Skip to Content

Thursday, March 28th, 2024
تولە ڕێیەکى دڕکاویى …  نەوزاد بەندى

تولە ڕێیەکى دڕکاویى … نەوزاد بەندى

Closed

 

 

 

 

 

 

-1-

حەز ئەکەم ،

هەر شەوەى لە ماڵێک بەسەر بەرم ..

ڕٍوخسارى نوێ ببینم ..

پەرداخى نوێ

چاپەستى نوێ ..

کەوچکى جیاواز ببینم ..

بەتانى سەیر ..

بۆنى جۆرا و جۆر هەڵمژم ..

گریانى جیا ..

قاقاى پێکەنینى جیاواز ..

شەڕەدەنوکى هەمەڕەنگ ..

حیزبی جیا جیا ..

بیر و بۆچونى جۆرا و جۆر ..

( بۆ سبەى شەو ،

ئەچمە ماڵێکى ترەوە ،

کە نازانم ماڵى کێیە و

عومرى چەندە و

ئیشى چیە و

چ حیزبێکە و

چەند کوڕ و

چەند کچى هەیە ..)

 

-2-

باران وەک ڕاویان نابێ ،

خۆى کرد بە هەیوانەکەدا ..

پێڵاوەکانى پڕ کردین لە ئاوى سارد ..

باران وەک دانى بئێشێ ،

هەمو شەقامەکان گەڕا ..و

دانسازێکى نەدۆزیەوە  

باران وەک مناڵێکى ون ،

بەسەر هەموومانا گریا ،

نەیشمانتوانى دایکى بۆ بدۆزینەوە ..

( هەمو ساڵێ باران بە عاجزیى ئەڕوا ..

هەمو ساڵێ کە باران دێ ،

نان خوراوە

قۆرییەکە چۆڕ بڕ کراوە ..

بە برسێتى ئەڕواتە دەر .. )

هەموو ساڵێ کە باران لە دەرگا ئەدا ،

پەنجەکانى ،

دێنە خوارێ و

ئەڕژێنە سەر چیمەنتۆکە ،

کەس دەرگاى لێ ناکاتەوە ..)

 

-3-

چیمەنى بەردەرگاکەمان ،

چوو بۆ ساڵۆن ،

ماکیاجێکى تۆخ – تۆخى کرد ،

وتى : ئەمشەو 

باران سەردانێکم ئەکا ..

 

-4-

گوڵ ئەستێرە سەفەریان کرد

نازانم لە چ ڕێیەکەوە ،

بە واستەى چ لێپرسراوێ..

 

-5-

چۆلەکەیەک ،

لە هەورەبانەکە گیرى خوارد ..

بە نیاز پاکیى ،

نەختێ گەنم و ئاوم بۆ برد ..

بەتەواوەتیى شێت و هار بوو ،

خۆى دا بە پەنجەرەکەدا ..

لەسەر چیمەنتۆ زبرەکە ،

دوەا ئۆکسجینى هەڵکێشا ..

 

-6-

ئەوانەى بە وشکە ساڵیى دەوڵەمەند بون ،

باران وەک ڕشانەوەى ئاسمان ،

تەماشا ئەکەن ..

 

Previous
Next
This site is registered on wpml.org as a development site.