یەکێتی دوای تاڵەبانی، کاردانەوەو دەرهاویشتەکان…
پێناچێت تاڵەبانی بتوانێت بگەڕیتەوە بۆ ناو کایەی سیاسی. دورکەوتنەوەی تاڵەبانیش لە کایەی سیاسی کاردانەوەو دەرهاویشتەی هەمەلایەنە بەدوای خۆیدا کێش دەکات. تاڵەبانی چ وەکو سەرۆک کۆماری عێراق، چ وەکو سکرتێری یەکێتی نیشتمانی و کاریزما بوونی لەناو یەکێتیدا، هەروەها وەکو کەسایەتیەکی سیاسی و دیبلۆماتکارێکی دیاری ناوچەیی، دورکەوتنەوەی روداوێکی سادە نییە. دیارە لەناو هەموو ئەمانەدا، دۆخی یەکێتی نیشتمانی دوای تاڵەبانی، گرنگترین لایەنیەتی کە بابەتی سەرەکی ئەم وتارەیە. بەڵام بەرلەوە بە پێویستی دەزانم زۆر بەکورتی لە پەیوەند بە پۆستی سەرۆک کۆماری و پێگەی تاڵەبانی لەکایەی دیبلۆماسیدا، ئاماژەیەک بدەم.
تاڵەبانی وەکو سەرۆک کۆمارو کاراکتەرێکی دیبلوماسی
پۆستی سەرۆک کۆماری عێراق لەگەڵ ئەوەدا پۆستێکی رەمزی و تەشریفاتییە، بەڵام لەدۆخی عێراقدا ئەم پۆستە و ئەم جێگایە، ناکرێت تەنها لە چوارچێوەی پۆستێکی رەمزیدا مامەڵە بکرێت. تاڵەبانی بەپێی رێکەوتنی یەکێتی و پارتی ئەو پۆستەی وەرگرتووە، واتە ریكەوتنامەیەک لەئارادا بووە کە بنەماکەی رێکەوتنی ستراتیجییە. پایەی سەرەکی رێکەوتنی ستراتیجیش پاوانی قەڵەمرەوی دەسەڵات و داهات لە نێوان خۆیان و پارێزگاری کردن لە پیگەی سیاسی و قەڵەمرەوی سیاسییانە. لەو چوارچێوەیەشدا هەرکام لە پۆستە سیاسی و ئیداری و حکومیەکان، بەشێکن لەپۆست و کاردابەشکردنی نێوان دوو حزبی سەرەکی سەر بەیەک بزوتنەوەی دیاریکراو ” بزوتنەوەی ناسیونالیستی کورد”. ئەم پۆستەی تاڵەبانی دوای بێنەو بەردەیەکی نێوان پارتی و یەکێتی دراوە بە تاڵەبانی تا نوێنەرایەتی بزوتنەوەی ناسیونالیستی کورد لە ناوەندا بکات. لە جێگایدا پارتی، ویست و خواستی خۆی هەبووە و بەسادەیی و بێ بەرابەر ملی نەداوە بەدانی ئەم پۆستە بە یەکێتی و بە تاڵەبانی. هەروەها پۆستی سەرۆک کۆماری لەسەر ئاستی عێراقیشدا، دیسان بەپێی سازانی هێزە سیاسیەکانی بزوتنەوەی ناسیونال ئیسلامی” شیعی” و بزوتنەوەی قەومی عەربی و بە ناو تۆرێک لە پشتیوانی ئەمریکاو وڵاتانی ناوچەکەدا، تێپەریوە. بۆیە دوورکەوتنەوەی تاڵەبانی لەو پۆستە، کاریگەری لەسەر هەموو ئەو سازان و