Skip to Content

Thursday, March 28th, 2024
ئه‌وه‌ی كوردستان له‌وڵاتانی تر جیا ئه‌كاته‌وه‌ مه‌ترسیه‌كی یه‌كجار گه‌وره‌یه‌

ئه‌وه‌ی كوردستان له‌وڵاتانی تر جیا ئه‌كاته‌وه‌ مه‌ترسیه‌كی یه‌كجار گه‌وره‌یه‌

Closed
by March 14, 2011 گشتی


جیاوازیه‌ باسنه‌كراوه‌كه‌ی نێوان كوردستان و مسرو تونس

له‌وه‌ته‌ی شه‌پۆلی خۆپیشاندانه‌ پرۆ = دیموكراسیه‌كانی رۆژهه‌ڵاتی ناوه‌رٍاست ده‌ستی پێكردووه‌ , به‌ دوو شێوازی جیاو و بۆ دوو مه‌به‌ستی دژبه‌یه‌ك باسی جیاوازیه‌كانی كوردستان و ئه‌و وڵاتانه‌ ده‌كرێت , ئه‌و تایبه‌تمه‌ندیانه‌ وه‌ بیر ده‌هێنرێـته‌وه‌  كه‌ كوردستانی  پێ جیا ئه‌كرێـته‌وه‌ له‌ تونس و مسر و ئه‌و وڵاتانه‌ی تری ناوچه‌كه‌ كه‌ چاوه‌ڕێی به‌ده‌رنانی سه‌رۆكه‌ دیكتاتۆره‌كانیان لێ ده‌كرێـت ) لیبیا , یه‌مه‌ن , به‌حره‌ین, جه‌زائیر …( . دیاره‌  بۆ دوو ئارگیۆمێنتی جیاواز و دژ به‌یه‌ك هه‌موو جارێك ئه‌م جیاوازیانه‌ باس ده‌كرێت := لایه‌نێكیان ئه‌و كه‌سانه‌ن كه‌ دژ به‌ خۆپیشاندانه‌كان و بۆ به‌رگری كردن له‌ ده‌سه‌ڵاتدارانی كوردستان له‌ هه‌وڵی نیشاندانی ئه‌وه‌ن كه‌ كوردستان بارودۆخێكی ناسكی هه‌یه‌ , وڵاتێكی به‌دوژمن ئابڵوقه‌دراوه‌ , هێشتا ده‌وڵه‌تێكی سه‌ربه‌خۆی خاوه‌ن قه‌واره‌ی نیه‌ كه‌ به‌رگه‌ی ئاژاوه‌یه‌كی له‌م جۆره‌ بگرێت , هاوكات سه‌ركردایه‌تی  و پارله‌مانێكی شه‌رعیشی هه‌یه‌ كه‌ له‌ لایه‌ن زۆرینه‌ی خه‌ڵكه‌وه‌ ده‌نگی بۆدراوه‌ ! هه‌ر بۆیه‌ ئه‌م جیاوازیانه‌ به‌سه‌ بۆ ئه‌وه‌ی رێگه‌نه‌درێت سیناریۆكه‌ی قاهیره‌و تونس له‌ كوردستاندا دووباره‌ بكرێتـه‌وه‌ , چونكه‌ پێویسته‌ ئه‌و دۆخه‌ی ئێستا بپارێزرێت و به‌رگری لێبكرێت . به‌دیوه‌كه‌ی تریشدا لایه‌نگرانی خۆپیشاندانه‌كه‌ بۆ به‌هێزكردنی ئارگیۆمێنتی خۆیان باسی ئه‌وه‌ده‌كه‌ن له‌و وڵاتانه‌ی سه‌رۆكه‌كانیان به‌ده‌رناوه‌ , داموده‌زگای ده‌وڵه‌تی و سوپایی نیشتمانی هه‌یه‌ , خزمه‌تگوزاری كاره‌باو ئاویان هه‌یه‌ , وڵاتی یه‌كگرتو و حكومه‌تی یه‌كێتی نیشتمانیان هه‌یه‌ , ژێرخانێكی ئابوری نیشتمانی به‌هێزیان هه‌یه‌ كه‌ هه‌موو ئه‌مانه‌ له‌ كوردستاندا نیه‌ , هه‌ربۆیه‌ خه‌ڵكی كوردستان مافی خۆیه‌تی زۆر له‌وه‌ زیاتر بكات كه‌ گه‌لانی ئه‌و وڵاتانه‌ كرودوویانه‌ ..
