3000- سالأ لەمەوپێشى كورد لەناوچەكەدا).. دیارە ئەگەر ئەمە وەك نمونەیەك وەربگرین بۆ شارستانیەتى كورد، بەتایبەت ئەو پەیكەرانەى سەر چیاى نەمرود یەكێكن لەو شتە سەیرو عەجایبانەى كەساڵانە لەهەموو شوێنێكى دنیاوە توریستێكى زۆر دێنە سەیرى، بەڵام لەهەمووشى سەیرتر چاوپێكەوتنى كەناڵێكى تەلەڤزیۆنى بوو لەگەلأ ئافرەتێكى كوردى خەڵكى گوندێكى ئادیامان-ى نزیك چیاى نەمرود سەبارەت بەوەى ئاخۆ هیچ كاتێك مەراقى ئەوەى نەبووە كەبچێتە سەیرى ئەو پەیكەرانە كەزۆر نزیكە لێیانەوەو بەشێكن لەمێژووى ئەو. ئافرەتەكەش بەپێكەنینەوە گوتى: ( نەخێر هیچ كاتێك؟! بۆ مەراقى بینینى بكەم، مەراقى من ئەو زەوییەیە كەدەیكێڵم).. ئەگەر شتێك لەقسەكانى ئەو ئافرەتە كوردە وردبینەوە، دەبینین نەبوونى مەراق بۆ زانینى شتەكان و پرسیارنەكردن تەنانەت دەرحەق بەو شتانەى كەهى كوردیشن، پانتاییەكى بەرفراوانى ئەقڵیەتى كوردى داگیركردووە..رەنگە پاش ئەو دابڕانەى كورد لەمێژووى شارنشینى خۆى و لەمێژووى خۆى، ئەمە روویدابێت، یان هۆكارى دیكەى هەبێت و لەئێستادا دەرفەت نەبێت بۆ تاوتوێكردنى. بۆ تێگەیشتن لەشاریبوونى كورد دەبێت سەرەتا زانیارییەكمان سەبارەت بەمێژووى شارنشینى كوردەوە هەبێت و لەوە حاڵیببین كەشار لاى كورد چى بووە؟ بڕوانە ئەوەى كە سۆمەرى و میسرییە كۆنەكان و فینیقییەكان و یۆنانى و رۆمانى و ئەوانى تر چۆن روانیویانەتە شار و مانەوەى پاشماوەى شارە كۆنەكانیشیان لەئێستادا لایان چى دەگەیەنێت. بەڵام كورد كام پاشماوەى شارى دێرینى ماوە كەهى خۆى بێت، ئەى دەكرێت بڵێین بێجگە لەو مێژووە كۆنەى كەبۆ خۆى شارى بووەو بەشداربووە لەبیناكردنى شارسانییەتدا، ئیتر بەتەواوى بووبێتە كۆچەرى و دابڕابێت لەشارستانیەت و بەهەمان شێوەش لەچالاكییە مێژووییەكان ئەگەر نەڵێین خودى مێژوو خۆشى.
