Skip to Content

Friday, March 29th, 2024
من …. نیا کامیل

من …. نیا کامیل

Closed
by January 2, 2011 ئەدەب

 

من بزمارێكم
سێبه‌ری سه‌ری زلی چه‌كوش
كه‌ داهێنانه‌وه‌ی بۆ سه‌ر سه‌ری من
بۆته‌ ئاره‌زوو ، كرداری هه‌میشه‌یی
هه‌میشه‌ و له‌ هه‌موو شوێنێك له‌گه‌ڵمایه‌ .
ئازاری پیاكێشانی له‌ ناخی دڵمایه‌ .
من بزمارێكم ،
به‌زۆر ته‌خته‌ی ، نه‌رم و ڕه‌قدا داكوتراوم
زۆر نووشتاومه‌ته‌وه‌
به‌زه‌بری هه‌مان چه‌كوش
ئه‌و چه‌كوشه‌ی ، كه‌ دایكوتاوم
سه‌رله‌نوێ  .
دووباره‌ ، هه‌ڵكێشراومه‌ته‌وه‌ .
من بزمارێكم
دوو دانی درێژی چه‌كوش
بێ‌ ڕه‌حمانه‌ ، له‌ گه‌ردنم
بۆ هه‌ڵكێشانه‌وه‌م ، گیركراوه‌
له‌سه‌ر پشتی ڕه‌قی ئاسن
پشتی كوڕم ، ڕاستكراوه‌ته‌وه‌
تا سه‌ر له‌نوێ‌ .
به‌ناخی ته‌خته‌یه‌كی تردا
دامكوتێته‌وه‌ ، چه‌كوش .
من بزمارێكم
ویژدانی ساردی چه‌كوش
له‌سه‌ر ده‌ستی خۆم ، ته‌نانه‌ت
دایكوتاوم . بێئه‌وه‌ی هه‌ست
به‌ ئازاری ناخی من بكات .
من بزمارێكم
لێم ناگه‌ڕێ‌ ، ڕقی چه‌كوش  
هه‌تا ئه‌و ڕۆژه‌ی
به‌سه‌ر سه‌ری ئه‌ودا
دانه‌كوترێم .

 

Previous
Next
This site is registered on wpml.org as a development site.