رێکەوتننامانە، دادەنێت. لەلایەکەوە پارتی و یەکێتی دەبێ رێک بکەونەوە لەسەر کاندیدی داهاتویان بۆ جێگەی تاڵەبانی، کە ئەمە خۆی جێگای کێشەیە. ئەگەر پارتی بەپێی هەمان رێکەوتننامەی پێشوش رازی بێت لە دانەوەی ئەم پۆستە بە یەکێتی، بەڵام ململانێ لەسەر کێ و کام کەسایەتی سیاسی ناو یەکێتی بۆ ئەم پۆستە، دیسان جێگای کێشەیە. هەر کەسێك کاندید بێت بۆ ئەم پۆستە بەجیا لەرێکەوتنی پارتی و یەکێتی، پێویستی بە پشتیوانی ئەمریکا، هەروەها ئێران لەلایەک، تورکیاو وڵاتانی عەرەبی لەلایەکی ترەوە هەیە. پارتی و یەکێتی هەردوولاشیان بەوێنەی هاوپەیمانی کوردستانی و دوو هێزی سەرەکی بزوتنەوەی کوردایەتی لە کوردستان، لەبەرامبەر بە بزوتنەوەی ناسیونال ئیسلامی شیعی و بزوتنەوەی ناسیونالیستی عەرەبیدا، لە ناوەند، روبەروو دەبن لەگەڵ ئەزمەی دیاریکردنەوەی جێگرەوەیەکی کورد لە جێگای تاڵەبانی… ئەمە پرۆسەیەکی سیاسی بێ کێشە نییە لەعێراقدا کە ئەزمە، بۆتە سیمایەکی بەرجەستەو تایبەتمەندیەکی دیاری حکومەت و دەسەڵاتەکەی…
تاڵەبانی وەکو کەسایەتیەکی سیاسی و دیبلۆماسی لە ئاستی جیهانی و ناوچەکەدا، لەیەک کاتدا دەیتوانی رۆڵی سازش و جەنگخوازی، ئاشتی و شەڕ، گریان و پێکەنین، دۆستایەتی و دوژمنایەتی، حەق و ناحەق، دیدی دور مەودا و کورت مەودا… نمایش بکات. ئەم تایبەتمەندییە بەهەر لێکدانەوەیەکەوە لێک بدرێتەوە، چ بەوەی کەئەمە هونەری دیبلۆماسییە، یان (سیاسەت هونەری مموکیناتە) کەم کەس دەتوانێت بەکردەوە لەخۆی نیشان بدات. دورکەوتنەوەی تاڵەبانی لە کایەی سیاسی و دیبلۆماسی بۆشایەک لەو مەوقعیەیە پێک دەهێنێت، کە ئەو دەیتوانی بیگێرێت. بێگومان هەموو بزوتنەوەیەکی سیاسی بە پێی تایبەتمەندیەکانی بزوتنەوەکە کەسایەتی سیاسی و دیبلۆماسی خۆی ، دروست دەکات. بەڵام تایبەتمەندی تاڵەبانی لەپایەترین ئاستیدا، بەکاربردنی شێوازی هەموان رازی بکات، دڵشکێنی نەکات، لەسەر ئەزمە ژیانی سیاسی دابرێژێت، بوو. بۆ ئەم مەبەستەش دەیتوانی لەیەک کاتدا چەند رۆڵ بگێرێت، کە بەرجەستەترینیان هونەری دڵسۆزی نواندن و ستایش بەخشینەوەو پیا‌هەڵدان، زوو گۆڕین و کەم بڕکردنی بەڵێن و پێچەوانە بوونی لێدوانەکانی …بوو. کە ئەمە بەهەموو کەسایەتیەک ناکرێت و هونەرێكی تایبەتە!!.