له‌ راستیدا هه‌ردوو ئارگیۆمێنته‌كه‌ شتێك له‌ راستی ودروستی تیادایه‌ به‌ ده‌رله‌وه‌ی بۆ چ مه‌به‌ستێك و له‌ چ سیاقێكدا ده‌خرێـته‌ڕو , به‌ڵام خاڵی زۆر سه‌رنج راكێش و جیاوازی زۆرمه‌ترسی دار و باسنه‌كرا و له‌چه‌ند شوێنێكدایه‌ كه‌ تا ئێستاكه‌ نه‌مان بیستووه‌ هیچ لایه‌نێكیان به‌وردی باسی لێوه‌ بكه‌ن . سه‌رچاوه‌ی ئه‌م مه‌ترسیه‌ش له‌وه‌دایه‌ كه‌ كوردستان تا ئێستاكه‌یش هه‌ر زه‌مینه‌یه‌كی له‌باری دروستبونی شه‌ڕی ئه‌هلی و براكوژیه‌ ئه‌گه‌ر بێـتوو ئه‌وانه‌ی سه‌ركردایه‌تی خۆپیشاندانه‌كانی ده‌كه‌ن ده‌ستپێشخه‌ر نه‌بن له‌ داهێنانی شێوازێكی هێنده‌ مه‌ده‌نیانه‌ و هێمنانه‌ی كاری جه‌ماوه‌ری كه‌ بتوانێت وه‌ڵامده‌ره‌وه‌ی هه‌موو ئه‌و توندوتیژیانه‌ بێت كه‌ حیزبه‌ چه‌كداره‌كان له‌ده‌ستیان دێت به‌رامبه‌ر خه‌ڵكی شه‌قام بیكه‌ن . رابردووی په‌نجاساڵه‌ی شه‌ڕی حیزبی و میلیشیایی مینه‌یه‌كی سیاسی و سایكۆلۆجی وه‌های دروستكردووه‌ كه‌ له‌ هه‌موو ململانێیه‌كی سیاسیدا ئه‌گه‌ری شه‌ڕی ناوخۆ له‌ هه‌موو ئه‌گه‌ره‌كانی تر به‌هێزتر بێت . ئه‌م دۆخه‌ گرفتئامێزه‌ی سیاسه‌ت و حیزبایه‌تیكردنی كوردستان ئه‌وه‌نده‌ی په‌لامار و هه‌ڵكوتانه‌سه‌ریه‌كتری هێزه‌كان و شه‌ڕی خوێناوی پێ دروست ئه‌كرێت , هێنده‌ توانای ئیداره‌دانی ململانێكانی نیه‌ به‌ شێوه‌یه‌كی دیموكراسیانه‌و مه‌ده‌نیانه‌ . ئه‌م سیاسیانه‌ هێنده‌ی توانای خه‌ڵك كوشتن و ته‌خوینكردن و په‌لاماری خوێناویان هه‌یه‌ , به‌هیچ شێوه‌یه‌ك توانای دروستكردنی زه‌مینه‌یه‌كی هاوبه‌شیان نیه‌ تا له‌گه‌ڵ ركابه‌ره‌كانیان پێكه‌وه‌ بچنه‌ گه‌مه‌یه‌كی دیموكراسیانه‌وه‌ . دیاره‌ پرسیاری ئه‌وه‌ی كێ ئه‌م دۆخه‌ی دروستكردووه‌ و كێ لێی به‌رپرسیاره‌ ؟ ئه‌وه‌ چ كۆمه‌ڵگایه‌كی سیاسیه‌ كه‌ هه‌موو گۆڕانكاریه‌كی جدی فڕێی بداته‌ لێواری شه‌ڕی ئه‌هلیه‌وه‌ ؟ ئه‌وا پرس گه‌لێكی تره‌و ئێره‌ شوێنی وه‌ڵامدانه‌وه‌یان نیه‌ , لێره‌دا ته‌نها به‌نیشاندانی بنه‌ما ده‌زگایی و سه‌ربازی و ئابوریه‌كانی ئه‌م مه‌ترسیه‌وه‌ ده‌وه‌ستین .
