Skip to Content

368 Views

لە زەماوەندی مەرگی پەپولە … سەرهەنگ خامۆش

لە زەماوەندی مەرگی پەپولە … سەرهەنگ خامۆش

Be First!
by March 13, 2017 General, Poems
image_print

من ڕێبوارێکی سەرهەڵگرتوی
بەردەم وێستگەکانی فیراقم
لە هەموو تارمینالەکانی سەفەر
مۆری ڕەفز
بە پاسپۆرتەکەی عیشقمەوە نوساوە

ترسم لە بوونی خۆم هەیە
منێک
تەنیا لەکەنارەکانی تەنیایی
خەیاڵ بەرەو ئەم دەڤەرەم دەبا
کە خاڵیە
لە سیما جوانەکانی تۆ و نیشتیمان

من دەمێکە
بەدەم زەردەخەنەی(با)وە
لە شەقامەکانی تەنیایی گوزەر دەکەم
ماندووم
تەنانەت تاقەتی ئەوەشم نەماوە
داوای لێبوردن
لە گەڵا وەریوەکانی ژێر پێم بکەم

تروسکاییەک شک نابەم
لە درزی پەنجەرەکانی یەقینەوە
بڕژێتە نێو
پێلوی چاوەکانی قەدەر

لە کونجێکی ژوورێکی تاریک
خەریکم بەدیار بیرەوەرییەکان
پێکی تەنیایی هەڵدەدەم
ئاخر من
هەر لە خامۆشی ڕاهاتووم
ئەی یار

ماندووم…
بیرم لای سیمای پڕ ویقاری دایکمە
ئەو کاتەی
بە شیرینترین دوعا بەڕێی کردم
بیرم لای شەقامە تەنیوەکانی شارەکەمە
کە هەموو بەیانیەک
پڕ دەبێت لە پەلکی گوڵ و
پاساری بێ ڕۆح…
بیرم لای ئەو پەنجەرەیە
کە دوای هەموو ئێوارەیەکی نارنجی
پڕ دەبوو
لە هەڵمی هەناسەی من و تۆ…

بیرم لای ئەو مناڵانەی گەڕەکە
کە لە چاوشارکێ
لە کوچەو کۆڵانەکاندا
خۆیان لە یەکتر وون دەکرد
لای ئەم ژنە داماوانەی بەر دەرگا
کە هەمیشە لە تارمایی گەڕانەوەی
هاوسەرە وون بووەکانیان ڕادەمان…

ئەم سەفەرە
لەنێو خۆمدا بەدوای خۆمدا دەگەڕێم
تا دەگەمە نزیکترین خاڵی کۆتایی
کۆتاییەک لەبەردەم بوون
بوونێک
کە هەمیشە پڕە لە نەبوون…

تەمەن
خۆی خستە نێو مالۆچکەیەک
پڕ لە بیرەوەری
تارمایی چاوانیشم
پڕ بوون لە لۆچی چاوەڕوانی
کەچی تۆ هەر لێم زویری
نیشتیمانیش
هەر وەکو خۆی توڕەیە لێم

چیت بۆ بگێڕمەوە ئەی یار
لە زەماوەندی مەرگی پەپوولە
تارای بوکێنی شیعرەکانیان فڕاندم
دڵی زاوای نوستووی نیشتمانیان
لێ وەئاگا هێنام…
شەویان ڕەشتر کرد لەخۆی
نەیانهێشت مانگ دەسرۆکەی سپی
لە پرچی خۆی بئاڵێنی
شاریان پڕ کرد لە گەندەڵی
پڕ لە هاواری مەرگی دوعا…

ناچار دڵ غەریب وەک شیعرەکانم
لەگەڵ سێبەری خۆم و تەنیایی
هەنگاو دەنێم
تا دەگەمە ئەوپەڕی بوون
لە یەکێ لە گۆڕستانەکانی(مەسیح)دا
دوور لەبۆنی تۆ و دایکم و نیشتیمان
دەمنێژن…

چەند ماندووم ئەی یار
تۆش پێم دەڵێی:
چی دەکەی
لەم وشکەڵانەی نامۆ بوون خامۆش
بگەڕێوە…
تا کازیوە پرچی سەحەری شانە نەکردووە
بڕۆ دوو ڕکاعات نوێژ
بۆ خودای عەشق بکە
ئەلقەی مەرگ
لەپەنجە زەردو سیسەکانی (خۆر ) کەوە
هەی بێ دڵ..بێ دین..بێ نیشتیمان…!!

Previous
Next

Leave a Reply