Skip to Content

Thursday, March 28th, 2024
هه‌ڵچوون …. سه‌عید ئه‌مانی

هه‌ڵچوون …. سه‌عید ئه‌مانی

Closed
by February 1, 2011 ئەدەب

     
        هاته‌ جۆش بوڕكانی
          قینی گه‌ل هه‌ڵده‌چێ
          شۆلاوگه‌ی بۆگیانی
          خوێن مژان
           زۆر به‌خوڕ كه‌وته‌ رێ.

                          گوێ هه‌ڵخه‌ن!
               قه‌ف قه‌فی زنجیری زۆرداره‌
                 كرته‌ كرت
                   له‌یه‌كتر به‌رئه‌بێ و ئه‌قرتێ.

                   شكۆفه‌ی هیوایه‌، یه‌ك بوونه‌
                   یه‌ك به‌ یه‌ك ئه‌پشكوێ.
          
                  ته‌وژمێ له‌ڕێدا
                  په‌یامی وه‌هایه‌:
                  هه‌ناسه‌ی په‌نگ خواردووی
                 نێو ناخی ده‌ریایه‌
              گشت ئه‌بێ به‌ هه‌ور و
               گه‌واڵه‌ و گه‌واڵی یه‌ك ئه‌گرێ و
               له‌پاڵ یه‌ك ئه‌ترنجێ.

                   چه‌خماخه‌ی توڕه‌یی
                             وه‌ك شمشێر
               شه‌وگاری ئاسمانی
                ئه‌م نه‌زمه‌ ئه‌سمێت و
               به‌ر چاوان ڕوون ئه‌كات

                نم نمه‌ی بارانی
               زه‌وی و زار ئه‌دوێنێ
                 چرۆی دار ئه‌پشكوێ و
                    سه‌وزایی ئه‌ڕوێنێ.
                              یان ئه‌بێ به‌ جۆگه‌ و لافاوی
                                زبڵ و زاڵ ئه‌ماڵێ و ئه‌ڕفێنێ.

               ئه‌گه‌ر بێ و دیوه‌زمه‌ی
                خه‌ڵتان
                  سوارشانی شه‌پۆلیان نه‌بووبێ
                   داخوازی
                            ژیانێكی ئینسانی بۆ هه‌موان
                                                                 به‌رز بێ و
                   كه‌ژاوه‌ی ئاواتی یه‌كسانی
                            بۆ لارێ نه‌چووبێ
                               یه‌قینه‌ن:
                                به‌سته‌ڵه‌ك ئه‌فه‌وتێ
                                    به‌هاری بژوێنی
                                      بۆ ژیان ئه‌ڕازی و
                                           ئه‌رزانی ئه‌هێنێ.

                                                                سه‌عید ئه‌مانی
                                                                        2011/1/29

Previous
Next
This site is registered on wpml.org as a development site.