 ئەگەر دەستبەردارى تاوتوێكردنى مێژووى شار و پێوەندییەكانى كورد بەچەمكى شار و تێگەیشتنى لەشار، بەمانا مێژووییەكەى بهێنین و نمونەیەك وەرگرین لەو تیرانەى مرۆڤ كەلەنێو سروشت و دەرەوەى شاردا ژیاون، هەر بۆنموونە  ئەبۆرژینەكان، كەتائێستاش ئاوێتەى شار نەبوون و نەیانتوانیوە ئینتیماى بۆ بكەن، هەرچەندە لەمەشدا سیاسەتى دەوڵەتى سەردەست رۆڵى بینیوە، بەڵام لەگەلأ ئەوەشدا شار لاى ئەبۆرژینییەك ئەوە نییە كەكەسێكى شارنشین تێى دەڕوانێت كەبەمیرات شارنشێنێتى بۆماوەتەوەو ئاگادارى مێژوویەكى دوور و درێژى شارە.. یان بەشێكى هیندییە پێست سوورەكان سەربارى بوونى شارستانیەتییەكى كۆنى خۆیان، بەڵام كاتێك ئەوروپییەكان ئەمریكایان داگیركرد، ئەوان خێلەكى بوون و خۆشیان ئاگادارى ئەوە نەبوون كەرۆژێك لەرۆژان خاوەن شارستانیەتییەكى هاوشانى فیرعەونییەكان بوون. سەبارەت بەمێژووى چەند سەد ساڵەى كوردیش، لەدیگەى گەڕیدەو گەشتیارەكانەوە، نمونەیەكى پۆزەتیفمان لەبەرچاودا بەرجەستە نابێت، هەروەك گەڕیدە" هێنرى بێندەر" باس لەماڵە قوڕینەكانى كورد دەكات، كەبەحاڵ لەزەوى بەرزترن.. هەندێك جار بەلاساییكردنەوە، بۆنمونە  یەكێك لەدەسەڵاتەكانى كورد لەیەكێك لەقۆناغەكانى مێژووداو لەناوچەیەكى دیاریكراودا، هەوڵى دروستكردنى شارى داوە، وەك لاساییكردنەوەى بابانەكان بۆ شارەكانى ژێر دەسەڵاتى عوسمانییەكان لەدروستكردنى شارى سلێمانیدا..  كەتائێستاش هەر بەلاساییكردنەوە شارە كوردنشینەكان دروستدەكرێن، بوونى ئەو هەموو كۆمپانیا بیناسازیەش لەكوردستاندا نمونەیەكى بەرچاون. ئەمە لەكاتێكدا خودى توركە عوسمانییە خێلەكییەكان كاتێك دەسەڵاتیان هەبووەو شاریان دروستكردووە، یان دەستكارى شارەكانى پێشوویان كردووە، سەربارى نەبوونى هیچ زانیارییەكى پێشوەختیان سەبارەت بەدروستكردنى شار بەڵام بەماوەیەكى كەم شوێن پەنجەى رۆژهەڵاتیانەى جیاوازى خۆیان لەبیناسازى شارەكاندا بەجێهێشتووە، بیناسازێكى میعمارى وەك " میعمار سینان"  ئاستى بیناسازى عوسمانییەكانى گەیاندۆتە رادەیەك كەخودى رۆژئاواییەكان شەیداى كارەكانى بوون، یەكێك لەخەسڵەتەكانى بیناسازى عوسمانییەكانیش جێكردنەوەى باڵندە بووە لەنێو بیناكاندا، واتە كاتێك بیناكانیان دروستكردووە، شوێنى هێلانەى باڵندەو ئەو شتانەشیان دروستكردووەو زۆر بەوردى بیریان لێكردوونەتەوە، رەنگە هەبێت ئەمەى پآ گرنگ نەبێت، بەڵام ئەگەر كەمێك بەوردى بیرى لێبكەیتەوە دەبینیت، شار بەبآ دار و درەخت و باڵندە ماهییەتى خۆى لەدەست دەدات و ئەمەش بۆخۆى بابەتێكە كەدەبێت بەجیا قسەى لەسەر بكرێت، ئەقڵیەتى ئەوانەى لەمڕۆدا بڕیار لەسەر دروستكردنى كۆشك و ساختمان وتاد.. دەدەن ئەقڵیەتێكە بآ حیسابكردن بۆ بوونى باخ و سەوزایى و ئاو و باڵندە بینا بەئاسماندا دەبات، ئەمە بەدروستكردنى پاركەكان و روواندنى چەند درەختێك لێرەو لەوآ چارەسەر نابێت، دەبێت بیر لەوە بكەینەوە لەپێناو دروستكردنى ئەو بینایانەدا چ دارو درەخت بڕدرانەوە، ئێستاش لەزۆر شارى رۆژئاوادا كەدرەختى تێدا رووابێت، كەس ناتوانێت لەنێوەڕاستیدا ساختمان و بینا و ئوتێل دروستبكات، بەڵام بآ ئەوەى ئاماژە بەهیچ كامێك لەو بینایانە بدەین، كەخۆشترین شوێنى ناوەڕاستى گچكە دارستان و باخ وباخاتیان هەڵبژاردووە، بەشێكى زۆرى خەڵكى كوردستان خۆیان ئاگادارن و بەچاوى خۆیان دەیبینن.
