Skip to Content

611 Views

خۆم و خۆت و خۆیان  …  نەوزاد بەندی

خۆم و خۆت و خۆیان … نەوزاد بەندی

Be First!
by December 17, 2016 General, Poems
image_print

خۆت وەک کەسێکی نوێ مەناسێنە ..
تۆیش هەر ئەوەی کە ئەچیتە لای وەکیلی ئاردەکە و
ئەپرسێ ئاخۆ نۆ کیلۆ ئاردەکە نەگەیشتووە …
بەیانیان دەهۆڵ و زوڕنای غاز فرۆش خەبەرت ئەکاتەوەو
لە ترسی قسەکەی پاریزگاری نوێ کە ووتی ئەزمەی غازیش بە ڕێوەیە ،
بە هەڵەداوان بە جووتێ نەعلی تاکە و تاکەوە ، راتکردۆتە دەرەوە و
غاز فرۆشەکە ئیشارەتی بۆ کردووی : هەمووی بۆشن ..
تۆیش هەزار جار قوڕی بەر بەلەدیەکەت لێ پرژاوە ..
سەد جار چەکەتەکەت لە قەپرغەوە
بە عەرەبانە دڕاوە …
تۆیش ژمارەی جۆزەی موەلیدەکەت ،
لە ناوی خۆت باشتر رەوان کردووە ..
سەد جار جلەکانت بە دوو ڕۆژ لە غەسالەکەدا ماوەتەوە ..
خۆت وەک کەسێکی ئەوروپیی نیشان مەدە ..
تۆیش ناوی چەندەها قاچاخچی ئەستەمبوڵ و یۆنانت لەبەرە ..
چەندەها ئێوارە لە فولکەیەک وەستاوی ،
نەتزانیوە بە چ ئاراستەیەک بڕۆی ..
چەندین جار مۆبایلەکەت دەرزی ئاژن کردووە ،
نەتزانیوە زەنگ بۆ کێ لی بدەی ..
تۆیش هەرچی هەنگاوی ژیانتە ،
بە خواستی خۆت نەتناوە و بە شەق پێیان ناوی ..
تۆیش لەگەڵ عاما چووی بۆ شام ..
جاران ٢٠ سانتیم سمێڵت هێشتبۆوە و ئێستا هیچ ..
جاران کتێب لەبەر باخەڵتا بوو ، ئێستا پیتزا ..
جاران بە هاوین ئەچووی بۆ بەغداد ، ئێستا ئەڵێی : پیاو دوو فلس دانێ بۆ ڕۆژی ڕەشتر ، سەفەر چیە لە هیلاکیی زیاتر ؟!!
تۆیش بە بێ ڕا لێ بوون چووی بۆ دەنگدان و
بە بێ هیوا خەتت لە حیزبێک داوە کە دەیەها شەقی لە دەیەها خەون و هیوات داوە ..
تۆیش سەد جەر تفت کردۆتە سەر زەوی ..
بوتڵی بەتاڵت فڕێ داوەتە سەر جادە ..
قڕقێنەت داوە و ..دوکەڵی جگەرەت کردووە بە ڕووی مناڵەکانتا ..
دەیەها نەعلت تێ گرتوون
دەیەها تفت تێ کردوون ..
شانازیت کردووە کە شلەی بێ گۆشتت نەخواردووە ..
خۆت وەک کوردێک نیشان بدە ،
کە لە هیچ ڕستەیەکدا جێی نابێتەوە ..
کە ٣٠ ساڵ جارێک هیواکانی ،
وەک بەفری نیسان ئەتوێتەوە ..
هەر هێندە و بەس …

Previous
Next

Leave a Reply