دیارە پێگەی تاڵەبانی چ وەکو سەرۆک کۆمارو چ وەکو کەسایەتیەکی سیاسی و خاوەن پێگە لەسەرئاستی ناوچەکەو دنیا، بەرهەمی پێگەی ناسیونالیزمی کورد لەدەسەڵات و حاسڵی پێگەی یەکێتی نیشتمانی کوردستان لەناو بزوتنەوەی قەومی کورد و دەست راگەیشتنی بوو بەدەسەڵاتی سیاسی لە کوردستاندا. دیارە بە پشتیوانی ئەمریکاو لەدڵی کەشێکی کۆنەپەرستانەی جەنگخوازیدا، لەگەڵ هاوتا سیاسیەکەی پارتیدا، نەک شتێکی تر…
دۆخی یەکێتی دوای تاڵەبانی
ئێستا کە دۆخی تاڵەبانی ناجێگیرە و ئاماژەکانیش روویان لە داکوژانی دەوری تاڵەبانییە لە کایەی سیاسیدا، پرسیاری سەرەکی ئەوەیە، یەکێتی دوای تاڵەبانی چی بەسەر دیت؟ یەکێتی تا چەندە دەتوانیت لە نەبوونی تاڵەبانیدا، نەخشی سیاسی خۆی وازی بکات؟
هیچ گومان لەوەدا نییە، کە تاڵەبانی لەمێژوی پێکهاتنی یەکێتی نیشتمانیەوە تاکو ئێستا خاوەن قورسایەکی تایبەت بووە لە ناو یەکێتیدا. وە تەواوی سەرکردایەتی یەکێتی، سەرباری هەری تێبینی و نیگەرانیەک کە لە تاڵەبانی بوویانە، ئەویان وەکو سەرکردەو براگەورە!! و رابەری خۆیان قبوڵ کردووە. تاڵەبانیش توانیویەتی هەژمونی سیاسی خۆی بەتەواوەتی بەسەر یەکێتیدا بسەپێنێت و ببێتە چەترێکیش بۆ کۆکردنەوەی باڵ و لاباڵەکانی ناوخۆی یەکێتی، کە هەمیشە لەناو یەکێتیدا بوونی هەبووە. هەروەها تاڵەبانی توانیویەتی دارعاسای یەکێتی بێت لە دۆخە دژوارەکانی ژیانی سیاسی و رێکخراوەیی یەکێتیدا، وە هەر ئەویش توانیویەتی هاوسەنگی هێزی باڵەکانی ناو یەکێتی، باڵانس بکات و ئیدارەی ناکۆکییە ناوخۆیەکانی یەکیتی بکات و ببێتە چەسپی ناوخۆیی بۆ لێكهەڵپێکانی باڵەکان و پاراستنی یەکێتی لەشەق بوون و لێکترازان. لەو دۆخانەشدا کە لێکترازان یان جیابونەوە لەریزەکانی یەکێتی لە ئیرادەی ئەو واوەتر بووە، دیسان نەخشی ئەو رۆڵی زۆری بینیوە لە ئیحتیواکردنی شپرزەییەکان، دوبارە سازدانەوە و تێپەڕاندنی ئەزمەکان.
تاڵەبانی وەکو کەسی یەکەمی ناو یەکیتی هەموو دەسەڵاتە سەنگین و بریارە گرنگ و یەکلاکەرەوەکان و لەدەستی خۆی و دەوروبەرە نزیکەکەیدا، بووە. ئەو دەورە کە تاڵەبانی بەو قورسای و سەڵاحیەتەوە لەناو یەکێتیدا گێراویەتی ئەوی کردووە بە جێگا متمانەی رابەرایەتیەکەی و کادرەکانی… هەر ئەم رۆڵەی تاڵەبانی وای کردووە، کە چ پارتی وەکو حزبی نەیاری یەکێتی و تاڵەبانی و چ لایەنە سیاسیەکانی تر لەسەر ئاستی کوردستان، تا دەگات بە حزب و لایەنە سیاسیە عیراقیەکان، وڵاتانی ناوچەکە، ئەو وەکو کەسی یەکەمی یەکێتی نیشتمانی بەرەسمی بناسن و مامەڵەی لەگەڵ بکەن.