كوردستان خاڵیه‌ له‌ ده‌زگایه‌ك كه‌ شوێنی كۆده‌نگی هه‌موو لایه‌كبێـت 
 له‌ كوردستاندا هیچ هێزێكی سه‌ربازی نیشتمانی , هیچ ده‌زگایه‌كی بانحیزبی تێوه‌نه‌گلاو له‌ململانێ سیاسیه‌ ناوخۆییه‌كان نیه‌ بۆشایی حكومه‌ت پربكاته‌وه‌ له‌هه‌ر قه‌یرانێكی سیاسیدا , ئه‌و هێزانه‌ی به‌ناوی پاسه‌وانی هه‌رێم و پۆلیسی دارستان و هێزه‌كانی ناوخۆ و …هتد رێكخراون , روداوه‌كانی دوای 17 ی شوبات  نیشانیداین كه‌ تا چه‌نده‌ هێزی حیزبین و چه‌ند ئه‌توانن ده‌ستكراوه‌بن له‌ كوشتنی خه‌ڵكی ئه‌م وڵاته‌دا . ئه‌مانه‌ هه‌میشه‌ فاكته‌ری خوێناویكردنی ململانێ سیاسیه‌كان ئه‌بن , نه‌ك پاراستنی ئاسایش و سه‌رو ماڵی خه‌ڵكی كوردستان . له‌ سایه‌ی هێزی له‌م جۆره‌یشدا ئاسته‌مه‌ كوردستان بتوانێت ململانێی و سیاسی دیموكراسیانه‌و ئاڵوگۆڕی ده‌سه‌ڵاتی مه‌ده‌نیانه‌ی تیا بكرێت به‌ بێ تارماییه‌كانی شه‌ڕی ناوخۆ . له‌ راستیدا نه‌بونی داموده‌زگای حكومه‌تی و نیشتمانی باڵاتر له‌ سه‌ركرده‌ حیزبیه‌كان گرێیه‌كی گه‌وره‌ی ناكامی ئه‌زمونی هه‌رێمی كوردستانه‌ . به‌ڵام ئه‌م كه‌موكوڕیه‌  له‌ ئارگیۆمێنتی هیچ لایه‌كدا وه‌ بیرناهێنرێـته‌وه‌ , ئه‌گه‌رچی رۆژانه‌یش له‌گه‌ڵ ده‌رئه‌نجام و جێكه‌وته‌ بیزاركه‌ره‌كانیدا مامه‌ڵه‌ ده‌كه‌ین . بۆ نمونه‌ , كه‌س نیه‌ لاری له‌وه‌ هه‌بێت كاریگه‌ری دووئیداره‌ حیزبیه‌كه‌ی رۆژانی شه‌ڕی ناوخۆ تا ئێستایش به‌رده‌وامه‌ , حكومه‌تی هه‌رێم له‌ سلێمانی و هه‌ولێر خاوه‌نی یه‌ك سیاسه‌تی ئابوری و ئیداری و خزمه‌تگوزاری نیه‌ , یان ئه‌و ده‌سه‌ڵات و هه‌یكه‌له‌ ئیداریه‌ی پێی ده‌وترێـت حكومه‌تی هه‌رێمی كوردستان له‌ به‌رده‌م پێشێلكاری و ده‌ستێوه‌ردانی كادره‌ باڵاكانی پارتی و یه‌كێتیدا هیچ هه‌یبه‌ت و توانایه‌كی خۆپارێزی هه‌بێت .. ئه‌گه‌ر به‌ڕاستی پارتی و یه‌كێتی پابه‌ندن به‌ چوارچێوه‌ شه‌رعی و دامه‌زراوه‌ییه‌كانی حكومه‌ته‌وه‌ چ پێویست بوو زێره‌ڤانی له‌هه‌ولێره‌وه‌ بێت بۆ پاراستنی مقه‌ڕه‌كانی پارتی له‌ سلێمانی ؟ یاخوود ئه‌و كۆسپ و گیروگرفتانه‌ی له‌سلێمانی و له‌ناو یه‌كێتیه‌وه‌ بۆ كابینه‌كه‌ی به‌رهه‌م صاڵح دروست ده‌كرا چ ته‌فسسیرێك هه‌ڵده‌گرێت ؟ هه‌موو ئه‌م راستیانه‌ ئه‌وه‌مان نیشان ئه‌دات كه‌ ئێمه‌ نه‌دامو ده‌زگای ده‌وڵه‌تی و حكومكردنی مۆدێرنمان هه‌یه‌ , نه‌ئه‌و ده‌وڵه‌تمه‌دارانه‌یش statesman  كه‌ لێپرسراوانه‌ توانای ئیداره‌دانی قه‌یرانه‌كانیان هه‌بێت . هه‌ر بۆیه‌ له‌دوای راپه‌ڕینه‌وه‌ و له‌وه‌ته‌ی یاده‌وه‌ریمان پاراستبێتی , هیچ جارێك نه‌بووه‌ قه‌یرانێكی بچوكی نێوان دوو حیزبی) خاوه‌ن چه‌ك و میلیشیا ( دواتر په‌ره‌ی نه‌سه‌ندبێت بۆ)  ئینزار , ته‌قه‌له‌یه‌ككردن , شه‌ڕی به‌ربڵاوتر , په‌لامار و شه‌ره‌جنێوی میدیای , په‌لڕاكێشانی وڵاتانی دراوسێ و دواتریش دروستكردنی لیژنه‌ی دووقۆڵی و سێقۆڵی بۆ ئاسایی كردنه‌وه‌ی بارودۆخه‌ ( , له‌ بیست ساڵی رابردوودا ئه‌م نوخبه‌ ده‌سه‌ڵاتداره‌ی هه‌رێم ته‌نها ئه‌م سیناریۆ سیزیفیه‌یان دووباره‌كردۆته‌وه‌ . هه‌ر ئه‌م راستیه‌ مێژوییه‌ تاڵانه‌یشه‌ وایكردووه‌ پێمان وابێت شه‌ڕی ناوخۆ مۆته‌كه‌یه‌كی تا ئێستایش ئاماده‌یه‌  له‌ ناو ململانێكاندا ئه‌گه‌ر حه‌كیمانه‌ له‌ شه‌قامه‌وه‌ وه‌ڵامنه‌درێته‌وه‌ . ئه‌مه‌ ئه‌و جیاوازیه‌ ترسناك و تاڵه‌یه‌ كه‌ هیچ لایه‌ك ناتوانێت به‌ئاشكرا دانی پیابنێت . وتنی راستی له‌م جۆره‌ زیره‌كی و بوێری هاوشیۆه‌ی ئه‌وه‌ی معه‌مه‌ر قه‌زافی و سه‌یفی كوڕی ده‌وێت . كه‌ بێشه‌رمانه‌ ده‌یان گوت یان سه‌رۆكایه‌تی ئێمه‌ , یان شه‌ڕی كۆڵان و شه‌قامه‌كان . بێگومان ئه‌مه‌ خواستی هه‌موو دیكتاتۆرێكه‌ , ئه‌وان ئاساییه‌ به‌لایانه‌وه‌ سێیه‌كی هاوڵاتیه‌كانی خۆیان بكوژن به‌س بۆ ئه‌وه‌ی له‌سه‌ر كورسیه‌كه‌ بمێننه‌وه‌ , به‌ڵام تونس و مسر و پێشتریش جۆرجیا ئه‌وه‌ی نیشانداین كه‌ ئه‌شێت به‌ حیكمه‌تی سه‌ركرده‌كانی شه‌قام , به‌وه‌ڵامدانه‌وه‌ی توندوتیژی ده‌زگاداپڵۆسێنه‌ره‌كان به‌ گوڵ وگفتوگۆی هێمنانه‌ و شێوازی مامه‌ڵكردنی مه‌ده‌نیانه‌ خۆپیشاندانه‌كان بگاته‌ ئامانجی خۆی , بێ ئه‌وه‌ی بیانوی كوشتن و خوێنڕژاندن بدرێته‌ ده‌ستی پارێزه‌رانی سه‌رۆكه‌وه‌ .

 

محه‌مه‌د حسێن
Muhe79@yahoo.com 

Previous
Next
This site is registered on wpml.org as a development site.