Skip to Content

Thursday, March 28th, 2024
تەرمی کاوە گەرمیانی دادگایی دەکرێتەوە

تەرمی کاوە گەرمیانی دادگایی دەکرێتەوە

Closed
by January 31, 2014 گشتی

 

 

 

 

 

ئێوارەی پێنج شەمە ٥-١٢-٢٠١٣ رۆژنامەوان کاوە گەرمیانی لەناوچەی دەسەڵاتی یەكێتی نیشتمانی لە شاری کەلار کەوتە بەر دەسرێژیی گوللەی دەستێکی ئاشکرا و تێرۆرکرا. مەبەست لەم دەقە تەنیا نیشاندانی ئەوپەڕی دڵرەقی، بێرەحمی و جەنایەتکار بوونی بکوژانی کاوە گەرمیانی‌یە کە  دەسەڵاتی یەکێتی راستەوخۆ پشتیوانی لێدەکات.  ناچار بوم بۆ دەربڕینی هەستی خۆم و دەروونی رەش و بێ‌بەزییانەی بکوژانی “کاوە”، لە “فانتزیا” کەڵک وەرگرم.

پەردە  هەڵدەدرێت

ژوورێک وەک دەفتەر(مەکتەب)ی حێزبێکی سیاسیی. لە ژوورەکەدا چوار پێنج وێنەی گەورەی جەلال تاڵەبانی و برایم ئەحمەد بە دیوارەکانیدا هەڵواسراون. دەورتا دەوری دیوارەکان تەژی لە دروشمی “کوردایەتی” و وێنەی سەرکردەکانی یەکێتی‌یە. وێنەیەکی گەورەی مەحموود سەنگاوی لە کاتی کۆتایی هاتنی دادگایی کردنی لەسەر کەیسی تێرۆری “کاوە گەرمیانی” بە یەکێک لە دیوارەکانەوەیە کە دوو دەستی وەک رەمزی سەرکەوتن بەرزکردوەتەوە.

-کاک مەحموود یاخودا بەخێر بیەوە بەڕاستی زۆر پەرۆشت بووین.

مەحموود بەو قسەیە هەڵدەچی و دەنگ هەڵدێنێ و دەگوڕێنی:

–   پەرۆشی چی؟ خەریکم لەداخا شەق ئەبەم. تەمەنێک لەوشاخانە دەربەدەری و کوێرەوەریم کیشا بۆ ئەم خەڵکە بێ‌سیفەتە. کەچی ئێستا چوار دەم رووتی خوێڕی تەعەدامان لێ ئەکەن.

–   کاکە مەحموود گیان مەبەستم توورەکردنت نەبوو. هەرچی بوو، تەواو بوو هەر گوێشی مەیەرێ.

–   ئاخر پێی پەست دەبم. کابرایەکی هیچ و پووچ کوژراوە …

–   پێویست ناکات توورە بیت. خۆ دیتت حیزبەکەت چۆن رەوانەی دادگای کردی؟ توو شەرەفت وەزیریش وا بەرێ دەکرا؟ کوڕە ١٠٠ سەیارەت بەدواوە بوو. خۆ پێشوازیەکەشت دی.

–   دەزانم کاک عەلی گیان، من سپاسی حیزبەکەم ئەکەم . هەر ئەو چاوەروانیەشم لێ ئەکرد . خۆت ئەزانی لەم سەردەمەیا و بە نەبوونی مامە، ئێمە ئەبی هەموومان ئاگامان لەیەکتر بێت، ئەگینا خوراوین .

–   دەزانم . ىەراستیش وایە. باشە ئێستە پلانت چی‌یە.

–   پلان….؟ مەگەر قەرامان چی بوو. من قوبووڵم کرد بچمە بەردەم دادگا ، ئێوەش و هەموو لایەکنان گفت‌تان پێ‌یام لەمبارەوە چیم ویست بیکەم.

–   ئیمە لەسەر گفتی خۆمان ماوین، چ یارمەتیەک لەدەستی ئێمە ییت؟

–   ئەمەوێ کاوە گەرمیانی داداگایی بکەمەوە.

–   کورە مەحموو…

–   بۆ سومعەی یەکێتیش بوە هەر ئەوکارە ئەکەم.

