Skip to Content

Thursday, March 28th, 2024
ئاو به‌ رووتی …. هه‌ندرێن حه‌مه‌ده‌مین

ئاو به‌ رووتی …. هه‌ندرێن حه‌مه‌ده‌مین

Closed
by March 29, 2008 ئەدەب

هه‌رچی ره‌نگه‌
له‌ ناومدا كاڵ بۆته‌وه‌
وه‌ك ره‌نگی ئاو له‌ناو شوشه‌
هه‌ر شه‌وه‌ و
ره‌نگه‌خه‌وێك ئه‌كه‌م
بۆ دۆزینه‌وه‌ی ره‌نگی خه‌ونه‌كانم
كه‌ هه‌ڵئه‌ستم
نه‌ ره‌نگ هه‌یه‌ و نه‌ خه‌ون

هه‌رچی تامه‌
له‌ ناومدا رۆیشتووه‌
وه‌ك تامی ئاوی به‌ستوو
هه‌ر شه‌وه‌ و
تامه‌خه‌وێك ئه‌كه‌م
بۆ دۆزینه‌وه‌ی تامی خه‌ونه‌كانم
كه‌ هه‌ڵئه‌ستم
نه‌ تام هه‌یه‌ و نه‌ خه‌ون

هه‌رچی ده‌نگه‌
له‌ ناومدا كپ كپ بووه‌
وه‌ك ده‌نگی ئاوی مه‌نگ
هه‌ر شه‌وه‌ و
ده‌نگه‌خه‌وێك ئه‌كه‌م
بۆ دۆزینه‌وه‌ی ده‌نگی خه‌ونه‌كانم
كه‌ هه‌ڵئه‌ستم
نه‌ ده‌نگ هه‌یه‌ و نه‌ خه‌ون
 
هه‌رچی بۆنه‌
له‌ ناومدا بوونی نیه‌
وه‌ك بۆنی ئاوی ئازاد
هه‌ر شه‌وه‌ و
بۆنه‌خه‌وێك ئه‌كه‌م
بۆ دۆزینه‌وه‌ی بۆنی خه‌ونه‌كانم
كه‌ هه‌ڵئه‌ستم
نه‌ بۆن هه‌یه‌ و نه‌ خه‌ون

باوڕ
به‌ ده‌ریا و
رووبار و
كانی
مه‌كه‌ن
 

من ئاوێكم
خاكێك نیه‌ ره‌نگم داتێ
بۆن و تام و
ده‌نگم داتێ
 
به‌دوای تۆدا ئه‌گه‌ڕێم و
ناتناسم

نامناسیت و
هه‌موو شه‌وێك له‌گه‌ڵ خۆتدا ئه‌مخه‌وێنی
 
زۆر حه‌زده‌كه‌ی
له‌ خه‌و هه‌ڵسی و
ماچه‌كانم له‌سه‌ر لێوه‌كانت دیار بن
جێی په‌نجه‌كانم
له‌ناو قژت به‌جێ مابن
مووه‌كانم
له‌ نێو مه‌مكه‌كانت حه‌شار ئه‌ده‌یت
ته‌ڕ ته‌ڕ
له‌ناو جێگا دێیته‌ ده‌رێ

Handren88@hotmail.com

٢٢ی ٣ی ٢٠٠٨

Previous
Next
This site is registered on wpml.org as a development site.