Skip to Content

310 Views

دوو دڵدار … سمکۆ ئەحمەد

دوو دڵدار … سمکۆ ئەحمەد

Be First!
by July 7, 2017 General, Poems
image_print

هەنگێك و گوڵێك دڵدار بوون
هەنگەکە هەموو ئێوارانێ
ماچی هەنگوێنی لەژێر پەڕەی
گوڵ دادەنا
گوڵیش هەموو بەیانیەك باوەشی
پەمەیی بەودا دەکرد و
نەرم نەرم شیللەی مەمکی
لەنێو دەمی هەنگ دادەنا

باخچەو و گوڵ و مەل و چیمەن
هاوڕێیان بوون
تەختەی شانۆو
پەڕەی شیعری هەردووکیان بوون
ڕۆژ هات و چوو
بەفرو نێرگز سەرچۆپیان
ئالوگۆڕ کرد
دارو باخچە بەرگی سەوز و سپی و نارنجیان یەک لە دوای یەک
لەبەژن هەڵکرد

بەیانیەکی پرچ زەرد هات
گوڵی پەمبە زەرد هەلگەڕا
کاتێ زانی ئەو بەیانی یە لە ژێر لۆچی مەمکی
پەڕەکانیا ماچی هەنگوین دانەنرابوو
هاواری لە باخچەو چیمەن کرد
سەودایەکی هەنگی چاوزەردی بۆ بکەن
گوڵ و باخچەو مەل و چیمەن
کەوتنە گەڕان
بەدوای هەنگی عاشقدا لەگەڵ باران
شاخ و دەشت و حەوشەی ماڵان
کەوتنە گەڕان

مەلی باڵشین بە چاوی خۆی
هەنگی چاوزەردی بینیبوو
لە نێو پورەی باخی سەرۆك
زیندانیکی بە تەل چنراو
لە باتی گوڵ کەللە شەکر
لەکەمەری هەنگ بەسرابوو

گوڵی پەمبە لەو رۆژەوە شیلەی نەما
ووردە ووردە قەترە ماچی هەنگوینی هەنگ لە ژێر پەرەی پەمەیدا وەک زەنگیانە کەوتنە خوارێ
رۆژ لەدوای رۆژ چرچ و سیس بوو
لە پایزدابۆ دواجاریش لە چاو وونبوو

سمکۆ ئەحمەد
لەندەن ۲٠۱۷

Previous
Next

Leave a Reply