کۆتایی هاتنی نەخشی سیاسی ئەو، هاوسەنگی هێز، ریزبەستنەکان، تەنانەت زەمەنی سیاسی یەکێتی، دەخاتە بەردەم پێناسەو دۆخی تازەوە، یەکێتی دەخاتە بەردەم هەلومەرجێکی نوێ. بەتایبەتیش یەکێتی لە کاتێکدا رووبەرووە لە داکوژانی نەخشی تاڵەبانی، کە وەزعی و سیاسی و رێکخراوەیی و قورسایی سیاسی یەکێتی لەسەر گۆرەپانی کوردستان و عێراق و ناوچەکەدا، تا هاتووە لاواز بووە.
یەکێتی بێ تاڵەبانی، خاوەنی چەند تاڵەبانیەکی بچوکۆلە و نەیار بەیەک و بێمتمانەن. ململانیی ناوخۆیی یەکێتی و بوونی چەند باڵ و لاباڵ، بە ئۆتۆریتەی جیاواز بە پشتیوانی جیاوازەوە، ئەو دۆخەیە کە متمانەی تاڵەبانی توانیبووی بەیەکەوە رایانبگرێت. لە نەبوونی تاڵەبانیدا ئەم چەسپ و ئەم چەتر کۆکەرەوەیە، نامێنێت. بۆیە زۆر بەسادەیی دزەی ئۆتۆریتەکان، و ململانێی ناتەندروست تا نزمترین ئاست دەکشێت و تەکەتولات لە سەرەوە شۆڕ دەبێتەوە بۆ ئاستی ئەندام و لایەنگرانی و جەماوەری یەکێتی… بەتایبەت نابێ بیرمان بچیت ململانێی ناوخۆیی یەکێتی و باڵەکانی ناو تەلاری یەکێتی، ململانێی نییە لەسەر خەتی جیاوازی سیاسی، ململانیی نییە لەسەر خزمەتی خەڵکی کوردستان. لەسەر دژایەتی هەوڵەکانی لکاندنەوەی کوردستان بە عێراقی قەومی ئیسلامیەوە، نییە. لەسەر روڵ بەخشین بە خەڵکی کوردستان بۆ بڕیاردان لەسەر چارەنوسی سیاسی خۆیان، نییە. لەسەر سەربەخۆیی سیاسی و دەرچوون لە بازنەی خۆشخزمەتی بۆ ئەمریکاو وڵاتانی ناوچەکە نییە. لەسەر بەرینکردنەوەی ماف و ئازادییە سیاسیەکان و مافە فەردی و مەدەنیەکان، نییە. لەسەر چونە جەنگی کۆنەپەرستی و دواکەوتووی ئیسلامی نییە. بۆ یەکسانی ژن و پیاو نییە، لەسەر جیاکردنەوەی دین لە دەوڵەت نییە، لەسەر توڕدانی یاساو ریسا ماوە بەسەر چووەکان، دژە ئازدییەکان، نییە. بەڵکە ململانێی ناوخۆیی و باڵەکانی لەسەر پێگەی سیاسی، لەسەر برێ سەلاحیەتی زۆرتر، داهاتی زۆتر، دەسترۆشتووی بەرینتر، قورسایی شەخسییە… بۆیەشە هیچ رەوتێکی یەکێتی لەناو یەکێتیدا، یان لە حاڵەتی جیابوونەوەش لە یەکێتی( بزوتنەوەی گۆران بە نموونە) ناتوانن ببنە هۆی گۆرینی هاوسەنگی بە ئاقاری هیڵێکی سیاسی جیاوازو هەڵگری ئەجندای نوێ، وە ناتوانن رێزی زیاتر بۆ قوتابخانە دابنێن لە بەرامبەر بە مزگەوتدا. گرنگی بە خەستەخانە بدەن لە جێگای بارەگای حزبی. هونەرمەندو نوسەر جێگای ستایش بێت لە جێگای مەلا و ئاخوند. ئازادی و ئازادیخوازی پیرۆزتر بیت، لە مقەدەساتە گەنیوە دین و قەومی و نیشتمانی و کەلتوری و ئەخلاقیەکان. وە ناتوانن ببنە هۆکارێک بۆ بەرینکردنەوەی ئازادی و خۆشگوزەرانی خەڵکی کورستان و پاشەکشەکردن بە کۆنەپەرستی…
تاو سەندنی ململانێی باڵە ناوخۆیەکانی یەکێتی لەدوای تاڵەبانی ئەگەرێکی بەهێزە تا ڕادەی شۆربوونەوەی ئەم ململانێیە بۆ ئاستی ئەندام و لایەنگران و جەماوەرکەیان… کە ئەمە ژینگەی لێکترازانی باڵەکان فەراهەم دەکات، بچوکتر بوونەوەی یەکێتی تا رادەی چەند یەکێتییەکی پارچە پارچە بەدوای خۆیدا دەهێنێ.