پەردە دادەخرێ

لە تارتکیدا دەنگی پاچ و قوڵەنگ و کەندنی عەرز دێت، هاوکات ورتە ورتی چەند کەسێک کە بەئەسپایی قسەدەکەن. پاشان بێدەنگی.

دیسان پەردە هەڵدەدرێتەوە

ژوورێکە وەک هۆڵی دادگا، سێ چوار کەس وەک پارێزەر و دادوەر و کارمەندی دادگا لەپشت کورسیەکانیانەوە دانیشتوون. لە لای ڕاستەوە، مەحموود سەنگاوی لەسەر کورسیەک دانیشتوە و سەر و سمیڵی رەشی قەترانی کردوە و دەمانچەیەکی دەسک زێری بەلا پشتینەکەیدا کردوە، تەسبیحێکی درێژی بەدەستەوە گرتوە و هەروەک جەلال تاڵەبانی پەیتا پەیتا ئەمدەست و ئەو دەستی پێدەکات، ناوچاوی تێکناوە و توورە دیارە. لە پێش “دادوەر”دا کەسێک کە بە کەفن پێچراوەتەوە  وەستاوە. پشتی لە هۆل و رووی لە دادوەرە.

دادوەر دێتە قسە و دەڵێ : ناو

–    کاوە گەرمیانی

–   ئەزانی بۆ لێرەی؟

–   بەڵێ قوربان . دەتانەوی کاک مەحموود سەنگاوی بەتاوانی کوشتنی من دادگایی بکەن.

–   تۆ شەرم ناکەی کوشتنی خۆت دەخەیە ئەستۆی جەنابی کاک مەحموو سەنگاوی؟

–   قوربان من پێش کوژرانم بەڵگەم بەم دادگایە داوە کە ئەو کابرایە هەڕەشەی کوشتنی لێکردوم.

–   ئاگات لە دەمت بێت، ئەوکابرایە ، یانێ چی.

–   ئەی چی بڵیم؟

–    بڵی جەنابی کاک مەحموو سەنگاوی

–   جەنابی دادوەر، کەست دیوە بە قاتلی خۆی بڵی جەناب؟

–   وتم دەمت داخە.

–   باشە گەر ئیجازە نادەن قسە بکەم . بۆ منتان لەقەبر دەرهێناوە ؟

–   بۆ ئەوە دادگاییت بکەین .

–   بەکام تاوان؟

–   تاوانی بوختان هەڵبستنی خۆت و بنەماڵەت بۆ جەنابی مەحموو سەنگاوی. 

لە میانەی ئەو قسانەدا ، پاسەوانێک دێتە ژوورەوە و دەڵێ :

– قوربان بنەماڵەی “کاوە” لەگەڵ ژمارێک رۆژنامەوانی ئاژاوەچی لە بەردەم دادگا کۆبوونەتەوە و دەیانەوێت بێنە ژوورەوە و سکاڵای خۆیان پێشکەش بکەن.

دادوەر: ئێمە رامانگەیاندوە بەهۆی قەرەباڵغی دادگا ئەمڕۆ و بەیانی ئێش ناکات.

پاشان روودەکاتە مەحموود سەنگاوی و دەڵێ: کاک مەحموو ڕای ئێوە چی‌یە و دەتانەوێ چیبکەین؟

مەحموو سەنگاوی: هیچ ئێوە بڕیاری خۆتان یاوە و سەلماندتان دادگا بێ لایەنە و ئێمەتان بەتەواوی بێتاوان ڕاگەیاند. دەبێ خەڵکەکەمان شانازی بەو دادگایە و بە یەكیتی بکات.

دادوەر: وایە قوربان.

کاوەگەرمیانی لەو قسانە بەتەواوی کاس و گێژ بوە ، دێتە زمان و دەڵی: ئێوە ئابروو و حەیای یاسا و تەنانەت مرۆڤایەتیشتان بردوە.

مەحموو سەنگاوی قسەکەی پێ دەبڕی و دەڵی: خوت دەزانی چەندجار کە تەلەفوونم بۆت کرد، چۆنم لەگەڵ خۆت و دایک و ژنت مامەڵە کرد، پێت ئەڵێم ها، تووڕەم مەکە با دەم نەکەمەوە.

کاوە: باشە گەر نابێ قسە بکەم بۆ چی منتان زیندوو کردوەتەوە و بۆ ئێرە‌تان هێناوم.

