ئاوابوون … ستار ئه‌حمه‌د

له‌خوێنی گێلاسێكا

به‌سووریی هه‌نار ده‌گه‌ی

له‌باده‌یه‌كی خوێنا

ئاوابوون هه‌ڵده‌گری

به‌شوێن بسكی ئه‌ستێره‌دا

رووناكی له‌مانگ وه‌رئه‌گری

به‌تیشك خۆت داده‌پۆشی

له‌شنه‌ی بادا

فێری سه‌ربڕینی دار

لاوانه‌وه‌ی قومری و

خوێندنه‌وه‌ی سێبه‌ره‌كان ده‌بی

به‌دووی شه‌هیدبوونی عه‌شق 

كۆكردنه‌وه‌ی چاوه‌ڕوانی

توانه‌وه‌ له‌په‌شیمانیدا

وه‌ك ده‌نكه‌ پشكۆو

شه‌فه‌قی ئه‌و دیو خاڵیبوون

به‌هه‌ناوی ئاگرا ده‌چزێی

له‌وه‌ته‌ی ده‌تناسم

له‌ترۆپكی داڕمان و

بازنه‌ی هیچدا

به‌دوای شه‌وه‌زه‌نگدا هه‌ڵدێی

تاوێ له‌ئه‌لبوومی پێكگه‌یشتن

چركه‌یه‌ك له‌بانێژه‌ی زامێكا

وشه‌یه‌كت له‌شیعرێكما نه‌دوان

له‌ودیو په‌یوه‌ستی ترسه‌وه‌

په‌نجه‌یه‌كت له‌خوێنی حه‌رفێك 

نیگایه‌كت له‌تیله‌ما نه‌توانه‌وه‌

ده‌بینیت له‌ده‌ركه‌وتنی به‌ژن و 

راچه‌نینی دیمانه‌ت

چۆن له‌ته‌یمانه‌ی عومرم دوورده‌كه‌ومه‌وه‌

له‌پرسه‌ی رۆچوون و 

نه‌مانی ژوانا

شه‌ماڵ ده‌ژمێرم

به‌خوێنی گێلاسێك 

سووریی هه‌نار

بۆ ئاوابوونى

سه‌مای مردنمان ده‌گێڕم