دوای تاڵەبانی بەرپرسی هیچ باڵ و لاباڵێک… خاوەنی ئۆتۆریتەو متمانەی باڵ و کوتلەکەی تری نییە. هیچ کام لە رابەرانی ئەو خەت و باڵانەی ناو یەکێتیش جێگای متمانەی تەواوی حزب و لایەنە سیاسیەکانی تر نین، بە تایبەتیش بەدیلی تاڵەبانی بۆ پارتی جێگاکەی خاڵی دەبیت و پارتی روبەرووی چەند بەرپرسێکی یەکێتی دەبێت کە هەر یەکەیان بانگەشەی جیگرتنەوەی تاڵەبانی یان خۆیان وانیشاندەدەن دەبێتەوە، لە کاتێکدا هەرکام لەو بەرپرسانە خۆیان تەنها دەتوانن قسەکەری باڵی خۆیان و تەکەتولی خۆیان بن نەک، نوێنەری ئەو یەکێتیەی کە تاڵەبانی پێشتر سکرێتری بووە… وە کێشمەکێش بۆ جێگرتنەوەی تاڵەبانی تەنها دەتوانێ لەدوا ئاکامدا یەکیتی بەرەولێکترازان ببات. وە زۆر قورسە هەوڵەکان بتوانن یەکێتی لەدارمان و لێکترازان بپاریزن، چونکە بە ئەندازەی هەوڵەکان بۆ یەکگرتوو مانەوەی یەکێتی، هەوڵەکان بۆ شەق بوونی یەکێتی دەوری خۆیان دەگێرن. جیا لەوانە چ پارتی و بزوتنەوەی گۆران و چ تورکیا و ئێرانیش لەئێستاوە لەناو کایەی داکوژانی دەوری تاڵەبانیدا، دەست بەکارن، هەرلایەکیان لەهەوڵی قەرەبووکردنەوەی زیانەکانی سەرخۆیاندان، کە لەغیابی تاڵەبانیدا، پێشبینی کراون. وە هەرکامەشیان خاوەنی پرۆژە و نەخشە و بەدیلی خۆیانن. ئەوەی لەونێوەدا لە هەموویان بێ بەدیل تر و دەستەوەستانترو شۆکتر ترە، خودی یەکێتییە بەهەموو باڵ و تەکەتولەکانیەوە، کە هیچیان خاوەنی ئاسۆیەکی رۆشن و پرۆژەیەکی رۆشن نین نە بۆ دۆخی یەکیتی و نە بۆ پێگەی باڵەکەی خۆیان. ئیران دەیەوێت کەسێك جێگەی تاڵەبانی بگرێتەوە کە نوینەرایەتی بە وەکالەت بۆ سیاسەتەکانی یان بەشێک لە ئەجندا سیاسیەکانی بکات لە دۆخی سیاسی کوردستاندا، کە دور بێت لەکاریگەری تورکیا و ئەمریکاو زبرتر بێت لە بەرامبەر پارتیدا. بەهەمان شێوە تورکیاش هەوڵدەدات لە غیابی تاڵەبانیدا، کەسێک لە یەکیتیدا جێگای تاڵەبانی بگرێتەوە کە زۆرتر لەپارتی نزیکتر و بۆ پارتی نەرمترو بۆ تورکیاش دۆستترو لە ئێرانێش دورتر بێت. لە سەرنەکەوتنی هەوڵی هەرلایەکیاندا، یان لە لاوازی و لەت بوونی یەکێتیدا، بزوتنەوەی گۆران و وەکو حزب و نەوشیروان مستەفا وەکو کاراکتەری سیاسی، دەبێتە جێگای سەرنج و تەماحی ئێران و تورکیا، بەتایبەتیش ئێران لەو گەمەیەدا شانسی سەرکەوتنی زۆرتر دەبێت. چونکە بزوتنەوەی گۆران و نەوشیروان، زۆرتر لە بازنە و قوتبی ئێراندان و ملیان باریکترە بۆ خۆشخزمەتی بە ئێران.