مەحموود سەنگاوی: گوێگرە بزا چیت پێ ئەڵێم. ئیمە چووینە دادگا و دادگا بڕیاری دا کە ئێمە هیچ پێوەندیەکمان بە کوشتنی تۆوە نەبوە، بەڵام کەسوکارە هیچ و پووچەکەت دەس بەردار نین. بۆیە تۆم زیندوو کردوەتە کە بچیتە خەویان و پێان بڵیی ، دامرکێن و لەوە زیاتر قەرەباڵغی نەکەن ،ئەگینا ئەوانیش ئەکەم بەقوربانی دوو فیشەک.

کاوە: جەنابی دادوەر گوێت لێ‌یە، خۆی دان بە کوشتنی منا ئەنێ و هەڕەشەی کوشتنی کەسوکاریشم ئەکا.

دادوەر: دەمت داخە من چتی وام نەبیستوە، عەیبت ناکەن درۆ بۆ ئەو رۆڵە قارەمانەی گەل و ئەو پێشمەرگە دێرینە هەڵدەبەستی.

کاوە خۆی پێناگیرێ و تووڕە دەبێ و هاوار دەکات: ئێوە هەمووتان مرۆڤ کوژن، ئێوە هەمووتان مافیان ئێوە هەمووتان دز و تاڵانچی…

یەکێک لە پاسەوانەکان پەلاماری دەدا و دەمی دەگرێ.

مەحموو سەنگاوی پەلاماری کاوە دەدا و بە دەمانچە رێڕەکەی چووار پێنج فیشەک دەنێ بە دمیەوە. کاوە دیسان بۆ جاری دووەم خلتانی خوێن دەبێ دەکەویتە ناو هۆڵی دادگا و خوێن بەناو هۆڵی دادگا بڵاو دەبێتەوە.

مەحموود سەنگاوی روودەکاتە دادوەر و دەڵێ: جەنابی دادوەر تۆ سەلماندت کە شەرافەتی قەزاوت و سەروەری یاسا دەپارێزی و کەسایەتی و کەرامەتی هاوڵاتیان ناکەیتە قوربانی بۆ مەسئوولەکان. یەكێتی نیشتمانی بە دادوەری وەک تۆ شانازی ئەکات.

دادوەر بە قسەکانی مەحموود سەنگاوی بزە دەکەوێتە سەرلێوانی و هەموو پێکەوە رێدەکەون لە دەرکەی پشتەوە دادگا بە جێ دێلن. یەکێک لە پاسەوانەکان دەپرسی: قوربان چی لەم تەرمە بکەین؟

مەحموود سەنگاوی دەڵی :تاریک داهات فڕەی بدەنەوە ناو قەبرەکەی، بەڵام وای داپۆشن کە کەس شک نەبات دەریان هێناوە.

چراکانی هۆڵەکە کەم کەم دەکوژێنەوە. تێشکێکی سوور تەرمی کاوە رووناک دەکات، کاوە هێشتا خوێنی لێ دەرژێ، لە دەرەوە دەنگی دروشمدانی کەسوکاری کاوە و ژمارێک رۆژنامەوان دەبیسرێت کە بە داخستنی دادگا ئیعتراز دەکەن، لە ژێر ئەو دەنگانەوە،  بەرە بەرە دەنگی سروودی “مەشخەڵان” دێتەگوی و تا دێت زیاد دەبێ…

مەشخەڵانی شۆڕشی نوێی ئەمجارە…. ئەمجارە

گڕی بڕوای رەنجدەران و هەژارە        کوردستانم….

پەردەکان هێدی هێدی دادەخرین. ناو قاعە(سالۆن)ـەکە هیچ چرایەک بەهەڵکراوەی نەماوە. هەموو لایەک تاریکە.

سروودی مەشخەڵان هەر بەردەوامە. بەڵام بەرە بەرە دەنگی ئیعتراز و دروشمدانی بنەماڵەی کاوە و رۆژنامەوانان و تاکەکانی موعتەرز بەرز و بەرزتر دەبێتەوە و بەسەر سروودی مەشخەڵان دا زاڵ دەبێ. ئیتر دەنگی مەشخەڵان نابیسرێت و هۆڵەکە لەبەر دەنگی دروشم  کەوتوەتە لەرزە.

کۆتایی

نووسینی:خەلیل غەزەڵی
Previous
Next
This site is registered on wpml.org as a development site.