Skip to Content

294 Views

شتێك بهێڵەوە* … سۆران محەمەدە سوورە

شتێك بهێڵەوە* … سۆران محەمەدە سوورە

Be First!
by July 7, 2017 General, Poems
image_print

تۆپێك… خۆشنووده‌ ،
منداڵێك یاری لەگەڵ دەكات.
2
پیانیستێك… دەهرییە
لە خۆی و پیانۆكەی،
كە ناچنەوە سەر تەبابوون لەگەڵ:
ڕیتمی گەڵا و
بایەكی پاییزە و
ڕاكشانی ژن بە هەورییەكی تەنكی ئاودامان.
3
تەسبیحێك
ڕۆژەكانی تەمەنی ژنێكی بۆ ناژمێردرێت،
كە بەرۆكی تەنیایییان گرتووە.
4
سەگێك
هەڵبەز و دابەز… تێدەپەڕێ!
شاگەشكەیە
كوخێك، شەوان خۆی دەخزێنێتە باوەشیەوە.
5
لەو ئایەت بۆ ئەو ئایەت… ڕاهیبێك
سەر دەرناكات
لە ناكۆكی خودا و شەیتان.
6
خودایەك،
دوای شەڕە نەبڕاوەكەی خۆی خستین و
خۆر: ئاوازی كەمانێك… دوور.
مانگ: سەفەر تا ئەوسەری عیشق.
سێو: شەوچەرەی سەر مێز.
ژن: سوكنایی تەنیایی.
شەڕاب: هەر بۆ خۆی بوو.
7
سێو: قینی هەمیشەیی خودا لە مرۆڤ.
سێو: خاڵی ناتەبایی و
ڕێگە نەخشەی شەیتان.
ئەو سێوە تا خۆی نیشان نەدابا
ئەو خودایەی وێرانەیەك بوو لە غروور
ئارام نەدەبوەوە.
8
ژیان مەزەندەی درۆیێك بوو
ئێمە ڕێكەوتمان كرد.
دۆڕانێ بوو
یەك یەكی هەنگاوەكانی نزیك ڕاكشانی ژن و
فڕین لە باڵە خۆڵەمێشیەكەی كۆتر و
چاوەڕوانی دایكێك
لە گەڕانەوەی منداڵە گوڵەبەڕۆژ فرۆشەكەی
ئەو دۆڕانە
چی بەرسیلەی عیشق هەبوو، پێی دۆڕاندین و
ڕۆشنایییەك چییە
لە یادگە شەقار بووەكەی نەهێشتینەوە.
9
بمبوورن، كە هێندەی شینایی ئاسمان
سپییەتی دڵی مەسیح
سادەیی دوو منداڵ
بیرم لە فڕینی كەنارییەك نەكردبێتەوە
نەم وتبێت، بۆ خاتری چریكەی ئەم” پێغەمبەر”ە**
شتێ بكە… خودایە!
ئەم پاسارییە لە خەونی فڕین دایە
ئەم پیاوە هێشتا خوێنی لێدەتكێ
ئەم منداڵە دڵی بە كایەكانەوە خۆشە، با گەورە نەبێ.
10
درەنگانێك ختوكەم دەدا
درەنگانێك لە چاوەڕوانیمدایە…
خۆم مەڵاس بدەم
قفڵ لە دەرگه‌ بدەم
یەك یەكی پەردەكان دابدەمەوە.
درەنگانێك نیگام دەبا توولەڕێی ئاوایی.
درەنگانێك جگەرەیەك لە نووتەكی لاڕێوە، دادەگیرسێ
تا دێ نزیك دەبێتەوە
تاریكیش قووڵتر دەڕوانێ.
درەنگانێك… هەوا سارد
نیگا… تەرمێك بێوادە پیر
تا بڵێیت شەوێك… ئەنگوستەچاو
ختووكەدانی خۆكوشتنێك… نێزیك