 زۆربەى شارە كورد نشینەكان بەشێوەیەك لەشێوەكان و بەشێواوى سەربارى ئەوەى كەلەشارەكانى دەرو دراوسآ دەچن و زیاتر وێنەیەكى بچووككراوەن، لەهەمان كاتیشدا تێكەلأ و پێكەلأ و بێسەرەوبەرەن، باسكردنیشمان لەمە هیچ نەنگییەكى تێدا نییە.. ئیدى كوردێك كەتراژیدترین كارەساتەكانى نێو مێژووى ناوچەكەى بەچاوى خۆى بینیوەو خۆى ئەكتەرى ماڵوێران و زیان بەركەوتووى سەرەكى سەرجەم رووداوە خوێناوییەكان بووە،ناكرێت قورسایى ناشرینى شارەكانیشى بەتەواویى بخەینە ئەستۆ.. بەڵام ئەگەر قسە بێتە سەر ئێستاى هەرێم ئەوە مەسەلەیەكى ترەو بۆمان هەیە قسە لەسەر ورد و درشتەكانى ئەو شتانە بكەین، كەبەناوى ئاوادانكردنەوەى شارەكانەوە ئەنجام دەدرێن، ئەگینا كوردێكى شوێنێكى تر كەئیختیارێكى سیاسى نەبێت و ژێر دەستە بێت، چى دەرحەق بەبیناسازى و ئاوەدانكردنەوەو نەكردنەوەى شارەكانى بڵێت و چى پێدەكرێت، بەتایبەت لەئاست تێڕوانینێكى نوێى ئەمڕۆى بیناسازیدا. شار و بیناسازى دوانەى یەكترن و بەجیا بیریان لێناكرێتەوە، پەیكەرەى دروستكردنى شار لەئەستۆى كردەى بیناسازى و تێڕوانینى بیناسازیدایە، كەئەم تێڕوانینە بۆ خۆى لەدنیاى ئەمڕۆدا پێویستى بەهەڵوەشاندنەوەیە، لەكاتێكدا بەتەرز و تایپى بیناسازى توركى و شوێنانى تر وا لەكوردستاندا كارى بیناسازى بەردەوامەو پاش چەند ساڵێكى تر ئەوانەى بەرپرسن لەرێگەدان بەو كارانە هەڵەى خۆیانیان بۆ دەردەكەوێت، لەبیناسازیدا دەبێت سەدان حیساباتى تۆبۆگرافى و جوگرافى و كۆمەڵایەتى و سیاسى و زۆر شتى تر لەبەرچاو بگیرێت، واتە كاتێك كۆمپانیایەك رادەسپێریت فڵانە بینات بۆ دروست بكات، دەبێت دنیابینییەكى بیناسازییانەى خۆشت هەبێت و بیخەیتە بەردەستى و بەو پێیەى تۆ مەبەستتە ئاوا دروستى بكات، بیناسازى چینى و ژاپۆنى و زۆرى تریش یەك پێكهاتەن، تەنانەت كاتێك بینا نوێیەكانیش دروست دەكەن ئەو هارمۆنیەتە ناشێوێنن، چونكە شێواندنى نەزم و سیستمى پێكهاتەیى بیناسازى شارەكان، هەموو شێواندنەكانى تریش بەدواى خۆیدا دەهێنێت.