یەکیتی نیشتمانی چ توشی لیکترازن بێت” کە ئەگەری زۆرە” و چ بتوانێت بۆ ماوەیەک خۆی رابگرێت و بەزۆر دەستی پێوە بگیرێت، هەر ناتوانێت رەوتی لاواز بوون و داکشان، تێپەرێنێت. ئەوە کە شانسێک بدات بەوەی ئەم رەوتە خاوتر بچێتە پێشەوە، جەماوەرەکەیان کەمتر ببنە خۆراکی پارتی هاوپەیمانی یەکێتی و بزوتنەوەی گۆڕانی، هاوشێوەی یەکێتی خۆی، درەنگتر جەستەی شەکەتی بخاتەروو، دەسەتبردنیەتی بۆ نزیک بوونەوە و هاوپەیمانیەتی لەگەڵ بزوتنەوەی گۆران.
گومان هەڵنەگرە لە ئێستادا پارتی دەستی لە هەموو جومگە گرنگ، هەستیارەکانی سیاسی و ئابوری و دەسەڵاتەکان، لە ناوخۆی کوردستان، لەسەر ئاستی عیراق، لەسەر کایەی ناوچەیی…تاد، گیر کردووە. یەکێتیش لەهەموو ئەم ئاستانەدا، پاشەکشەی پێکراوە. بزوتنەوەی گۆران ئەو تەکانەی سەرەتا لەخۆی نیشاندا، بووە قوربانی دەرکەوتنی بەکردەوەی ماهیەتەکەی و خۆشباوەری خەڵک تا رادەیەکی زۆر پێی، رەویوەتەوە. قەپەکانی پارتی بۆ دەسەڵاتی زۆتر و پێگەی زیاتر… تا خواردنی یەکێتی لەدوای تاڵەبانیدا، ئامادەیە و لە ئێستاوە بەنەخشە کاری بۆ دەکات. ئەم دۆخە بۆ ئەوەی بتوانێت هەم بزوتنەوەی گۆران لە مەیدانەکەدا بهێڵتەوەو تەنانەت تەکانیك بە بزوتنەوەی گۆران بداتەوە، هەمیش بڕی زیانەکانی دوای تاڵەبانی لەسەر یەکێتی کەمتر بکاتەوە. گۆران و یەکێتی دەخاتە بەردەم پێویستیەکی ناچاریی بۆ بەرگرتن بە زێدەرویەکانی پارتی و بەرگرتن بە بەرتەسککرنەوەی زونی سەوزو نیلی. وە دانانی سنورێک بۆ قاچ لێڕاکیشانی زۆرتری پارتی. ئەمە نە بەیەکێتی ئێستاو نە بە یەکیتی دوای تاڵەبانی و نە بزوتنەوەی گۆرانیش بە تەنها ناکرێت. بزوتنەوەی کوردایەتی بۆئەوەی تەنها لەدەستی پارتی بێ نەیاری جدیددا نەمێنێتەوە، و هاوسەنگیەکە زۆر زیاتر تێکنەچێت، کە وڵاتانی ناوچەکەو پیداویستی بڕگە مێژوویەکەش وادەخوازێت. ریزبەستن و هاوپەیمانیەتی تازە، قەوارە بگرێت کە کۆسپ بخاتە بەردەم پرۆژە لەبن نەهاتوەکانی پارتی و لەهەنگاوەکانیدا توشی ئیستی بکات… ئەمەش یەکێک لە ڕیگاکانی هاوپەیمانیەتی نێوان گۆڕان و یەکێتییە، کە هەردوو لا پێویستیان پێیەتی.