تەمی بێدەنگیێك… وەربووبێتە خۆم
11
سێ هەنگاو دوور و نێزیك
ترس رژاوە
كۆڵانێك… بەسەر خۆرهەڵاتنی بەیانیان!
كەسێك… تەپە تەپ بە كۆڵانەكەدا…
قیژەیەك بەرز دەبێتەوە
سێبەرێك دەنیشێتە سەر پەنجەرەكەم و
دەخزێمە قوژبنێكەوە.
بەرەبەیان… دەرگه‌ بستێك دەكەمەوە
خۆر ڕمێ دێتە ژوور
سەرەتاتكێیەك دەكەم
هەنگاوێ دەكشێمەوە
سەیر… دەكەم، دنیا هەر وەك خۆیەتی
وەك جاران فریودەر و
وەك جاران جوان و
وەك ژن میهرەبان خۆی نواندووە.
ئیتر بێدەنگی و خۆم
دەخزێنمە گۆشەیەكی لاچەپی ئێوارانمەوە و
ڕۆژ و
مانگ و
ساڵ
بیر لە تۆ دەكەمەوە، لە خۆم نا.
12
كەسێك پەنهان… لەمندا
لەودیو مەینەتییەكان، كەڕەنا دەژەنێ
دەستێك خاڵی لە مروەتی ئێوارە، دەنووسێ:
ئێوە هەر هێندە
شەقەی كەنارییەك ئیستێكی پێدەكردن
غەریزەی مێینەتی كوێری دەكردن و
ماندوو دەچوونەوە؛
لە بە ئەدرەسكردنی جەنگ و وێرانكردن.
شپرزە تا شكۆفەی كزە تاریكییەكی درەنگ.
ئێوە ئەو ئافرێنراوه‌ دۆڕاوانه‌ی شەڕە پیرۆزییەكان بوون
دواجار خوداكانتان لەسەر بەرماڵێكی لەخوێنا مەییو
تەنیا، تەنیا جێوهێشتن… نه‌گه‌ڕانه‌وه‌.
بەڵام بە بێگوناهیتان
نەتانتوانی بێ عیشق، بێ خوێن بژین
گۆزەی خەتای خوداكانتان
لە ئێوارەی منداڵیتان؛ ورد وخاش كرد.
13
كەسێك لەمندا… چاوەڕوان
وەك منداڵێك
ورك لە دایكی گرتبێ و
قاچەكانی خستبێتە خۆڵی حەوشەكەوە.
14
خودایە! ئەگەر ڕۆژێك خواستت شتێك بەریتەوە
هەموو شتێكم ببە
تەنیا گریان لە نووتەكی ژووری منداڵیم نەبێت.
قەینا ئەگەر ڕووت و قووت
پێخاوسیش جێی بێڵیت.
15
ڕابردوو… حیكمەتی شپرزەی شەوێكی دڕدۆنگە
لە یادگەی خودا.
تارمایی پرسیارێكی چاوەڕواننەكراوە
لای موسافیرێكی ڕێلێونبوو.
ئێستا… ژنێكە لە نێوان بزربوون و خۆ دزینەوە.
پیاوێكە لەنێو گومان و خۆ بیرچوونەوە.
داهاتوو… مقۆمقۆی خوداكانە
لەسەر دڵۆپێك خوێن.
خەمە سیزیفییەكەی جەنجاڵییە، بۆ تریفە:
بەقوربان؛ دواجار مەرگ
بە ماچ، چەپكێ گوڵ،
ڕووانینێكی یاسەمینانە فریومان دەدا
ڕێی ئەم هەموو گریانەت بەرەو كوێ؟!
ترسته‌! پیاسەكانی ئێوارەی دوێنێ،
لە گەڵ دارسێوێكی تر بتبینن؟
16
ئێستا خەیاڵ
لای ڕاكشانی ژنە بە هەورییەكی تەنك.
لای پیاسەیەكە لەگەڵ سەگە تووكن سپییەكە.