 كاتێك لەئێستاى كوردستاندا دەگەڕێیت بەڕوانینە بیناكانى نازانى لەكوێى، چ جۆرە چەشنە بیناو شێوازێكى بیناسازیت دەوێت بەتێكەلأ و پێكەڵى هەیە. وەك گوتمان شار و بیناسازى دوانەى یەكدین و لێك دانابڕێن، بیناسازى كۆن و نوێى مرۆڤیش نغرۆى میتافیزیك و تێڕوانینى باڵادەستانەى چینە سەردەستەكانە، خەڵكى رەش و رووت و سادە لەمە ئیختیارێكى نییەو بەشداریش نییە لەو پرۆسەیەدا، هەرچەندە بەڕاى دریداو هایدگەریش ئەسڵى مەتڵەب لەبیناسازیدا دروستكردنى مەسكەن و ماڵ و شوێنى حەوانەوەیە، وەك لەشوێنێكى تریشدا باسمكردووە هایدگەر بیناسازى و دروستكردنى مالأ و بیركردنەوە پێكەوە گرێدەدات و وەك پێكهاتەیەكى دانەبڕاو تێى دەڕوانێت و هەر لەم روانگەیەشەوە دەتوانین بەروانینە چەشنى ئەو بیناسازیانەى كەلەشارەكانى كوردستاندا هەیە، لەبیركردنەوەى كورد بەشێوەیەكى گشتى حاڵى ببین. ژاك دریدا توندو تیژى و هەر تاوانێك كەلەنێو شارەكاندا رووبدات، وابەستەى چەشنى بیناسازى دەكات.. هەر بۆیە لێدانى"رۆدنى كینگ"ى رەش پێست لەلایەن پۆلیسى لۆس ئەنجڵس- وە لاى دریدا دەبێتە پرسیار و پێى وایە ئەگەر خەڵكى ئەو شارە سەبارەت بەو رووداوە نەیەنە وەڵام و هەڵوێستیان نەبێت، ئەوە بۆ دروستكردنەوەى سەرلەنوێى ئەو شارە رووخاندنى بەپیك و چەكووش بێسوودە، تەنانەت ئەگەر سەر لەنوآ دروستیش بكرێنەوە، بەبۆچوونى دریدا دەبێت لەدنیابینییەكى سیاسى نوێوە هەوڵى هەڵوەشاندنەوەى مۆدێلى كۆنى شارەكان بدرێت و ئینجا شتێكى نوێى لێدروست بكرێت.. بۆ نمونە كاتێك لەشارێكدا جەنگێك دەقەومێت، یان لەشوێنێكەوە هێرشێكى بۆ دەكرێت، یان خۆپیشاندانێكى گەورەى تێدا دەكرێت، یان كیمیاباران دەكرێت وەك هەڵەبجە و زۆر شتى ترى لەو جۆرانە، ئیدى ئەو شارە شارەكەى پێشووتر نییە، راڤەكردنى ئەوەى كەچییە زۆرى دەوێت بەڵام شتێكى ترە، ئاخۆ ئەو هەڵەبجەیەى كەپێش كیمیابارانكردنى هەبووە ئەم هەڵەبجەیەى ئێستایە، بەتایبەت كاتێك وێنەى ئەو هەموو قوربانیانە بەبەردەوام دێتەوە پێش چاومان و لەوێنە و فیلمەكاندا دەیانبینین، ئەگەر كورد لەمڕۆدا ئەقڵیەت و دنیابینییەكى بیناسازیانەى هەبووایە، سەربارى زۆر شتى تر، ئاخۆ هەڵەبجەی بەم شێوەیەى ئێستاى بەجآ دەهێشت، دیارە مەسەلەكە هەر لەدروستركدنى بیناو ساختمانى هەڕەمەكیانەو ئاوەدانكردنەوەى بێسەرەوبەرەدا نییە، چۆن كیمیابارانكردنى هەڵەبجەو زۆر شوێنى ترى كوردستان لەرووى گرنگیى مێژوویى و تراژیدیبوونى ساتەوەختێكى و زۆر شتى تریشى جیاوازە، ئاواش دەبێت لەرووى بیناسازییەوە لەهەموو شوێنەكانى كوردستان جیاوازتر بێت و تاكوردیش كار بۆ خوڵقاندن و دروستكردنەوەى هەڵەبجەیەكى تر و هەموو ئەو شوێنانە نەكات كەزیانیان بەركەوتووە بەتایبەتیش ئەو شوێنانەى لەكاتى ئەنفالدا لەگەلأ عەرد كرانە یەك و خاپووركران، ئەوە خۆ خەریككردنى بەشارەكانى ترو شتى لابەلاوە شتێكى بێمانایە.
