Skip to Content

Friday, March 29th, 2024
ئازادى …… محەمەدى مشیر

ئازادى …… محەمەدى مشیر

Closed
by July 12, 2008 گشتی

هەرچەند لە سروشتى هزرى و دەروونى پێکهاتە و تاکەکانى ئەو کۆمەڵگەیەى لەمەڕ خۆمان رادەمێنم و سەرنجى دەدەمێ، دەبینم هەرچى دەمى دەکاتەوە باس لە ئازادى و ئازادى رادەربڕین و رێزگرتن لە مافى ئەوى دیکەى جیاواز و لێبوردەیى و…تاد، دەکات، کەچى زۆرێنەى ئەوانەشن هەر لەگەردى بەیانەوە تا زەردەى خۆرئاوا بە شێوازى جۆراوجۆر و لە شوێنە تایبەت و گشتییەکان ئازادى پێشێل و ئەنجن ئەنجن دەکەن.هەن تامەزرۆیى ئازادین و هەرچى بکەن بە ئازادیى دەزانن، هەن ئازادى لەوەدا دەبیننەوە کە ئازادانە هەرچى بیانەوێ بە خەڵکى بکەن، هیدیکەش هەن لەو نێوانەدا ئازادانە خۆیان بە کۆیلەى ئەم و ئەو دەکەن، هەموو باس لە ئازادى دەکەن بەڵام زۆربەیان پێشێلیدەکەن. حزبە باڵادەستەکان لەهەموو کۆڕو کۆبوونەوە تایبەتەکانیان یان لە بۆنەو مەراسیمە فەرمییەکان ئازادى بەخەڵک و ئەندام و لایەنگرانیان دەفرۆشن و (ئازادیان) دەکەن، کەچى ئازادى ئەندامانى حزبێکى دیکەیان قەبووڵ نییە تەنانەت ئەگەر ئەو حزبە لە تێهزرین و بەرنامەکانیشدا جیاوازییەکى ئەوتۆى نەبێت لە گەڵیاندا، گەورە بەرپرسان زۆرئازادانە و بێ سانسۆر هەموو قسەیەک دەکەن، بەڵام رازى نین رۆژنامەنووسێک رەخنەیەکى بەجێیان لێبگرێ، زۆربەى وەزیر و پەرلەمانتار و بەرپرسە حزبى و بەڕێوەبەرە گشتییەکان لە رەوتار و نووسینى رەخنەگر و بنیاتنەرانەى رۆژنامەنووسان ناڕازین و دڵیان دەگوشرێ، بەڵام زۆر ئاساییە بە لایانەوە لە لێدوانێکى زۆر ئازاددا دڵى هەموو خەڵک بڕەنجێنن، هەندێ لە بەرپرسان ئازادانە و بێخاترانە تەواوى کۆمەڵگە بە نەزان و کاڵفام و…دەزانن، بەڵام ئەگەر تاکە ئەندامێکى سادەى ئەم کۆمەڵگەیە ئازادانە گلەیى لەو رەوتارەیان بکات بە گێرەشێوێن و سەرەڕۆ و ئاژاوەچى لە قەڵەمى دەدەن.
ئازادانە لە پڕۆسەى بنیاتنانەوەى عێراقى نوێ بەشداریمان کرد، ئازادانەش ئەم رۆڵەی ئێمەیان بەهەند وەرنەگرت،لە نێو خۆماندا بۆ یەکتربڕین و ناشرینکردنى یەکودوو زۆر ئازادین، لە دانوستان و گفتوگۆیەکانى دەرەوەشدا (دۆستەکانمان) داوامان لێدەکەن خۆمان سەخڵەت نەکەین و ئازادانە لە مافەکانمان خۆشبین، هەمووى هەر ئازادییە، بەڵام گەلۆ زۆر لەوە دەترسم وەک چۆن ئازادانە دەستمان پێکرد هەروا ئازادانەش کۆتایى بە هەموو شتێک بهێنین! 

 

Previous
Next
This site is registered on wpml.org as a development site.