لای دان دانە بەو كۆترانەی
دەنووكیان لێوانلێو لە حیكایەت،
چون و هاتنی ڕاڕەو و
تەنیایی سەر جێگەیەك؛ پیاوێكی تێدا نەخست.
17
ئێوارە بوو… نێزیك تەنیایی باغ
پیرە مێردێك پرسی: تۆ بڵێی
ستیانێ گوڵەبەڕۆژە بە چەند بێ؟
ئەو خوی هەمیشەیی، دزینی ئەو ستیانانە بوو
ژنە دێهاتییەكان
لە چاوەڕوانی جەنگاوەرە شكست خواردووەكانیان
بە تەنافی بێمروەتی هەڵیان دەخستن،
كە هەندێكیان گەڕانەوە و
ئەوانی تریش؛
لە خەیاڵی ڕاكشانی ژنە ئاوییەكانیان… مەراق كوشتنی.
18
ئێواران…
خۆر دەخزێتە باوەشی تەپۆلكەیەكی لمین.
دەنگی ئومێدی گەڕانەوەیەك دەپڕژێتە سەرم.
منداڵێك دەست بۆ لێكردنەوەی سێوێك ڕایەڵ دەكات.
لەژێر سنەوبەرێك
نابینایێك… بۆن بە دەسماڵَێكەوە دەكا
دەست بە لاڕوومەتی چەپی دادێنێ
هەست بە كڕووزانەوەی ماچێك دەكات
19
ماچ: گەڕاندنەوەی نسێی بەیانی باشێكە… بەدزی كۆتر.
گمەیەك ڕووناكییە، لە تروسكایی لاچەپی دێیێكەوە.
گێڕانەوەی حیكایەتێكە لەدەمی پیرەژنێكی دنیا دیتە.
ئەفسانەی ئەو پەپولە مەلوولانەیە؛
تەنیایی چاوی هەڵگڵۆفیون لە لۆچ.
نیگا بڕینە لە خنجیلەیی جووچك و
پاسارییەكی هەڵكوڕماوی غەمگین،
وەك هەستی كردبێ ئەم ئێوارەیە دەمرێ.
20
دەتزانی!
سەوڵ بۆ بەلەمی ئێوارەیێكی لێڵ پڕ زەحمەتە
پەنجەكردن بە تارا
لەبەردەم پەنجەرەی مارێك،
ئەم نێڵە نێڵەی ناخی منی پێهێور نابێتەوە.
ئیتر بۆ كام ئێوارە گەڕانەوەیەك… درەنگ،
ئەم بەردەرگه‌یە چۆل ناكەیت.
بۆكام خۆشنوودی بەیانیان
پەنجەرەكەت ئاوەڵایە و
خاك مێخەك ڕێژ دەكەیت.
بەم دەستە نائومێدانەتەوە
خۆت و ئەم زەمبیلەیە، بۆ كوێ دەبەیت؟
كە چنگێ ڕووناكییان تێدا نییە!
21
بەفر حینجەی دایكێكە
لە خوێندنەوەی چیرۆكێكی كوردیی بۆ منداڵە تاقانەكەی.
خۆرەتاو سەركێشی منداڵێكە
لە هەڵماتێن بە هێلكەكانی شەیتانی بوون.
ژیانیش لە شیرین خەودا
حیكمەتی لاڵانەوەی خوناوە
لە گومانی خەنجەر.
نا دەشێ، سێ هەنگاو لێتەوە دوور
ڕامانی پشیلە تووكن سپییەكە بێ،
كە بێهوودە لە گەڕانەوەی ڕووحێكی پەژمووردەدا
نیگای بڕیوەتە ڕووبارەكە.

* ئه‌م شیعره‌ له‌ ژماره‌ (510)ی ھەفتەنامەی زاری كرمانجی، بڵاو كراوه‌ته‌وه‌.
** مه‌به‌ست له‌ “مه‌زهه‌ری خالقی”یه‌.

Previous
Next

Leave a Reply