 سەبارەت بەپرسیار كردنیشتان سەبارەت بەوەى ئاخۆ كولتوورى شارمان هەیە، ئێمە زیاتر سەرجەم شتەكانمان بەمیرات بۆ ماوەتەوە، ئێمە شارمان بەمیرات بۆ ماوەتەوە، تا ئەم ساڵانەش وەك خۆى ماوەتەوە، ئەمە سەربارى ئەوەى بەعس توانى نەك هەر گوندەكان وێران بكات و گوندنشینەكان لەئۆردوگا زۆر ملێكاندا بهێڵێتەوە، بەڵكو سەرجەم شارەكانیشى كردە ئۆردوگا، شارە كوردنشینەكان تائێستاش شوێنێكى داخراون، بەبآ لێپرسنەوەو چەندین بازگە پێیدا تێپەڕنابیت، راستە مەسەلەكە ئەمنییە، كەواتە قسەكردن لەزۆر شتیش بێمانایە، دەبێت چاوەڕێى چاكبوونى ئەم بارودۆخە بكەین، كێشەى لوبنان و ململانێیەكانى تائێستا چارەسەر نەبووە و هەر لەم ماوەیەى پێشوودا شڵەقا.. ئیدى نازانین ئەوەى باشوورى كوردستان چارەسەر بووە، یان ئەویش قابیل بەئاڵوگۆڕەو بەو پێیەش دەبێت لەهەموو هەنگاوێكدا حیساب بۆ ئەوە بكرێت كەڕەنگە لەئایندەدا رووبدات، بۆ نموونە ئەگەر ئاوادانكردنەوەى گوندەكانى دەوروبەرى قەندیل بۆ ئەوە بوو بەبەردەوام تۆپبارانبكرێت، ئەى بۆ ئاوەدانكرایەوە، ئەگەر ئاوادانیش كراوەتەوە چۆن دەبێت بەرانبەر بەدەستدرێژى تورك بۆ سەر ئەو ناوچەیە بێدەنگ بین، ئەگەر ئێمەى كوردى باشوور ئینتیمایەكمان بۆ زێدو شوێنى خۆمان هەبێت، چۆن دەبێت بەرانبەر بەو پێشێلكارى و دەستدرێژیانە بێدەنگ بین، یان نازانم چۆن دەبێت رێبدەین دەوڵەتێك كەدوژمنایەتیمان دەكات، زۆربەى كۆمپانیاكانى لەكوردستاندا بكەوێتە كار و باشترین دەسكەوتى بەسایەى ئێمەوە دەست بكەوێت، ئەمانەو دەیان پرسیارى تر پەیوەستە بەوەى ئەگەر ئێمە ئینتیمامان بۆ پانتاییەكى جوگرافى نەبێت كەساڵانێكە باوانمانى تێدا دەژى، ئیتر چۆن ئینتیمامان بۆ شار و كولتورو سەرجەم شتەكانى تر دەبێت.