دیارە ئەم نزیکبونەوەو هاوپەیمانیەتیە، دەتوانێ بزوتنەوەی گۆران و یەکێتی، بەقورسایەکەوە بهڵێتەوە و رێگە بگرێت لەوەی پارتی ببێتە شۆرە سواری تاقانەی گۆرەپانەکەو ئاڵاهەڵگری حاشاهەڵنەگرو بێ نەیار لە ناو بزوتنەوەی کوردایەتیدا. تا ئەوکاتەش بزوتنەوەی کوردایەتی تەنها پاوانی حزبێک نییە، دەشێ کەشی نیمچەکراوەی سیاسی کوردستان بەردەوامی هەبێت، ئەمەش رێگر دەبێت لەوەی دەسەڵات تاک قوتبی بێت. دەسەڵاتی تاک قوتبی و حزبی و پشتبەستوو بە زۆرو هێز دۆخی سەرکوت و بێمافی لەسایەیدا، دەشێ لەئاستێکدا بگات بەوپەری خۆی و دیکتاتۆریەتی بێپەردەو ئاشکرا، دابسەپێنێ.
دیارە ئەوە کە هێشتا کوردستان بەم دۆخە نەگەیشتووە، نەتوانراوە بزوتنەوەی نارەزایەتی جەماوەری و ئازادیخوازی، لە گۆرەپانی سیاسی کورستاندا وەدەربنرێت یان ناچار بە خۆ شاردنەوە بکرێت. لەدۆخی دەسەڵاتی تاک حزبیدا ئەگەری پاشەکشەکردن بەم بزوتنەوەیەش زۆرتر دەبێت.
بزوتنەوەی کرێکاری و کۆمۆنیستی و بەرەی رادیکاڵ و پێشکەوتنخوازی کۆمەڵگا، دەبێ ئامادەیی هەبێت بۆ ئەم دۆخەو ئەگەرو سیناریۆ جۆراوجۆرەکان کە بەهۆی داکوژانی دەوری تاڵەبانی، لە کوردستاندا، پێک دێت. ئەم بەرەیە نابێت وەکو چاودێری سیاسی تەماشاچی روداوەکان و ئەگەرەکان بێت. هەر ئاڵوگۆرێک لە ریزبەستنە سیاسیەکان، لەهاوسەنگی نێوان حزبەکان و هاوپەیمانیەتیەکان، گۆرانی باڵانس لە زونی زەرد و سەوزو نیلیدا…راستەوخۆ کاریگەری لەسەر خەڵکی کوردستان و بزوتنەوەی نارەزایەتی جەماوەری و کرێکاری دادەنێت. بۆیە پێویستە بەرەی رادیکاڵ و پێشکەوتنخوازی کۆمەڵگا، نەخشە و پرۆژەو ئامادەیی سەربەخۆ و بەکردەوەی هەبێت لەبەرامبەر بە دۆخی دوای تاڵەبانیدا.
ناوەراستی جەنیوەری ٢٠١٣
عەبدوڵا مەحمود
abdulla.mahmud@gmail.com
www.abdullamahmud.com