  گەر جارێكى تر بگەڕێمەوە سەر پرسیارەكەتان، سەبارەت بەوەى كەگەڕەكەكان بوونەتە شوێنى یەكانگیربوونى عەشیرەتگەرى و تایفەگەرى و پێوەندى ئەمەش بەهاتنى گوندنشینەكانەوە بۆ شار.. ئەوە وەك پێشتریش ئاماژەمان پێدا ئێمە هەر لەسەرەتاوە شارێكى هێندە جیاوازمان لەگوندەكان نەبووە، تا بەهاتنى ئەوان شارەكانمان وێران بووبێت و زۆرجاریش بەخوێندنەوەى ئەو راوبۆچوونانەى كەهەموو ناشرینییەكانى ئێستاى شارەكان دەخەنە ئەستۆى ئەو كوردانەى كەلەگوندەكانەوە روویانكردۆتە شارەكان زۆر نیگەران دەبم و ئەمەش بەتێڕوانینێكى سەقەت و ناشرینى هەندێك كەسى خۆ بەشارى زانى دەزانم.. بۆرژوازییەت هەر لەسەرەتاكانییەوە پێویستى بەهێزى كارى هەرزان هەبووەو بۆ ئەمەش تەشویقى خەڵكى گوندەكانى كردووە، یان ناچارى كردوون بێنە شار و لەكوردستانیشدا بەكاولكردنى گوندەكان ئەمە روویدا.. ئێستاش ئەو كۆچكردنە لەگوندەوە بۆ شار لەزۆر شوێنى دنیادا بەردەوامەو كەسیش گلەیى نییە، نیوەى شارێكى وەك ئیستانبول گوندنشینە كوردەكانن كە بۆ كاركردن روویانكردۆتە ئەو شارەو سەربارى جیاوازى رەگەز و مەزهەب و فەرهەنگ و تێڕوانین، لەگەلأ ئەوەى زۆربەى ئەو كوردانە نەخوێنەوارن، بەڵام كەس شار بەدەرى نەكردوون و نەیوتوە شارتان ئەتككرد، یان شارتان وێرانكرد.. كاپیتالیزم كارى بەچى مەیسەر بێت تەرویجى بۆ دەكات، چۆن هەزاران كورد لەئێستادا لەهەندەران هەن و بەكرێكارى ژیانى خۆیان دابین دەكەن و كەسیش بەو شێوەیەى كۆمەڵێك خۆ بەشارى زان دژایەتى گوندنشینەكەى خۆمان دەكەن دژایەتى نەكردوون، سادەترین نموونە بۆ ئەوەى لەوە حاڵى بین زۆرێك لەئێمەى كورد ئەخلاقیاتى خەڵكە شارنشینمان نییە، ئەو خستنەپاڵى ناوى شوێن و زێدى ئەسڵى كەسێكە بۆ ناوەكەى، تەنانەت ئەمە پێش ئەو كۆچە بەرفراوانەى كەلەگوندەوە بۆ شارە كوردنشینەكان دەستى پێكرد، هەر هەبووە ئەمە جگە لەخستنەپاڵى ناوى گەڕەك و سەیرترین بەسەرهاتى شارەكانیشمان ئەو شەڕە گەڕەكە بوو كەتاساڵانێكى نزیكیش هەر مابوو، تەنانەت هۆنراوەو شیعریشى بۆ گوتراوەو كەسانێك هەبوون لەگەڕەكەكاندا لەكاتى شەڕە گەڕەكدا برین پێچیان كردووەو هەر بۆ خۆشى ئەمە باسێكى سەربەخۆیەو پێش هەموو شتێكیش گرفتێكى ئەخلاقى گەورەى هەر تاكێكى كوردە، چونكە ئێمە وڵاتێكین سەدان حیكایەتى شەڕە عەشیرەت و هۆز و شار و گەڕەكى تێدایە، تاگەیشتە شەڕە پەڕۆو دواتریش شەڕى ناوخۆ و راشكاوانەش ئەوەى لەئێستادا هەیە تەنها پەردەپۆشكردنى ئەوەیە كەهەیە، ئەگینا وەك خۆیەتى و هی شتێك نەگۆڕاوە، دواجاریش دەبێت ئاماژە بەوە بكەین ئەم بابەتە زۆر هەڵدەگرێت و ئاستەمە لەدەرفەتێكى دیاریكراودا شتێكى ئەو تۆى لەبارەوە بڵێین.
 
 *لەبەروارى 31-7-2008لە رۆژنامەى كوردستان راپۆرت بڵاوبۆتەوە
 

Previous
Next
This site is registered on wpml.org as a development site.